កំពង់ឆ្នាំង៖មានការភ្ញាក់ផ្អើលមិនដែលកើតមានមួយពិបាកនឹងជឿបើមិនបានឃើញផ្ទាល់ភ្នែកគឺស្ត្រីម្នាក់មានកូន៥ទៅហើយ តែលើកក្រោយនេះអត់មានផ្ទៃពោះសោះ បែជាកើតកូនចម្លែក៣ដងគឺកូនទី១ជាពងមួយគ្រប់ ចំណែ កពេលកើតកូនទី២និងទី៣ គឺជាចិញ្ចៀនក្រហម២វង់ទៅវិញ។ ហេតុការណ៍កើតកូនទី២និងទី៣ដ៏ចម្លែកនេះបានភ្ញាក់ផ្អើលនិងបានកើតឡើងនៅព្រឹកថ្ងៃទី០៩ ខែតុលា ឆ្នាំ២០១៤នៅក្នុងផ្ទះជាឃ្លាំងទុកឥវ៉ាន់មួយ នៅក្នុងវត្តព្រះឥន្ទកោសី ហៅវត្តដំរីកូន ស្ថិតនៅក្នុងភូមិព្រៃព្រាល ឃុំអញ្ចាញរូង ស្រុកបរិបូរណ៌ ខេត្តកំពង់ឆ្នាំង។
លោក នូ ចាន់ ជាភ្នាក់ងារយកព័ត៌មានម្នាក់នៅក្នុងស្រុកបរិបូរណ៌ ដែលបានទៅថតផ្តិតយករូបភាពផ្ទាល់ក្រោយពេលមានការភ្ញាក់ផ្អើលនូវរឿងខាងលើនេះ នៅព្រឹកថ្ងៃទី០៩ ខែតុលា ឆ្នាំ២០១៤បានអោយដឹងថា៖ស្ត្រីកើកកូនចម្លែកខាងលើនេះមានឈ្មោះ ជា អ៊ីត អាយុ៤២ឆ្នាំ មានកូន៥នាក់ ប្រុស៣ ស្រី២ និងមានប្តីឈ្មោះ ប៊ូ រុន អាយុ៥២ឆ្នាំ ជាកសិកររស់នៅក្នុងភូមិព្រៃព្រាល ឃុំអញ្ចាញរូង ស្រុកបរិបូរណ៌។
នៅមុខលោកយាយចាស់ក្នុងវត្តព្រះឥន្ទកោសី នាព្រឹកថ្ងៃទី០៩ ខែតុលានេះ ស្ត្រីកើតកូនចម្លែកបាននិយាយអោយដឹងថា៖កាលពី៣ខែមុនគាត់មិនមានផ្ទៃពោះទេ ពេលគាត់កំពុងដើររើសលាមកគោ ក្របី នៅក្រោយផ្ទះស្រាប់តែឈឺពោះយ៉ាងខ្លាំង ហើយក៏បានកើតកូនជាពងមួយតាមទ្វារមាសរបស់នាង បន្ទាប់មកនាងក៏បានលាក់រឿងនេះមិនអោយប្តីឬកូនដឹងឡើយ ហើយក៏បានលាក់ពង១គ្រាប់នេះក្នុងចានស្រាក់មួយព្យួរចោលនៅក្នុងផ្ទះ។
នៅថ្ងៃទី០៨ ខែតុលា ជាថ្ងៃសីលមុននេះ កូនរបស់នាងបានរើចានស្រាក់ដាក់បាយនិងម្ហូបទៅវត្ត ក៏បានធ្វើអោយពងនោះជ្រុកមកលើក្តារផ្ទះ តែពងនោះអត់បែកទេ ហើយកូនក៏បានសួរនាងថា តើពងនេះរបស់អ្នកណា នាងបានឆ្លើយថាជាពងរបស់ម៉ែ។បន្ទាប់មកនាងត្រូវបានរូបចូលសណ្ឋិតយំស្រែកដោយនិយាយជាភាសាស្តេចប្រាប់ប្តីថា ត្រូវជូនមាតា( រូបនាង)ទៅវត្តព្រះឥន្ទកោសីនៅក្នុងភូមិ ពេលនោះប្តីបានយកម៉ូតូមកប្រុងឌុបទៅ តែនាងប្រាប់ថាទៅយកក្លោះ( ឆ័ត្រ )មកដង្ហែទើបមាតាយាងទៅ។
ពេលនោះចាស់ៗក្នុងភូមិក៏បានយកឆ័ត្រមកបាំងអោយនាងនិងដង្ហែរូបនាងមកនៅក្នុងផ្ទះជាឃ្លាំងទុកដាក់វ៉ាន់មួយក្នុងវត្តព្រះឥន្ទកោសី។ស្រាប់តែនៅវេលាម៉ោង៣រសៀលនាងបានឈឺពោះហើយបានកើតកូនជាចិញ្ចៀន១វង់ និងនៅព្រឹកថ្ងៃទី០៩ ខែតុលានេះ នាងបានឈឺពោះម្តងទៀតកើតបានចិញ្ចៀន១វង់ទៀត នៅមុខចាស់ក្នុងវត្តដែលដូចជាមិនគួរអោយជឿឡើយ។
ស្ត្រីឈ្មោះ ហ៊ុំ ជន អាយុ៤១ឆ្នាំ ជាអ្នកបំរើព្រះសង្ឃរស់ក្នុងវត្តព្រះឥន្ទកោសី បាននិយាយអោយអ្នកយកព័ត៌មានយើងដឹងថា៖រឿងដែលគាត់បានឃើញនិងមិនគួរអោយជឿនោះគឺ ពេលស្ត្រីកើតកូនចម្លែកនោះឈឺពោះសំរាលកូនគឺស្រាប់តែពោះនាងឡើងធំភ្លាមៗ ហើយក្រោយពេលនាងសំរាលបានចិញ្ចៀន១វង់ៗនោះ១ដាំត្បូងពណ៌ក្រហម និងមួយទៀតមានរូបនាគសរួចមក ក៏ស្រាប់តែពោះនាងបានស្រកទៅជាតូចវិញធម្មតា ដូចជាគេបានសំរាលកូនជាមនុស្សធម្មតាដូច្នោះដែរ។
ចំណែករឿងកាន់តែមិនគួរអោយជឿនោះគឺដោះរបស់នាងបានឡើងតឹងនិងមានទឹកដោះ ហើយស្រាវដោះដូចស្ត្រីមានកូនខ្ចីអញ្ចឹងដែរ។ ដោយឡែកប្តីរបស់នាងឈ្មោះ ប៊ូ រុន វិញក៏មានការងឿងឆ្ងល់ដែរដោយបាននិយាយថា៖ពីមុនមកប្រពន្ធគាត់មិនដែរមានអ្វីប្លែកៗមិនគួរអោយជឿដូច្នេះឡើយ ហើយក្រោយពីនាងបានកើតកូនទី៣ជាចិញ្ចៀនរូបនាគសរួចមកមានរូបចូលសណ្ថិតនាងៗបាននិយាយថា៖កូនពងនោះគឺជាព្រះនាងកែវ៧ពណ៌ រីឯចិញ្ចៀនទាំង២នោះគឺជាព្រះរាជបុត្រ ពួកគេមកចាប់កំណើតនេះដើម្បីជួយប្រោះពលនិងជួយកសាងវត្តព្រះឥន្ទកោសីដែលជា
វត្តក្រជាងគេអោយមានបានឡើងវិញ។ជុំវិញរឿងស្ត្រីកើតកូនចម្លែកខាងលើនេះពេលអ្នកយកព័ត៌មានយើងសាកសួរសមត្ថកិច្ច និងអាជ្ញាធរមូលដ្ឋានពួកគាត់បានឆ្លើយថា ពុំបានដឹងទេ មិនដឹងថា ជារឿងពិតឬមិនពិតនោះទេ គឺជារឿងដូចជាមិនគួរអោយជឿឡើយ៕
