កំពង់ឆ្នាំង៖ យុវជនរងគ្រោះម្នាក់ត្រូវបានមិត្តភ័ក្ររបស់គេជាជនដៃដល់ កាប់ជាច្រើនពូ ថៅរងរបួស ធ្ងន់ ដេររហូតដល់៤១ថ្នេរហើយត្រូវបានគេដឹកបញ្ជូនមកកាន់មន្ទីពេទ្យខេត្ត ដើម្បីធ្វើការសង្គ្រោះជីវិតភ្លាមៗផងដែរ។ហេតុការណ៍នេះបានកើតឡើងនៅវេលាម៉ោង ១ និង១៥នាទីថ្ងៃទី០៧ ខែតុលា ឆ្នាំ២០១៤ នៅចំណុចមុខសាលាបុរីវិជ្ជា ស្ថិតក្នុងភូមិស្រែ ព្រីង សង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចនគរបាលព្រហ្មទណ្ឌក្រុងកំពង់ឆ្នាំងបានអោយដឹងថា៖ជនរងគ្រោះឈ្មោះ ហៃ គីមហាវ អាយុ២០ឆ្នាំ រស់នៅភូមិកំពង់បឹង ឃុំកំពង់ហាវ ស្រុកកំពង់លែង ជាសិស្សប្រឡងធ្លាក់សញ្ញាប័ត្រទុតិយភូមិឆ្នាំ២០១៤នេះ រីឯជនល្មើស ឈ្មោះ ហែម រិទ្ធី អាយុ២៣ឆ្នាំ រស់នៅក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង ជាជាងជួសជុលម៉ូតូ។
មុនពេលកើតហេតុ យុវជនរងគ្រោះបានសុំម្តាយធ្វើដំណើរមកយកសាល័កប័ត្រដើម្បី
ត្រៀមប្រឡងសញ្ញាប័ត្រទុតិយភូមិលើកទី២ តែនៅពេលមកដល់ក្រុងកំពង់ឆ្នាំង រូបគេបែរជាទៅជួបជាមួយមិត្រភ័ក្រ២ទៅ៣នាក់ដើម្បីផឹកស៊ី ដោយមានជនល្មើសនៅផឹក ជាមួយគ្នាផងដែរ។ក្រោយពីផឹកស៊ីបានមួយសន្ទុះ ក៍កើតមានរឿងរ៉ាវឈ្លោះប្រកែកគ្នា ហើយជនល្មើសបានទាញយកពូថៅមកកាប់លើជនរងគ្រោះជាច្រើនពូថៅ បណ្តាលអោយយុវជន ហៃ គឹមហាវ រងរបួសត្រង់ក្បាល ខ្នង និងដៃយ៉ាងធ្ងន់ធ្ងរ។
ក្រោយពេលកើតហេតុជនដៃដល់ ឈ្មោះ ហែម រិទ្ធី បានជិះម៉ូតូគេចខ្លួនពីកន្លែង កើតហេតុ
បាត់ស្រមោលតែម្តង ហើយសមត្ថកិច្ចកំពុងធ្វើការតាមស្វែងរកចាប់ខ្លួនជន ល្មើសខាងលើមកផ្តន្ទាទោសទៅតាមផ្លូវច្បាប់។ដោយឡែកជនរងគ្រោះ ត្រូវបានមិត្តភ័ក្រ ដឹកបញ្ជូនតាមម៉ូតូមកធ្វើការសង្គ្រោះបន្ទាន់ភ្លាមៗ ដែលនៅក្នុងបន្ទប់សង្គ្រោះបន្ទាន់គេ ឃើញក្រុមគ្រូពេទ្យកំពុងជួយ
ជនរងគ្រោះយ៉ាងយកចិត្តទុកដាក់ រហូតជនរងគ្រោះឆ្លងផុត ពីគ្រោះថ្នាក់។
ក្រោយពេលសង្គ្រោះរួចលោកវេជ្ជបណ្ឌិតបានប្រាប់អោយដឹងថា៖ជនរងគ្រោះបានគ្រូពេទ្យដេរចំនួន ៤១ថ្នេរ គឺខ្នង២ថ្នេរ,ដៃស្តាំ១៨ថ្នេរ,ដៃឆ្វេង៧ថ្នេរ និងក្បាល១៤ថ្នេរ គឺរូបគេមានរបួសយា់ងធ្ងន់ធ្ងរ៕
កំពង់ឆ្នាំង
