ខេត្តកំពង់ធំ ៖ ក្រោយពីបណ្តាញព័ត៌មានក្នុងស្រុកជាច្រើនបានធ្វើការលាតត្រដាងរឿងអាស្រូវពុករលួយរបស់លោកហា ប៊ុនឡង ប្រធានការិយាល័យគណនេយ្យ និងលោកស្រីអតីតប្រធានមន្ទីរកិច្ចការនារីខេត្តកំពង់ធំស្តីពីការកឹបកេងថវិកាជាតិលើគ្រប់ជំពូកជាពិសេសនៅក្នុងឆ្នាំ២០១៣ និងឆ្នាំ២០១៤ បានធ្វើឲ្យលោកហា ប៊ុនឡង មានការភិតភ័យយ៉ាងខ្លាំង។
ព្រោះថារឿងអាស្រូវកឹបកេងថវិកាជាតិនេះគឺមានតែរូបលោកហា ប៊ុនឡង តែម្នាក់ប៊ុណ្ណោះដែលជាអ្នកទទួលខុសត្រូវធំ ដោយគាត់ជាអ្នកគ្រប់គ្រងលើការចំណាយចំណូលរបស់មន្ទីរ។ ទទ្ទឹមគ្នានោះលោកហា ប៊ុនឡង បានកើតការសង្ស័យទៅលើមន្ត្រីសំខាន់ៗមួយចំនួននៅក្នុងមន្ទីរថាជាអ្នកទំលាយការសម្ងាត់ឲ្យអ្នកការសែតចុះផ្សាយថាជាអ្នកកាច់កុងរូបគាត់ទៅវិញ។
តាមប្រភពបានឲ្យដឹងថានៅឆ្នាំ២០១៣មន្ទីរកិច្ចការនារីខេត្តកំពង់ធំបានចំណាយថវិកាជាតិមិនមែនកម្មវិធីសរុបអស់៣៦៧,៣៨៧,៩០០រៀល ប៉ុន្តែថវិកានៅតាមបណ្តាជំពូកនានាដូចជាជំពូក៦០,៦១,៦២ ត្រូវបានលោកហា ប៊ុនឡង កឹបកេងស្ទើរពាក់កណ្តាល។ ហើយចំណែកថវិកានៅជំពូក៦៥សម្រាប់ឧបត្ថម្ភសហគមន៍ដែលមានចំនួន៤៩,៩៨០,០០០លានរៀល ត្រូវបានលោកហា ប៊ុនឡង ស៊ីដាច់ទាំងស្រុងដែលថវិកានេះគឺជាថវិកាសម្រាប់ទិញអង្ករនិងសម្ភារៈជូនដលសហគមន៍ក្រីក្រ ប៉ុន្តែថវិកាទាំងនេះពុំបានធ្លាក់ដល់ដៃពលរដ្ឋក្នុងសហគមន៍មួយសេនទេ។
រហូតមកដល់ពេលនេះថវិកាជាង៤៩លានខាងលើត្រូវបានលោកហា ប៊ុនឡង ឃុបឃិតគ្នាចែកគ្នាស៊ីចាយអស់រយៈពេលជាមួយឆ្នាំតាំងពីសម័យលោកស្រីទូច ស៊ីថុល នៅជាប្រធានមន្ទីរ។ ក្រោយពីរឿងអាស្រូវនេះផ្ទុះឡើងលោកហា ប៊ុនឡង កំពង់ត្រៀមធ្វើរបាយការណ៍បំភ្លឺក្រសួងកិច្ចការនារី និងអជ្ញាធរខេត្តថាបណ្តាលមកពីក្រុមហ៊ុនរបស់លោកឧកញ៉ា ហេង សំណាង ប្រធានសភាពានិជ្ជកម្មខេត្តកំពង់ធំថាទទួលបានថវិការបស់មន្ទីរដែលបើកចេញពីរតនាគារជាងមួយឆ្នាំហើយ ប៉ុន្តែមិនផ្តល់អង្ករឲ្យមន្ទីរធ្វើឲ្យមន្ទីរគ្មានអង្ករចែកជូនសហគមន៍។
តាមប្រភពដដែលបានឲ្យដឹងថា មូលហេតុដែលលោកហា ប៊ុនឡង និយាយដូច្នេះគឺគ្មានអ្វីក្រៅពីការដោះបន្ទុករបស់គាត់ក្នុងសុំណុំរឿងពុករលួយខាងលើទេ ប៉ុន្តែបើយោងតាមនិតិវិធីហិរញ្ញវត្ថុរាល់ការទិញដូរសម្ភារៈ និងទំនិញផ្សេងៗភាគី អ្នកផ្គត់ផ្គង់មុននឹងភាគីអ្នកទិញស៊ីញ៉េឯកសារផ្តល់ជូនភាគីអ្នកផ្គត់ផ្គង់ឲ្យដក់សាច់ប្រាក់នៅរតនាគារបានលុះត្រាភាគីអ្នកផ្គត់ផ្គង់ប្រគល់ទំនិញសម្ភារៈដល់ភាគីអ្នកទិញរួចទំនិញរួចរាល់ទើបស៊ីញ៉េឯកសារទៅដក់សាច់ប្រាក់បាន។
ករណីនេះត្រូវបានគេសង្ស័យថាគឺជាការឃុបឃិតគ្នាដើម្បីដក់យកថវិកាជាតិមកស៊ីចាយ ហើយនៅពេលបែករឿងទើបរកលេសថាមកពីក្រុមហ៊ុនមិនផ្តល់ទំនិញសម្ភារៈឲ្យទៅវិញពិតជាគួឲ្យអស់សំណើចមែន។ តាមប្រភពបានបញ្ជាក់ថា ការនិយាយរបស់លោកហា ប៊ុនឡង គឺជាការឆ្លុះបញ្ជាំងដ៍ធំមួយ នៅខេត្តកំពង់ធំពាក់ព័ន្ធនឹងក្រុមហ៊ុនរបស់លោកឧកញ៉ា ហេង សំណាង ដែលតែងតែទទួលបានសិទ្ធិផ្គត់ផ្គង់សម្ភារៈឲ្យតាមបណ្តាមន្ទីរអង្គភាព ប៉ុន្តែ
ទំនិញខ្លះគេប្រគល់ជូនសាមីមន្ទីរអង្គភាព ឯទំនិញខ្លះមិនត្រូវបានគេផ្តល់ជូនទេ តែដោយគេផ្តល់ជូនប្រាក់ដែលក្រុមហ៊ុនរត់ការដកពីរតនាគារឲ្យទៅសាមីមន្ទីរអង្គភាពដែលត្រូវទទួលទំនិញនោះជំនួសវិញ។ ដើម្បីជាប្រយោជន៍របស់ក្រុមហ៊ុន និងប្រធានរួមនឹងមន្ត្រីសំខាន់នៅក្នុងមន្ទីរអង្គភាពទាំងនោះ ហើយរដ្ឋជាអ្នកខាតទៅវិញ។ បើនិយាយរឿងអាស្រូវពុករលួយរបស់មន្ទីរកិច្ចការនារីមកដល់ពេលនេះគេអង្កេតឃើញថា មិនមែនមានតែនៅខេត្តកំបង់ធំទេ ខេត្តពោធិសាត់ កំពង់ស្ពឺ និង ឧត្តមានជ័យ ក៍មានរឿងស្រដៀងគ្នានេះដែរ។
សូមរំលឹកថា នៅឆ្នាំ២០១៣មន្ទីរកិច្ចការនារីបានចំណាយថវិកាជាតិសរុបអស់៣៦៧,៣៨៧,៩០០រៀល ក្នុងនោះជំពូក៦០អស់ចំនួន៧១,០៨៥,៧០០រៀល ជំពូក៦១អស់២៦,២១០,០០០រៀល ជំពូក៦២អស់២៦,៣៦៨,២០០រៀល ជំពូក៦៤អស់១៩៣,៧៤៤,០០០រៀល ជំពូក៦៥អស់ចំនួន៤៩,៩៨០,០០០រៀល ។
សម្រាប់គម្រោងចំណាយឆ្នាំ២០១៤ ដែលមិនទាន់អនុវត្តន៍បញ្ចប់គឺមានថវិកាសរុប៤៩៩,០លានរៀល ក្នុងនោះជំពូក៦០ចំនួន៦៥,០លានរៀលជំពូក៦១ចំនួន៣០,០លានរៀល ជំពូក៦២ចំនួន៣២,០លានរៀល ជំពូក៦៤ចំនួន៣១៣,០លានរៀល ជំពូក៦៥ អស់៥៩,០លានរៀល ប៉ុន្តែថវិកាទាំងនេះឥឡូវនេះត្រូវបានគេចាយអស់មួយចំនួនធំទទ្ទឹមគ្នានោះក៍អង្កេត
ឃើញថាមានអំពើពុករលួយយ៉ាងធ្ងន់ធ្ងរ ដែលចាំបាចស្ថាប័នពាក់ព័ន្ធ ជាពិសេសក្រសួងកិច្ចការនារី និងអង្គភាពប្រឆាំងអំពើពុករលួយគួត្រួតពិនិត្យការចំណាយនានា នៅក្នុងមន្ទីរមួយនេះឲ្យបានស៊ីជម្រៅនិងជួបសម្ភាស៍គ្រប់មន្ត្រីធំតូចរួមនិងពលរដ្ឋដែលជាអ្នកទទួលផលប្រយោជន៍នៃការចំណាយខាងលើឲ្យបានដល់មូដ្ឋាន និងរកឃើញការពិតជាមិនខាន៕
