ភ្នំពេញ ៖ រថយន្តហាយឡែនឌ័រ កែច្នៃសំរាប់ដឹកសម្ភារៈមួយគ្រឿង ពណ៌ទឹកប្រាក់អត់ស្លាកលេខបានបើកជ្រុលទៅបុកផ្ទាំងប៉ាណូ របស់យានដ្ឋាន ABS លាងរថយន្តហើយបានបើកបន្ថែមល្បឿនយក រថយន្តទៅប្លុងចោលនៅក្បែរផ្ទះប្រជាពលរដ្ឋ រួចឡើងជិះរថយន្តមួយគ្រឿងទៀតជិះគេចខ្លួនតែម្តង ។
ហេតុការណ៍នេះកើតឡើងកាលពីវេលាម៉ោង ១១ និង ២០នាទី យប់ ថ្ងៃទី០៨ ខែតុលា ឆ្នាំ២០១៤ នៅចំណុចមុខយានដ្ឋាន ABS លាងរថយន្ត តាមផ្លូវ៥៩៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
ប្រភពព័ត៌មាននៅកន្លែងកើតហេតុបានឱ្យដឹងថានៅមុនពេលកើតហេតុគេឃើញបុរសម្នាក់ ទំនងជាស្រវឹងស្រាបានបើករថយន្តហាយឡែនឌ័រកែច្នៃសំរាប់កែច្នៃដឹកសម្ភារៈ មួយគ្រឿង ពណ៌ទឹកប្រាក់ អត់មានពាក់ស្លាកលេខ បានធ្វើដំណើររេពេញផ្លូវ ៥៩៨ ក្នុងទិសដៅពីជើងទៅត្បូង មកដល់ចំណុច កើតហេតុរថយន្តបានរ៉េចង្កូតទៅបុកផ្ទាំងប៉ាណូ របស់យានដ្ឋាន ABS លាងរថយន្ត បណ្តាលឱ្យរងការខូចខាតយ៉ាងដំណំ ។ បន្ទាប់ពីបុកយានដ្ឋាន ABS លាងរថយន្តហើយនោះអ្នកបើករថយន្តបានបន្ថែមល្បឿនបើកទៅមុខបានប្រហែល២០ម៉ែត្រ ក៏បានឈប់រថយន្តប្លុងចោលក្បែរផ្ទះប្រជាពលរដ្ឋរួចឡើងជិះរថយន្តរបស់មិត្តភក្តិគេចខ្លួនតែម្តង ។
ក្រោយពេលកើតហេតុសមត្ថកិច្ចបាននាំយករថយន្តខាងលើទៅកាន់អធិការដ្ឋានខណ្ឌសែនសុខ រក្សាទុកដើម្បីស្រាវជ្រាវរកម្ចាស់រថយន្តបង្កខាងលើ៕
