ខេត្តកំពង់ឆ្នាំងៈស្ត្រីម្នាក់ត្រូវជនមិនស្គាល់មុខ វាយឲ្យបាក់ក និងបាក់ឆ្អឹងជំនី ហើយមានរួបសជាច្រើនកន្លែង ត្រូវអ្នកឃ្វាលគោម្នាក់ ប្រទះឃើញកំពុងតែដេកប្រកាច់ ក៏បានដឹកបញ្ជូនស្ត្រីរងគ្រោះ ទៅសង្គ្រោះនៅមន្ទីរពេទ្យបង្អែក ខេត្តកំពង់ឆ្នាំង តែអកុសល នៅពេលដែលបញ្ជូនទៅដល់មន្ទីរពេទ្យនោះ ស្រាប់តែស្ត្រីរងគ្រោះ បានដាច់ខ្យល់ស្លាប់បាត់ទៅហើយ ។ ហេតុការណ៍នេះ បានកើតទ្បើង ស្ថិតក្នុងភូមិត្រពាំងមាស ឃុំត្រងិល ស្រុកកំពង់លែង ខេត្តកំពង់ឆ្នាំង ។
ស្ត្រីរងគ្រោះខាងលើ ត្រូវបានគេស្គាល់ឈ្មោះ យន យៀង អាយុ៥៤ឆ្នាំ រស់នៅភូមិស្នោ ឃុំខុនរ៉ង ស្រុកបរិបូរណ៌ មកវ៉ៃថ្មនៅភូមិទំពាំងមាស ឃុំត្រងិល ស្រុកកំពង់លែង ត្តកំពង់ឆ្នាំង ។តាមប្រភពពីសមត្ថកិច្ច បានអោយដឹងថា ក្រោយពេលកើតហេតុ មានអ្នកស្រុកឡើងទៅឃ្វាលគោលើភ្នំ ក៏មានឮសំឡេងមនុស្សស្រែកអោយជួយ ពេលទៅមើលឃើញស្ត្រីឈ្មោះ
យន យៀង កំពុងតែដេកប្រកាច់ ក៏បានហៅអ្នកភូមិនៅក្បែរនោះ មកជួយដឹកទៅសង្គ្រោះ នៅមណ្ឌលសុខភាព ប៉ុន្តែដោយសារស្ថានភាពធ្ងន់ធ្ងរពេក គ្រូពេទ្យបានបញ្ជូនមកសង្គ្រោះបន្ត នៅមន្ទីរពេទ្យបង្អែកខេត្តកំពង់ឆ្នាំង ហើយត្រូវបានស្លាប់នៅមន្ទីរពេទ្យបង្អែកខេត្តតែម្តងទៅ ។ ក្រោយពីស្លាប់ សាកសពជនរងគ្រោះ ត្រូវបានសាច់ញាតិដឹកទៅលំនៅដ្ឋាន នៅស្រុកបរិបូរណ៌ ធ្វើបុណ្យតាមប្រពៃណី ។
ប្រភពបានបន្តថា ដោយសារក្រុមគ្រួសារមានការសង្ស័យ អំពីករណីស្លាប់របស់ជនរងគ្រោះ ក៏បានរាយការណ៍ទៅនគរបាល ស្រុកបរិបូរណ៌ អោយធ្វើការពិនិត្យសាកសព ដោយសហការជាមួយនគរបាលការិយាល័យបច្ចេកទេស នៃស្នងការដ្ឋាននគរបាលខេត្ត បានពិនិត្យឃើញថា ការស្លាប់របស់ជនរងគ្រោះ មានស្នាមវាយត្រង់ក បណ្តាលអោយបាក់ក បាក់ឆ្អឹងជំនីរ និងស្នាមជាំជាច្រើនកន្លែងទៀត ដែលគេសន្និដ្ឋានថា ជាករណីឃាតកម្ម ទៅលើស្ត្រីរូបនេះ ។
នៅកន្លែងកើតហេតុ សមត្ថកិច្ចបានរកឃើញមានដែកស្បែង ដំបង ហើយជនរងគ្រោះ ត្រូវជនមិនស្គាល់មុខ វាយនៅជើងភ្នំ រួចអូសយកទៅលើភ្នំ ចំងាយពីប្រមាណ៥០ម៉ែត្រ ។
ប្រជាពលរដ្ឋនៅភូមិឃុំកើតហេតុ បានអោយដឹងថា ស្ត្រីរងគ្រោះ មកវាយថ្មនៅទីនោះ គឺនៅជាមួយនិងកូនចិញ្ចឹមម្នាក់ ឈ្មោះ រ៉ា ភេទប្រុស ហើយកូនចិញ្ចឹម និងជនរងគ្រោះនោះ ពុំសូវដែលត្រូវគ្នានោះទេ ឈ្លោះគ្នាសឹងតែរាល់ថ្ងៃ ។ នៅមុនពេលកើតហេតុ កូនប្រុសចិញ្ចឹមនេះ ក៏នៅជាមួយគ្នាដែរ ប៉ុន្តែក្រោយពេលកើតហេតុ កូនចិញ្ចឹមឈ្មោះ រ៉ា នោះ បានគេចខ្លួនបាត់តាំងពីថ្ងៃ១ ខែតុលា មកម្ល៉េះ ។ នៅពេលនេះ សមត្ថកិច្ចកំពុងធ្វើការស្រាវជ្រាវ និងស៊ើបអង្កេតបន្ត ដើម្បីឈានទៅចាប់ខ្លួនជនដៃដល់ យកមកផ្តន្ទាទោស ទៅតាមផ្លូវច្បាប់ ៕
