កំពង់ធំ៖ នៅរសៀលថ្ងៃទី២៥ ខែតុលា ឆ្នាំ២០២៣
ឯកឧត្តម ងួន រាសី អភិបាលរងខេត្តកំពង់ធំបានឱ្យដឹងថា ការបង្កើនលទ្ធភាពក្នុងការនាំចេញគ្រាប់ស្វាយចន្ទីកែច្នៃ ពីសំណាក់សិប្បកម្មកែច្នៃស្វាយចន្ទីជ័យសំបូរនេះ គឺដើរស្របតាមគោលនយោបាយជាតិ ស្តីពីស្វាយចន្ទីដើម្បីបង្កើនការដាំដុះ និងនាំចេញផលិតផលគ្រាប់ស្វាយចន្ទី ទៅកាន់ទីផ្សារអន្តរជាតិឱ្យ
កាន់តែច្រើន ដែលក្រសួងពាណិជ្ជកម្ម ក៏ជារាជរដ្ឋាភិបាលកម្ពុជាដឹកនាំដោយសម្តេចធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា។
ការលើកឡើងនេះនាឱកាសឯកឧត្តមអភិបាលរងខេត្តកំពង់ធំ អមដំណើលោកជំទាវ គង់ សិទ្ធិកា អនុរដ្ឋលេខាធិការ ក្រសួងពាណិជ្ជកម្ម អញ្ជើញទស្សនៈកិច្ចសិប្បកម្មកែច្នៃគ្រាប់ស្វាយចន្ទីជ័យសំបូរ ស្រុកប្រាសាទសំបូរ ខេត្តកំពង់ធំ ។
ឯកឧត្តមអភិបាលរងខេត្តកំពង់ធំ បានបន្តថាបច្ចុប្បន្នសេចក្តីព្រាងច្បាប់នៃគោលនយោបាយជាតិ ស្តីពីស្វាយចន្ទីនេះ បានដល់ដំណាក់កាលចុងក្រោយហើយ ដែលយើងត្រូវបញ្ជូលធាតុចូលសំខាន់មួយចំនួនពីក្រសួង-ស្ថាប័ន និងគ្រប់ពីតួអង្គពាក់ព័ន្ធ ជាពិសេសពីសំណាក់អ្នកដាំដុះ អ្នកកែច្នៃ អ្នកនាំចេញ ដើម្បីឱ្យគោលនយោបាយនេះដើរដោយរលូត មានប្រសិទ្ធភាព ប្រកបដោយនិរន្តរ៍ភាព។
លោកស្រី អ៊ិន ឡៃហួត ម្ចាស់សិប្បកម្មកែច្នៃគ្រាប់ស្វាយចន្ទីជ័យសំបូរ មានទីតាំងក្នុងភូមិអារក្ស ឃុំជ័យ ស្រុកកំពង់ស្វាយ ខេត្តកំពង់ធំ បានឱ្យដឹងថាសិប្បកម្មផ្តើមដំណើរការតាំងពីឆ្នាំ២០២០ ដោយផ្តើមចេញពីការប្រកបអាជីវកម្មជាលក្ខណៈគ្រួសារប៉ុណ្ណោះ ប៉ុន្តែរហូតមកដល់ពេល នេះបានចុះបញ្ជីដំណើរការនាំចេញរយៈពេលជិត០៤ឆ្នាំហើយ។
លោកស្រីបន្តថា ខ្សែចង្វាក់ក្នុងការផលិតរបស់សិប្បកម្មមានសមត្ថភាពក្នុងការផលិត គ្រាប់ស្វាយចន្ទីបានចំនួន ២តោនក្នុងមួយថ្ងៃ នៃផលិត ផលវត្ថុធាតុដើមមិនទាន់កែច្នៃ។ ផលិតផលសម្រេចរបស់សិប្បកម្មបាននាំចេញទៅលក់ នៅទីផ្សារទំនើបជាច្រើនទូទាំងប្រទេសកម្ពុជា និងបាននាំចេញទៅកាន់ទីផ្សារ និងបង្កើនការនាំចេញទៅកាន់ទីផ្សារអឺរ៉ុប សហរដ្ឋអាមេរិក កាណាដា ចិន និងអូស្រ្តាលីផងដែរ។ អត្ថបទលោក ធូ កែវមុន្នី
