កំពង់ឆ្នាំង៖បុរស២នាក់ជាជនសង្ស័យក្នុងករណីចោរលួចគោ ដែលម្នាក់ជាអ្នកលួចគោ ម្នាក់ទៀតជាអ្នក ទិញគោ ត្រូវបានម្ចាស់គោនិងសមត្ថកិច្ចស្រាវជ្រាវចាប់ខ្លួនបាន នៅវេលាម៉ោង ១០និង៣០នាទីព្រឹក ថ្ងៃទី០១ ខែតុលា ឆ្នាំ២០១៤ នៅក្នុងលំនៅដ្ឋានរបស់ជនសង្ស័យទាំង២នាក់នោះ ដែលស្ថិតក្នុងស្រុក កំពង់ត្រឡាច បន្ទាប់ពីពួកគេបានលួចគោញី១ក្បាលរបស់អ្នកស្រុកទៅលក់នៅក្នុងស្រុកទឹកផុសបាន ប្រាក់១៦៥ម៉ឺនរៀល។
លោក ហ៊ុន វាសនា អធិការនគរបាលស្រុកកំពង់ត្រឡាចបាននិយាយអោយដឹងថា៖ ជនសង្ស័យ ទាំង២នាក់ម្នាក់មានឈ្មោះ យ៉ោប លាស់ អាយុ៣០ ឆ្នាំ មានទីលំ ភូមិខ្នាយ កកោះ ឃុំសែប ស្រុកកំពង់ត្រឡាច ជាអ្នកលួចគោ និងម្នាក់ទៀត ឈ្មោះ យ៉ោម ស្លេះ អាយុ៣៥ឆ្នាំ មានទៅទីនៅ ភូមិជ្រលងកៃស្នាឃុំឈូក ស ស្រុកកំពង់ត្រឡាច ជាអ្នកទិញគោ គេទាំង២នាក់មានសញ្ជាតិខ្មែរឥស្លាមដូចគ្នា ។
លោកបានបន្តអោយដឹងថា៖ នៅវេលាម៉ោងប្រមាណជាង៩យប់ ថ្ងៃទី ៣០ ខែកញ្ញា ឆ្នាំ២០១៤ ឈ្មោះ យ៉ោប លាស់ បានទៅលួចគោមួយក្បាលជារបស់ឈ្មោះ លាស់ ទាំ អាយុ៤៥ឆ្នាំ ខ្មែរឥស្លាម រស់ នៅភូមិខ្នាយកកោះ ជាមួយគ្នា ហើយបានយកដឹកទៅលក់អោយឈ្មោះ យ៉ោម ស្លេះ នៅភូមិជ្រលងកៃ ស្នា ក្នុងតម្លៃ ១៦៥ម៉ឺនរៀល តែអោយបាន១លាន៤៥ម៉ឺនរៀល នៅខ្វះ២០ម៉ឺនសិន។នៅយប់នោះក្រោយ ពីប្រគល់លុយប្រគល់គោទៅវិញទៅមក នៅក្បាលថ្នល់សែប ឃុំតាជេសរួចហើយ ឈ្មោះ យ៉ោម ស្លេះ បានដឹកគោយកទៅទុកនៅព្រះវិហារឥស្លាមមួយកន្លែងក្នុង ភូមិស្រែអ៊ុក ឃុំតាំងក្រសាំង ស្រុកទឹកផុស ដែល ជាព្រះវិហារមួយត្រូវបានអង្គការសាសនាឥស្លាម ផ្តល់ប្រាក់ប្រមូលទិញគោសម្រាប់កាប់ក្នុងពេល
បុណ្យប្រពៃណីខ្មែរឥស្លាមនាពេលខាងមុខ។
លុះព្រឹកឡើងថ្ងៃទី០១ ខែតុលា ឆ្នាំ២០១៤ម្ចាស់គោបានដឹងថាបាត់គោហើយក៏បានប្តឹងនិងបានសហការជាមួយមន្ត្រីនគរបាលស្រុកបដើររកគោដល់ស្រុកទឹកផុស ហើយបានប្រទះឃើញគោគេចងទុកនៅជិតវិហារឥស្លាមនោះ ក៏ប្តឹងសមត្ថកិច្ចអោយស្រាវជ្រាវចាប់ខ្លួនបានអ្នកទិញនិងអ្នកលួចគោនៅក្នុងស្រុកកំពង់ត្រឡាចតែម្តង
នៅចំពោះមុខសមត្ថកិច្ច ជនសង្ស័យឈ្មោះ យ៉ោម ស្លេះ បានសារភាពថាៈ ខ្លួនពិតជាបានទិញ
គោពីឈ្មោះ យ៉ោប លាស់ ដោយណាត់ជួបគ្នាប្រគល់លុយនៅក្បាលថ្នល់សែប ហើយខ្លួនបានដឹកយកទៅលាក់ទុកនៅស្រុកទឹកផុស។ចំណែកឈ្មោះ យ៉ោម លាស់ វិញបានឆ្លើយបដិសេធថាៈ ខ្លួនមិនបាន លួច និងមិនបានដឹងអ្វីទាំងអស់។ លោកអធិការបានបញ្ចាក់អោយដឹងថា៖ផ្អែកលើអង្គហេតុ និងសាក្សី រួមទាំងអ្នកទិញឆ្លើយដាក់ ជននេះគេចមិនផុតពីមានទោសឡើយ ហើយបានកសាងសំណុំរឿង បញ្ជូនមកកាន់ស្នងការដ្ឋាននគរបាលខេត្ត ចាត់ការបន្តតាមនិតិវិធី។
នៅព្រឹកថ្ងៃទី០២ ខែកញ្ញា ឆ្នាំ២០១៤នេះ លោក ប៉ុល វុទ្ធី ស្នងការរងនគរបាលខេត្ត និងជាប្រធានការិយាល័យកណ្តាលយុត្តិធម៌នៃស្នងការដ្ឋាននគរបាលខេត្ត បានអោយដឹងថា៖ជនសង្ស័យទាំង២ និងត្រូវធ្វើការសួរចម្លើយតាមនិតិវិធីជាបន្ត ហើយនិងត្រូវបញ្ជូនខ្លួនទៅកាន់សាលាដំបូងខេត្តនាល្ងាចថ្ងៃទី០២ខែកញ្ញា ឆ្នាំ២០១៤នេះហើយ ដើម្បីតុលាការជំនុំជំរះផ្តន្ទាទោសតាមបញ្ញត្តិច្បាប់ ៕
