បន្ទាយមានជ័យ៖ យុវជនជាជនជាតិដើមភាគតិច ជាតួអង្គនៃការផ្លាស់ប្តូរដើម្បីសិទ្ធិស្វ័យសម្រេច ៩សីហា ២០២៣។ នេះគឺជាប្រសាសន៍លើកឡើងរបស់លោក លី សុវណ្ណារិទ្ធ អភិបាលរងខេត្តបន្ទាយមានជ័យ បានថ្លែងក្នុងពិធីអបអរសាទរទិវាអន្តរជាតិជនជាតិដើមភាគតិចពិភពលោកលើកទី២៩ និង 
ទី១៩ នៃកម្មវិធីដែលបានរៀបចំឡើង នៅភូមិជ្រាប់ចាស់ និងភូមិជ្រាប់ថ្មី ក្នុងឃុំជប់វារី ស្រុកព្រះនេត្រព្រះ ខេត្តបន្ទាយមានជ័យដែលមានជនជាតិដើមភាគតិចមួយក្រុម គឺជាជនតិចកួយរស់នៅ។
លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យបានមានប្រសាសន៍លើកឡើងថារាជរដ្ឋាភិបាលកម្ពុជាតាម ដឹកនាំប្រកបដោយគតិបណ្ឌិតរបស់សម្ដេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងយកចិត្តទុកដាក់និងលើកកម្ពស់សិទ្ធិជនជាតិដើមភាគតិច ដែលផ្តល់ឱកាសនិងទទួលស្គាល់សិទ្ធិជនជាតិដើមភាគតិច ក្នុងការបញ្ចេញមតិយោបល់របស់ខ្លួន គឺគោលបំណងចូលរួមយ៉ាងសកម្មទៅ ក្នុងការអភិវឌ្ឍប្រទេសជាតិ។នៅក្នុងភូមិ ជ្រាប់ថ្មី មានចំនួន១៩៨គ្រួសារ មនុស្សរាយចំនួន៧៦៥នាក់ ស្ត្រីចំនួន៤០០នាក់ និងភូមិ ជ្រាប់ចាស់ មានចំនួន ២២៥គ្រួសារសរុបទាំងពីរភូមិមាន ចំនួន៤២៨គ្រួសារ ដែលពួកគាត់ភាគច្រើនប្រកបរបរកសិកម្មធ្វើស្រែចម្ការ។
លោកស្រី សោមសុម៉ាលី ដែលជាអនុប្រធាននាយកដ្ឋានអភិវឌ្ឍន៍ជនជាតិដើមភាគតិចនៃក្រសួងអភិវឌ្ឍន៍ជនបទនិងលោកលីសុវណ្ណារិទ្ធអភិបាលរងខេត្តបានមានប្រសាសន៍ថា ក្នុងឆ្នាំ២០២៣នេះ អង្គការសហប្រជាជាតិបានលើកយកប្រធានបទរួមមួយ គឺយុវជនជនជាតិដើមភាគតិចតិចជាតួអង្គនៃការផ្លាស់ប្តូរដើម្បីសិទ្ធិស្វ័យសម្រេច ប្រធានបទនេះពិតជាមានសារសំខាន់ណាស់ក្នុងការចូលរួមចំណែកអភិរក្សវប្បធម៌ប្រពៃណីទំនៀមទម្លាប់ និងភាសាដ៏ផូរផង់របស់បងប្អូនជនជាតិដើមភាគតិច ធានាដោយច្បាប់ជាតិនិងគោលនយោបាយជាតិនានា តាមរយៈការប្ដេជ្ញាចិត្តរបស់រាជរដ្ឋាភិបាលកម្ពុជា បានផ្តល់ឱកាសនិងលើកកម្ពស់សិទ្ធិសេរីភាពសេដ្ឋកិច្ចសង្គមនិងវប្បធម៌និងការបញ្ចេញមតិយោបល់ដើម្បីការអភិវឌ្ឍលើគ្រប់វិស័យតាមរយៈគម្រោងអភិវឌ្ឍន៍នានា។
ចុងក្រោយ លោក លី សុវណ្ណារិទ្ធិ លោកបានមានប្រសាសន៍សំណូមពរមួយចំនួនទៅកាន់ពុកម៉ែបងប្អូនដែលជាជនជាតិដើមភាគតិចសុំឲ្យចូលរួមអនុវត្តនូវសិទ្ធិរបស់ខ្លួននិងមានមោទកភាពចំពោះខ្លួនឯង ដែលជាជនជាតិដើមភាគតិចកួយ បន្តជំរុញកូនចៅឲ្យទទួលនូវការអប់រំនិងរៀនសូត្រពេញមួយជីវិត ដើម្បីឲ្យពួកគេជាអ្នកបន្តវេនប្រកបដោយប្រសិទ្ធភាព នាពេលអនាគតស្របទៅនឹងប្រធានបទនៃទិវាឆ្នាំនេះ បន្តបង្រៀនកូនចៅពីចំណេះដឹងជនជាតិដើមភាគតិចដើម្បីនិរន្តរភាពនៃចំណេះដឹងរបស់ដូនតា៕ដោយ៖ឃិន គន្ធា
