ខេត្តកំពង់ស្ពឺ ៖ មុខសញ្ញាជួញដូរ និងប្រើប្រាស់គ្រឿងញៀនចំនួន ២ នាក់ ត្រូវបានសមត្ថកិច្ចស្រុកឧដុង្គ ធ្វើការឃាត់ខ្លួនរួចបញ្ជួនមកកាន់ ការិយាល័យប៉ូលិសប្រឆាំងការជួញដួរគ្រឿងខេត្តកំពង់ស្ពឺ ប៉ុន្តែក្រុមមន្ត្រីហាក់មានការលាក់លៀមព័ត៌មាននេះមិនផ្តល់ឱ្យអ្នកសារព័ត៌មាន ។
ប្រភព័ត៌មាន បានបង្ហើបប្រាប់ឱ្យដឹងថា ករណីបង្ក្រាបជនជាមុខសញ្ញាជួញដូរគ្រឿងញៀន បានកើតមានឡើង កាលពីវេលាម៉ោង ២១ និង ៣៥ នាទីយប ថ្ងៃទី០៧ ខែតុលា ឆ្នាំ២០១៤ លើផ្លូវជាតិលេខ៥ ត្រង់ចំណុចភូមិអូរការ៉ុង ឃុំវាំងចាស់ ស្រុកឧដុង្គ ខេត្តកំពង់ស្ពឺ រហូតដល់ព្រឹកថ្ងៃទី០៩ ខែតុលានេះ មិនទាន់បញ្ជូនទៅកាន់សាលាដំបួងខេត្ត ដើម្បីចាត់ការតាមនិតិវិធីច្បាបើនៅឡើយទេ ។
ចំពោះករណីគ្រឿងញៀនភាគច្រើន សមត្ថកិច្ចប៉ូលិស តែងតែលាក់បាំងព័ត៌មានញឹកញាប់បំផុត ប៉ុន្តែក្រោយមកជនសង្ស័យជាប់គុកមិនដែលបានយូទេ ត្រូវដោះលេងនៅក្រៅឃុំវិញយ៉ាងរំភើយ ។ ប្រភពបន្តថា ជនសង្ស័យដែល ត្រូវប៉ូលិសចាប់ខ្លួននោះ ទី១ឈ្មោះឈុន ធី ភេទប្រុស អាយុ ៤៣ ឆ្នាំមានទីលំនៅភូមិតាអក ឃុំតានី ស្រុកកំពង់ត្រឡាច ខេត្តកំពង់ឆ្នាំង និងទី២ឈ្មោះម៉ាន់ សាលីន ភេទប្រុស អាយុ៣១ឆ្នាំ នៅភូមិព្រៃប្រឺស ឃុំច្រេស ស្រុកកំពង់ត្រឡាច ។
ប្រភពបានបញ្ជាក់ថា បន្ទាប់ពីឃាត់ខ្លួនជងសង្ស័យ សមត្ថកិច្ចស្រុកឧដុង្គចែករកឃើញមានថ្នាំញៀនប្រភេទម៉ាទឹកកក ចំនួន៦កញ្ចប់ និងសម្ភារៈ សម្រាប់ជក់ ថង់ស្លាក់ស្ទិចតូចៗ ដែលពួកគេទុកសម្រាប់ច្រកថ្នាំញៀនលក់ផងដែរ ។
សមត្ថកិច្ចនិយាយថា មុនពេលកើតហេតុកំលាំងប៉ុស្តិរដ្ឋបាលឃុំវាំងចាស់បានចេញល្បាតតាមគោលដៅ សំខានក្នុងភូមិសាស្ត្រ ដែលខ្លួនគ្រប់គ្រង ដើម្បីការពារសុវត្ថិភាព សណ្តាប់ធ្នាប់ជួនប្រជាពលរដ្ឋ តាមគោលនយោបានភូមិ-ឃុំមានសុវត្ថិភាពរបស់ប្រមុខដឹកនាំរាជរដ្ឋាភិបាល ហើយពេលនោះក៍ប្រទះឃើញបុរសចំនួន២នាក់ធ្វើដំណើរតាមផ្លូវជាតិលេខ៥ ក្នុងភូមិអូរការ៉ុង ឃុំវាំងចាស់មានការសង្ស័យ បានឃាត់ខ្លួនដើម្បីសួរនាំ និងចែកឆែឃើញុមានថ្នាំញៀនជាប់ខ្លួនមួយចំនួនតែម្តង ។ ប្រភពបន្តថាបន្ទាប់ពីចាប់ខ្លួនកំលាំងជំនាញបានបំពេញសំណុំរឿងបញ្ជូនទៅការិយាល័យប៉ូលិសគ្រឿងញៀនខេត្តកំពង់ស្ពឺ តាមនិតិវិធីផងដែរ ។
សូមបញ្ជាក់ថា ប៉ូលិសប្រឆាំងការជួញដូរគ្រឿងញៀន ខេត្តកំពង់ស្ពឺ ហាក់ចង់លាក់បាំងមុខសញ្ញាជួញដូរ និងប្រើប្រាស់សារធាតុញៀនទាំង២នាក់ មិនផ្តល់ព័ត៌មានច្បាស់លាស់ដល់អ្នកសារព័ត៌មានទេ មិនដឹងថាមូលហេតុអីត្រូវបិតបាំងនោះឡើយ ហើយជនសង្ស័យមិនទាន់បញ្ជូនទៅកាន់តុលាកាគិតត្រឹមម៉ោង១១ ថ្ងៃត្រង់ថ្ងៃទី០៩ ខែតុលានេះ ។ រាល់ករណីពាក់ព័ន្ធរឿងគ្រឿងញៀនពួកគេតែងតែព្យាយាមលាក់បាំងបែបនេះជាញឹកញាប់ណាស់ ៕
