ខេត្តបន្ទាយមានជ័យ ,ជនល្មើសនេសាទខុសច្បាប់បានយករបាំងព្រួលដាក់កាត់តាមដៃស្ទឹងសិរីសោភ័ណយកត្រីខុសច្បាប់ត្រូវបានមន្ត្រីជលផលក្រុងសិរីសោភ័ណចុះធ្វើការបង្ក្រាបដើម្បីយកទៅចាត់ការទៅតាមនិតិវិធីច្បាប់។ការចុះបង្ក្រាបរបាំងព្រួលដាក់កាត់តាមដៃស្ទឹងខុសច្បាប់នោះកាលពីថ្ងៃទី១ខែតុលា២០១៤នៅចំណុចខាងត្បូងទំបន់តាកុចស្ថិតនៅក្នុងភូមិដីឡូត៍សង្កាត់ទឹកថ្លាក្រុងសិរីសោភ័ណខេត្តបន្ទាយមានជ័យ។
លោក សេង ធូ នាយសង្កាត់រដ្ឋបាលជលផលសិរីសោភ័ណបានប្រាប់ថាក្រោយពេលទទួលព័ត៌ពីប្រជាពលរដ្ឋបានដឹងថាមានគេលួចដាក់របាំងព្រួលដាក់កាត់ដៃស្ទឹងសិរីសោភ័ណដើម្បីដាក់យកត្រីយ៉ាងអាណាធិបតេយ្យនោះមន្ត្រីសង្កាត់រដ្ឋបាលជលផលសិរីសោភ័ណបានសហការជាមួយកំលាំងនគរបាលប៉ុស្តិ៍ទឹកថ្លាចុះធ្វើការបង្ក្រាបបទល្មើសនេសាទខុសច្បាប់នេះ។
លោកបានបន្តថាក្រោយពេលដែលបង្ក្រាបបទល្មើសនេសាទខុសច្បាប់រឹបអូសឧបករណ៍បទល្មើសនេសាទខុសច្បាប់មានព្រួលចំនួន១៦ដុំស្មើរ៧៥ម៉េត្រលបចំនួន៦៩លបនិងស្បៃមុងប្រវែង២០០ម៉ែត្រ។វត្ថុតាងបទល្មើសនេសាទខុសច្បាប់នេះត្រូវបានយកមករក្សាទុនសង្កាត់រដ្ឋបាលជលផលសិរីសោភ័ណដើម្បីករៀបចំឯកសារប្រគល់ជូនខ័ណ្ឌរដ្ឋបាលជលផលខេត្តបន្ទាយមានជ័យដើម្បីចាត់ការទៅតាមផ្លូវច្បាប់។
លោក សេង ធូ បានបញ្ជាក់ថាចំពោះបទល្មើសនេសាទខុសច្បាប់មន្ត្រីជំនាញបានណែនាំដល់ប្រជាពលរដ្ឋទាំងអស់បើចង់នេសាទត្រីត្រូវនេសាទដោយស្របច្បាប់បើល្មើសនិងច្បាប់វិញនោះមន្ត្រីជលផលត្រូវតែចាប់និងចាត់ការទៅតាមផ្លូវច្បាប់ចំពោះបុគ្គលណាល្មើសនិងច្បាប់ជាទ្រង់ទ្រាយធំត្រូវបញ្ជូនទៅតុលាការដាក់ទោស៕
