កំពង់ចាម៖ ករណីឃាតកម្ម ប្លន់ សម្លាប់ ស្ត្រីយកគ្រឿងអលង្កា កាលពីថ្ងៃទី២ ខែតុលា ឆ្នាំ២០១៤នោះ ត្រូវកម្លាំងអធិការនគរបាលស្រុកចំការលើ សហការជាមួយកម្លាំងប៉ុស្តិ៍នគរបាលរដ្ឋបាលឃុំជយោ ចុះស្រាវជ្រាវកន្លែងកើតហេតុ ចំណុចវាលស្រែច្រឡៃ ស្ថិតក្នុងភូមិជយោ ឃុំជយោ ស្រុកចំការលើ ខេត្តកំពង់ចាម វែកបង្ហាញមុខឃាតក បានយ៉ាងទាន់ហេតុការណ៍ នឹងឃាត់ខ្លួនជនសង្ស័យ បញ្ជូនទៅស្នងការដ្ឋាននគរបាលខេត្ត នៅថ្ងៃទី៤ ខែតុលា ឆ្នាំ២០១៤
ដើម្បីចាត់ការបន្ត ។
លោក វរៈសេនីយ៍ទោ ស្រេង ហ៊ីម នាយរងការិយាល័យព្រហ្មទណ្ឌកំរិតធ្ងន់បានឲ្យដឹងថា ករណីឃាតកម្មសម្លាប់ប្លន់យកគ្រឿងអលង្កានៅថ្ងៃកើតហេតុខាងលើ ត្រូវកម្លាំងប៉ូលីសស្រុក
ចំការលើចុះស្រាវជ្រាវវែកមុខសញ្ញាជនដៃដល់ ឈ្មោះ ចន ចាន់ឌី ភេទប្រុស អាយុ២៦ឆ្នាំ រស់នៅភូមិកើតហេតុ ដែលបានប្លន់សម្លាប់យកគ្រឿងអលង្កាប្លាកទីនរួមមាន ខ្សែកចំនួន១ខ្សែ ខ្សែដៃអង្កាំ១ខ្សែ ជញ្ជៀនវ៉ែនត្បូង២វង់ និងក្រវិលត្បូង១គូ ទៅលើស្ត្រីជនរងគ្រោះ ឈ្មោះ ឃីន បុល អាយុ៤០ឆ្នាំ រស់នៅភូមិកើតហេតុជាមួយគ្នា ។
លោក នាយរងការិយាល័យបានបញ្ជាក់ទៀតថា មុនបញ្ជូនជនសង្ស័យមកស្នងការនគរបាល
ខេត្ត នៅថ្ងៃទី៤ ខែតុលា ឆ្នាំ២០១៤ ជនសង្ស័យបានបោកក្បាលរបស់គេផ្ទប់ទៅនឹងជញ្ជាំងការិយាល័យនគរបាកស្រុកចំការលើ បណ្តាលឲ្យមានរបួសយ៉ាងដំណំ ។ ហើយនៅរសៀលថ្ងៃទី៥ ខែតុលា ឆ្នាំ២០១៤នេះ កម្លាំងជំនាញបានកសាងសំណុំរឿងបញ្ជូនឃាតកទៅតុលាការចាត់ការទៅតាមនិតិវិធី ៕
