ព្រះវិហារៈរ៉ែមាសដែលជាធនធានដ៍មានតំលៃមហាសាលនៅតំបន់ភ្នំអន្លង់ ស្ថិតនៅក្នុងឃុំរមទម ស្រុករវៀង ខេត្តព្រះវិហារកំពុងរងនូវការបំផ្លិចបំផ្លាញយ៉ាងធ្ងន់ធរពីសំណាក់ក្រុមឈ្មួញ និងអ្នកមានអំណាចឃុបឃិតគ្នាជួលដីនៅតំបន់នោះឲ្យទៅក្រុមហ៊ុនធ្វើអាជីវកម្មដោយបានលុយពីការជួលដីនោះក្នុង១ខែមិនក្រោម២០ម៉ឺនដុល្លារទេ
នេះចំពោះតែក្រុមហ៊ុន១តែប៉ុណ្ណោះ នៅមានក្រុមហ៊ុនជាច្រើនទៀតដែលត្រូវបានអ្នកមានអំណាចឃុបឃិតគ្នាយកដីភ្នំរបស់រដ្ឋជួលយកលុយខ្លួនឯង ។ កាលពីព្រឹកថ្ងៃទី០៩ ខែតុលា ឆ្នាំ២០១៤ក្រុមចម្រុះដឹកនាំដោយលោក គង់ មករា ប្រធានមន្ទីររ៉ែ និងថាមពលខេត្តព្រះវិហារ និងលោក ឯ សារ៉ូ អភិបាលស្រុករវៀងបានចុះទៅចាប់ក្រុមហ៊ុនដែលកំពុងធ្វើអាជីវកម្មរ៉ែមាសខុសច្បាប់ តែពួកក្រុមហ៊ុនទាំងនោះបានដឹងជាមុននាំគ្នាដកគ្រឿងចក្ររត់បាត់ស្រមោល ។
ហើយនៅរសៀលថ្ងៃដដែលមានទូរស័ព្ទជនអាណាមិកម្នាក់គ្មានលេខបានខលមកសុំឲ្យជួយចុះផ្សាយអំពីករណីដែលក្រុមអ្នកមានអំណាចឃុបឃិតគ្នាយកដីរដ្ឋនៅតំបន់ភ្នំអន្លង់ជួលទៅឲ្យក្រុមហ៊ុនផ្សេងធ្វើអាជីវកម្មរ៉ែមាសមានមេក្លោងចំនួន៣នាក់ ទី១ឈ្មោះ តា ម៉េង ជាអាណិតជនមកពីអាមេរិក ទី២ឈ្មោះ ធុយ សាខឿន ជានាយករងសាលាស្រុករវៀង ទី៣
ឈ្មោះ ប៊ុន វណ្ណថន ជាអ្នករៀបចំ ចំណែកអ្នករត់ការឈ្មោះ ប៊ូ ម៉ៅ រឿងរ៉ាវខាងលើដោយសារការជួលដីរដ្ឋមកធ្វើអាជីវកម្មទទួលបានផលប្រយោជន៍មិនស្មើគ្នា ដីនៅតំបន់ភ្នំអន្លង់ត្រូវបានរាជរដ្ឋាភិបាលក៍ដូចអតីតក្រសួងឧស្សាហកម្ម រ៉ែ និងថាមពលបានចេញអាជ្ញាប័ណ្ណទៅឲ្យក្រុមហ៊ុនC.W.Sក្នុងការរុករករ៉ែ នឹងស្រាវជ្រាវរ៉ែមាស និងរ៉ែផ្សេងៗទៀត តែដីនៅតំបន់នោះត្រូវបានឈ្មួញធំៗនឹងមានអំណាចព័ទ្ធចាប់យកទាំងភ្នំមកធ្វើកម្មសិទ្ធិ ហើយក្រុមហ៊ុនC.W.Sបានជួលដីនេះទៅឲ្យក្រុមហ៊ុនផ្សេងៗទៀតធ្វើអាជីវកម្មខុសច្បាប់ ក្រុមហ៊ុនខ្លះរហូតដល់ដាក់រំសេវបំផ្ទុះថ្មភ្នំទៀតផង ។
ករណីបែករឿងរ៉ាវខាងលើនេះដោយសារថាមានក្រុមហ៊ុនចិន១បានជួលដីពីក្រុមហ៊ុនC.W.S ក្នុង១ប្លុក ៩ម៉ឺនដុល្លារ ចំនួន២ខែស្នើនឹង១៨ម៉ឺនដុល្លារ ក្នុងនោះម្ចាស់ដីទទួលបាន៣ម៉ឺនដុល្លារ អ្នករត់ការឈ្មោះ ប៉ូ ម៉ៅ បាន៣ម៉ឺនដុល្លារ ចំណែកក្រុមហ៊ុននៅសល់១២ម៉ឺនដុល្លារ ហើយអ្នករៀបចំគម្រោងជួលដីខាងលើទី១ឈ្មោះ តាម៉េង ជាអានិកជនមកពីអាមេរិកទី២ឈ្មោះ ធុយ សុខខឿន ជានាយករងសាលាស្រុករវៀង និងទី៣ឈ្មោះ ប៊ុន វណ្ណថន អតីតជាឈ្មួញចាប់យកដីភ្នំចំនួន១៧ហិកតាលក់ទៅឲ្យអ្នកផ្សេង នៅមានក្រុមហ៊ុនជាច្រើនទៀតដែលមានរឿងរ៉ាវដូចគ្នានេះដែរ ។
ករណីជួល ព័ទ្ធ ធ្វើអាជីវកម្មរ៉ែមាសខុសច្បាប់ បានលុយរាប់សិបម៉ឺនដុល្លារក្នុង១ខែៗ តើលុយទាំងអស់នេះបានបង់ចូលថវិការរដ្ឋដែរឬទេ ហើយទង្វើរបស់ពួកគេតើថ្នាក់លើដឹងដែរឬទេ ? សូមបញ្ជាក់ផងដែរថា ដីព្រៃភ្នំនៅតំបន់ភ្នំបាក់ និងភ្នំអន្លុង ត្រូវបានក្រុមឈ្មួញធ្វើអាជីវកម្មប្រើសុទ្ធតែគ្រឿងចក្រ និងរំសែវផ្ទុះ បើសិនមិនមានចំណាត់ការបែបណានោះទេនៅពេលខាងមុខភ្នំបាក់ និងភ្នំអន្លុងនឹងរលាយបាត់ពីផែនទី ។
ករណីប្រព្រឹត្ត ឃុបឃិតគ្នាខាងលើស្ថាប័នប្រឆាំងអំពើពុករលួយគួរមានវិធានការដែរឬទេចំពោះអ្នកដែលពាក់ព័ន្ធ ។ ចំណែកឈ្មោះមេក្លោងទាំង៣នាក់ខាងលើមិនអាចសុំការបកស្រាយបំភ្លឺបានទេកាលពីរសៀលថ្ងៃទី០៩តុលានេះ ៕ ដោយ ឈឿង ចាន់
