រដ្ឋមន្ត្រីជាន់ខ្ពស់ អាម៉េរិក បាននិងកំពុងបំពេញ ទស្សនកិច្ចនៅក្នុង ទីក្រុងសេអ៊ូល និងបានជួប ពិភាក្សា ជាមួយនឹងភាគី កូរ៉េខាងត្បូង លើបញ្ហាកូរ៉េខាងជើង នៅថ្ងៃចន្ទនេះ បន្ទាប់ពីរដ្ឋមន្ត្រី ជាន់ខ្ពស់របស់ ប្រទេស កូរ៉េខាងជើង បានធ្វើទស្សនកិច្ចដ៏ភ្ញាក់ផ្អើល មួយមកកាន់កូរ៉េខាងត្បូង កាលពីថ្ងៃសៅរិ៍ សប្ដាហ៍មុននេះ ដើម្បីចូល អបអរសាទរ កីឡាករ របស់ខ្លួន ក្នុងកីឡាអាស៊ីហ្គេម។
សារព័ត៌មាន ស៊ិនហួ ចេញផ្សាយថ្ងៃទី០៦ ខែតុលា ឆ្នាំ២០១៤ នេះឲ្យដឹងថា ជំនួយការរដ្ឋមន្ត្រី ការពារ ជាតិ អាម៉េរិកលោក ដាញែល រ៉ូសែល និងជំនួយអនុលេខា ការពារជាតិលោក ដេវិត ស៊ៀ បានមកដល់ទីក្រុង សេអ៊ូល កាលពីថ្ងៃអាទិត្យម្សិលមិញ និងបានជួបជជែកពិភាក្សា នៅថ្ងៃចន្ទនេះ ជាមួយនឹង លោកអនុរដ្ឋមន្ត្រី ការបរទេស កូរ៉េខាងត្បូង សម្រាប់កិច្ចការងារ នយោបាយនៅឯទីស្នាក់ការ កណ្តាល ក្រសួងការបរទេសនា ទីក្រុង សេអ៊ូល។
ដំណើរទស្សនកិច្ចរបស់ជំនួយ ការរដ្ឋមន្ត្រីអាម៉េរិក បានចូលមកដល់ បន្ទាប់ពីលោកមេបញ្ជា យោធា ហ្វង ព្យុងសូ របស់ កូរ៉េខាងជើង បានធ្វើដំណើរទស្សនកិច្ចគួរឱ្យ ភ្ញាក់ផ្អើលមួយ កាលពីថ្ងៃសៅរ៍ សម្រាប់ពិធីបិទវគ្គកីឡា អាស៊ី របស់កូរ៉េខាងត្បូង រួមជាមួយនឹងលោក ចូ រ៉ុង ហេ និងលោក គឹម យ៉ាង ហ្គន លេខាធិការនៃគណៈកម្មាធិការ កណ្តាលរបស់បក្សពលករកូរ៉េ។
លោក រ៉ូសែល បានប្រាប់ក្រុមអ្នកយកព័ត៌មាន បន្ទាប់ពីកិច្ចប្រជុំថា សហរដ្ឋអាម៉េរិក បានគាំទ្រការខិតខំ ប្រឹងប្រែង របស់ កូរ៉េខាងត្បូង ដើម្បីពង្រឹង និងលើកកម្ពស់ការ ទំនាក់ទំនង រវាងអន្ដរកូរ៉េ ហើយក៏បានកត់សម្គាល់ ថា លោក បានជជែកជាមួយលោក លី អំពីដំណើរ ទស្សនកិច្ចរបស់លោក ហ្វង ក៏ដូចជា ទំនាក់ទំនងរវាងទីក្រុងសេអ៊ូល និង ទីក្រុងតូក្យូ ដែល ចាប់ផ្តើមមានការវិវឌ្ឍល្អឡើងវិញដែរនោះ។
