សៀមរាប : ជនសង្ស័យភេទប្រុសចំនួន៨នាក់និងនារីវ័យក្មេងម្នាក់នេះសរុបចំនួន៩នាក់រស់នៅក្នុងក្រុងសៀមរាប ត្រូវបានសមត្ថកិច្ចចាប់ឃាត់ខ្លួនយកមកកាន់ការិយាល័យជំនាញដើម្បីធ្វើការសួនាំជាប់ពាក់ព័ន្ធក្នុងករណីប្រើប្រាស់សម្រួលអោយប្រើប្រាស់ និង ជួញដូរគ្រឿងញៀនខុសច្បាប់។លោកវរសេនីយ៍ទោ អ៊ុំ សាអាត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានឲ្យដឹងថាកាលពីថ្ងៃទី០៩ខែតុលាឆ្នាំ២០១៤កន្លងទៅកម្លាំងការិយាល័យប្រឆាំងគ្រឿងញៀនបានសហការណ៍ជាមួយកម្លាំងប៉ុស្តិ៍នគរបាលរដ្ឋបាលសង្កាត់ស្លក្រាម សង្កាត់ជ្រាវ និង សង្កាត់ សាលាកំរើក ក្រុងមរាបបានធ្វើការតាមដានស្រាវជ្រាវនិងកំណត់មុខសញ្ញាបានទើបនៅថ្ងៃខែកើតហេតុខាងលើ
សមត្ថកិច្ចបានធ្វើការចាប់ឃាត់ខ្លួនជនសង្ស័យទាំង៩នាក់នេះបានជាបន្តបន្ទាប់ព្រមទាំងវត្ថុតាងរួមមានថ្នាំញៀនប្រភេទម៉ាទឹកកក ចំនួន ១៧ កញ្ចប់តូច ឩបករណ៍ច្នៃជក់រឿងញៀនខុសច្បាប់មួយចំនួនទៀតផងដែរ ។ លោកវរសេនីយ៍ទោ អ៊ុំ សាអាត បានបន្តឲ្យដឹងទៀតថាដោយអនុវត្តជាប្រចាំតាមការយកចិត្តទុកដាក់ខ្ពស់ពីសំណាក់លោក ឩត្តមសេនីយ៍ទោ សត ណាឌីស្នងការនគរបាលខេត្តសៀមរាបក៏ដូចជាដើម្បីធ្វើឲ្យការអនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពខ្ពស់ ។
ជាក់ស្តែងជនសង្ស័យទាំង៩នាក់នេះមិនអាចរត់គេចឫបន្លំភ្នែកសមត្ថកិច្ចជំនាញបានឡើយ ក៏ដូចជា បន្ទាប់ពីសមត្ថកិច្ចជំនាញបានធ្វើការចាប់ឃាត់ខ្លួនជនសង្ស័យនិងធ្វើការដកហូតបាននូវវត្ថុតាងទាំងអស់នេះហើយនោះនៅមុខសមត្ថកិច្ចជនសង្ស័យបានឆ្លើយសារភាពថាពួកគេពិតជាបានប្រព្រត្តឹនៅករណីខាងលើពិតប្រាកដមែន។បច្ចុប្បន្នជនសង្ស័យនិងវត្ថុតាងត្រូវបានសមត្ថកិច្ចកសាងសុំណុំរឿងបញ្ជូនទៅកាន់សាលាដំបូងខេត្តសៀមរាបហើយកាលពីថ្ងៃទី១០ខែតុលាឆ្នាំ២០១៤នេះដើម្បីចំណាត់ការទៅតាមផ្លូវច្បាប់បន្ត ៕
ដោយ ខេង ខេមរា
