ខេត្តប៉ៃលិន ៖ មានករណីគ្រោះថ្នាក់ចរាចរណ៍មួយបានកើតឡើង បណ្តាលឱ្យបុរសម្នា ក់ ស្លាប់ភ្លាមៗនៅនឹងកន្លែង ដោយសាររថយន្តមួយគ្រឿងរបស់អង្គការដោះមីនហេឡូត្រាស់ បើកបរក្នុងល្បឿនលឿន លុះពេលរថយន្តគេចជង្ហុក ជ្រុលចង្កូតទៅបុកម៉ូតូពេញទំហឹងបុរសម្នាក់ផ្លោងទៅធ្លាក់ក្នុងប្រឡាយអត់ទឹកស្លាប់យ៉ាងអាណោចអាធ័ម។ ហេតុការណ៍នេះ បានកើតឡើងកាលពីវេលាម៉ោង១ និង១០នាទីរសៀល ថ្ងៃទី០១តុលា ២០១៤ ស្ថិតនៅចំណុចខាងត្បូងវត្តភ្នំរាំង ក្នុងភូមិភ្នំរាំង សង្កាត់អូរតាវ៉ៅ ក្រុងប៉ៃលិន ។
បើកម៉ូតូ ឈ្មោះ ឈាង ឡេង ភេទប្រុស អាយុ៤៥ឆ្នាំ ជាកម្មករ មានស្រុកកំណើតរស់នៅ ភូមិបុសខ្នុរ ស្រុកចម្ការលើ ខេត្តកំពង់ចាម បច្ចប្បន្នស្នាក់នៅក្នុងភូមិកើតហេតុខាងលើ បើកបរម៉ូតូម៉ាកសង់កូរ៉េចាស់ អត់ស្លាកលេខរងការខូចខាតខ្ទេចទាំងស្រុង ។ ចំណែកអ្នកបើកបររថយន្ត ឈ្មោះ យួម មុំ ភេទប្រុស អាយុ៣៦ឆ្នាំ ជាមន្ត្រីធ្វើការដោះមីន ប្រចាំអង្គការហេឡូត្រាស់ រស់នៅភូមិឡាកេត ឃុំឡាកេត ស្រុកបាត់ដំបង ខេត្តបាត់ដំបង ដោយបើកបររថយន្តម៉ាកឡង់រឺវ័រ ពណ៌ស ពាក់ស្លាកលេខ NO 812025 រងការខូចខាតផ្នែកខាង ក្រោមស្រាល ។
ប្រភពព័ត៌មានពីសាក្សីនៅកន្លែងកើតហេតុបានឱ្យដឹងថា មុនពេលកើតហេតុ គេឃើញ រថយន្តមួយគ្រឿងបើកបរក្នុងទិសដៅពីជើងទៅត្បូងក្នុងល្បឿនលឿន លុះដល់កន្លែងកើតហេតុ ស្រាប់តែរថយន្តគេចជង្ហុកទៅខាងឆ្វេងដៃ លុះពេលម៉ូតូមួយគ្រឿងទៀតបើកបរក្នុងទិសដៅផ្ទុយគ្នា ពីជើងទៅត្បូង បណ្តាលឱ្យជ្រុលចង្កូតទៅបុកម៉ូតូយ៉ាងពេញទំហឹង បណ្តាលឱ្យគៀបជាប់នៅក្រោមរថយន្ត រីឯមនុស្សខ្ទាតផ្លោងធ្លាក់ទៅក្នុងប្រឡាយអត់ទឹកស្លាប់ភ្លាមៗនៅនឹងកន្លែងតែម្តង ។
ប្រភពដដែលបានបន្តទៀតថា ក្រោយពេលកើតហេតុ សពជនរងគ្រោះ ត្រូវបានប្រជាពលរដ្ឋ និងព្រះសង្ឃរស់នៅក្បែរវត្តនោះ យកទៅបូជានៅក្នុងវត្តភ្នំរាំង រង់ចាំបងប្អូនធ្វើដំណើរមកពីស្រុកកំណើត យកឆ្អឹងទៅធ្វើបុណ្យតាមប្រពៃណី ។ រីឯរថយន្ត និងម៉ូតូត្រូវបានសមត្ថកិច្ចនគរបាលស្នងការខេត្តប៉ៃលិន យកទៅរក្សាទុកនៅការិយាល័យចរាចរស្នងការខេត្តរង់ចាំធ្វើការដោះស្រាយតាមនីតិវិធីច្បាប់ ៕
