ពោធិសាត់ៈ ស្ត្រីជាប្រពន្ធបានស្លាប់នៅកន្លែងកើតហេតុភ្លាមៗ រីឯប្តីបានរងរបួសធ្ងន់ ខណៈពេលប្តីប្រពន្ធទាំងពីរនាក់នេះ ជិះម៉ូតូឌុបគ្នា បើសកវ៉ារថយន្តដឹកទឹកកកមួយគ្រឿង ហើយត្រូវរថយន្តបាឡែនមួយគ្រឿងទៀត មកពីក្រោយ បានបុកទាំងពេញទំហឹង គ្រោះថ្នាក់ចរាចរណ៍នេះ បានកើតឡើងកាលនៅលើកំណាត់ផ្លូវជាតិលេខ៥ ត្រង់ចំណុចមុខកន្លែងចិញ្ចឹមស្វា ស្ថិតក្នុងភូមិទួលម្កាក់ សង្កាត់រលាប ក្រុងពោធិ៍សាត់ ។
មន្ត្រីប៉ូលីសក្រុងពោធិ៍សាត់ បានឲ្យដឹងថា ស្ត្រីរងគ្រោះដែលស្លាប់នោះ មានឈ្មោះ ម៉ៅ ជា អាយុ ៤៣ឆ្នាំ រីឯប្តីមានឈ្មោះ សុខ ចិន អាយុ៤៥ឆ្នាំ ។ ជនរងគ្រោះប្តីប្រពន្ធខាងលើនេះ មានទីលំនៅ ក្នុងភូមិក្រាំងតាសែន សង្កាត់ព្រៃញី ក្រុងពោធិ៍សាត់ ។ ជនរងគ្រោះជិះម៉ូតូម៉ាក ស៊ីរុស ព័ណ៌ខ្មៅ ពាក់ស្លាកលេខ ពោធិ៍សាត់ 1B-6817 ជិះក្នុងទិសដៅពីលិចទៅកើត ។
ចំណែករថយន្តបង្កគ្រោះថ្នាក់ ម៉ាកកាមរីបាឡែន ព័ណ៌ទឹកប្រាក់ ពាក់ស្លាកលេខ កំពង់ចាម 2A-2266 ។ អ្នកបើកបរមិនស្គាល់អត្តសញ្ញាណនោះទេ ព្រោះក្រោយពេលកើតហេតុ ម្ចាស់រថយន្ត បានរត់គេចខ្លួនបាត់ ។ ប្រភពនៅកន្លែងកើតហេតុ បានឲ្យដឹងថា មុនពេលកើតហេតុ ពីរនាក់ប្តីប្រពន្ធ ជិះម៉ូតូឌុបគ្នា ក្នុងទិសដៅពីលិចទៅកើត ស្របពេលជាមួយគ្នា
នោះ មានរថយន្តដឹកទឹកកកមួយគ្រឿង បើកអែបទៅខាងស្តាំដៃ ហើយម៉ូតូជនរងគ្រោះ ក៏បានបើកវ៉ារថយន្តដឹកទឹកកកនោះ ក៏ស្រាប់តែរថយន្តបាឡែននោះ បើកបុកពីក្រោយពេញទំហឹង បណ្តាលឲ្យមានអ្នកស្លាប់ និងរបួសបែបនេះតែម្តងទៅ ។ រីឯវត្តុតាងទាំង រថយន្ត និងម៉ូតូ ត្រូវបានប៉ូលីសចរាចរណ៍ខេត្ត យកទៅរក្សាទុក ដើម្បីដោះស្រាយតាមផ្លូវច្បាប់នៅពេលក្រោយ ៕
