កំពង់ចាម៖ កម្លាំងការិយាល័យនគរបាលប្រឆាំងគ្រឿងញៀន បានឃាត់ខ្លួនជនសង្ស័យចំនួន២នាក់ ករណីជួញដូរគ្រឿងញៀន នៅរសៀលថ្ងៃទី១ ខែតុលា ឆ្នាំ២០១៤ ចំណុចភូមិទី៦ សង្កាត់វាលវង់ ក្រុង-ខេត្តកំពង់ចាម ។
លោក វរៈសេនីយ៍ទោ សោម រស់ នាយការិយាល័យប្រឆាំងគ្រឿងញៀនបានឲ្យដឹងថា មុខសញ្ញាជនសង្ស័យ២នាក់នេះ មានមុខរបរជាអ្នករត់ម៉ូតូឌុប ហើយក៏ជាអ្នកចែកចាយថ្នាំញៀន យ៉ាងអាណាធិបតី ក្នុងភូមិសាស្ត្រចុងថ្នល់ និង សាលាហុងគ្រី ។ នៅពេលដែលជនសង្ស័យកំពុងធ្វើសកម្មភាព ជំនាញចាត់ការទៅតាមនិតិវិធី ហើយឈានទៅខាត់ខ្លួន
ជនសង្ស័យនៅចំណុចខាងលើ រួមមាន៖ ១-ឈ្មោះ យ៉ែម បេ ភេទប្រុស អាយុ៣២ឆ្នាំ រស់នៅភូមិទី៦ សង្កាត់វាលវង់ ក្រុង-ខេត្តកំពង់ចាម ។ និងទី២-ឈ្មោះ ផា សាងហ៊ី ភេទប្រុស អាយុ៥០ឆ្នាំ រស់នៅភូមិចុងថ្នល់ សង្កាត់បឹងកុក ក្រុង ខេត្ត-ខេត្តកំពង់ចាម ។ កម្លាំងក៏បានរឹបអូស ថ្នាំញៀនម្សៅក្រាមពណ៌ស ចំនួន២កញ្ចប់តូច និងម៉ូតូចំនួន២គ្រឿងផងដែរ ។
ករណីនេះ ជនសង្ស័យទាំង២នាក់ រួមទាំងវត្ថុតាង ជំនាញបានកសាងសំណុំរឿងបញ្ជូនទៅសាលាដំបូងខេត្ត ចាត់ការទៅតាមនិតិវិធី ៕
