កំពង់ធំ÷ ឯកឧត្តម ងួន រតនៈ អភិបាលខេត្តកំពង់ធំ អញ្ជើញចុះសួរសុខទុក្ខ និងសំណោះសំណាល ព្រមទាំងនាំយកអំណោយស្បៀងបម្រុងរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ប្រគល់ជូនប្រជាពលរដ្ឋមានជីវភាពខ្វះខាតចំនួន៣៣០គ្រួសារ ដែលរងផលប៉ះពាល់ដោយទឹកជំនន់ នៅទីទួល
សុវត្ថិភាពស្រុកប្រាសាទសំបូរ ខេត្តកំពង់ធំ នៅរសៀលថ្ងៃទី៣០ ខែវិច្ឆិកា ឆ្នាំ២០២៣។
លោក ឃីម សុខឃាង អភិបាលស្រុកប្រាសាទសំបូរ បានរាយការណ៍ពីសកម្មភាពរបស់ស្រុក គឺដោយការយកចិត្តទុកដាក់ខ្ពស់ពីសំណាក់ឯកឧត្តម ព្រមទាំងថ្នាក់ដឹកនាំគ្រប់លំដាប់ថ្នាក់ មកលើពុកម៉ែបងប្អូនប្រជាពលរដ្ឋ ក៏ដូចជាការលើកទឹកចិត្តដល់មន្រ្តីរាជការ គឺជាការគិតគូដល់សុខទុក្ខប្រជាពលរដ្ឋ ឱ្យកាន់តែមានទឹកចិត្តប្រឹងប្រែងបន្តទៀត។ ក្នុងនោះស្រុកមាន៥ឃុំ ស្មើ៦៦ភូមិ ចំនួនគ្រួសារសរុប១០,៩២៤នាក់ ស្រី២៥,៨០៩នាក់។ ប្រជាពលរដ្ឋភាគច្រើនប្រកបរបរធ្វើស្រែចំការ និងមួយចំនួនទៀតប្រកបរបរដាំដំឡុង និងស្វាយចន្ទីជាដើម។ ចំពោះប៉ះពាល់ស្រូវវស្សាសរុបចំនួន២៦ហិចតា ប៉ះពាល់ដំណាំរួមផ្សំចំនួន០៤ហិចតា ប៉ះពាល់ផ្លូវលំសរុបចំនួន១០.៧៧០ម៉ែត្រ ផ្ទះប្រជាពលរដ្ឋចំនួន៣៩៩ខ្នងផ្ទះ ជម្លៀសប្រជាពលរដ្ឋចំនួន១០៦គ្រួសារប៉ះពាល់សាលារៀនចំនួន១៦កន្លែង ប៉ះពាល់លូចំនួន៤៨កន្លែង អណ្តូងទឹកចំនួន៣១៦កន្លែង និងវត្តអារាមចំនួន០១វត្ត។
ថ្លែងនៅក្នុងកម្មវិធីនេះឯកឧត្តម ងួន រតនៈ អភិបាលខេត្តកំពង់ធំ បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត តែងតែគិតគូរយកចិត្តទុកដាក់ពីសុខទុក្ខ និងជីវភាពរស់នៅរបស់បងប្អូនប្រជាពលរដ្ឋ ដែលមានគុណបំណាច់ចំពោះជាតិ មាតុភូមិ និងបានរួមចំណែកជាមួយសម្តេចតេជោ ហ៊ុន សែន ក្នុងការអនុវត្តនូវនយោបាយឈ្នះឈ្នះ ធ្វើឱ្យប្រទេសជាតិយើងមានសុខសន្តិភាព និងការឯកភាពជាតិពេញលេញដូចសព្វថ្ងៃនេះ។
ឯកឧត្តមអភិបាលខេត្តកំពង់ធំ បានលើកទឹកចិត្តដល់បងប្អូនប្រជាពលរដ្ឋទាំងអស់ ត្រូវខិតខំថែទាំសុខភាព រស់នៅស្អាតមានអនាម័យ ដើម្បីចៀសផុតពីជំងឺដង្កាត់ផ្សេងៗ និងត្រូវខិតខំបង្កបង្កើនផលដាំដំណាំ ចិញ្ចឹមសត្វ ដើម្បីលើកស្ទួយជីវភាពប្រចាំថ្ងៃរបស់ក្រុមគ្រួសារនីមួយៗ និងត្រូវចូលរួមអនុវត្តនូវគោលនយោបាយភូមិ/ឃុំ មានសុវត្ថិភាព របស់រាជរដ្ឋាភិបាល ពិសេសរួមគ្នាថែរក្សាឱ្យបាននូវសុខសន្តិភាព ដែលយើងកំពុងមានដូចសព្វថ្ងៃនេះ ឱ្យនៅគង់វង្សជារៀងរហូត ដើម្បីប្រទេសជាតិយើងបន្តការអភិវឌ្ឍឱ្យមានការរីកចម្រើនរុងរឿងបន្ថែមទៀត។
សូមញ្ជាក់ផងដែរថា អំណោយដែលប្រគល់ជូនដល់គ្រួសារដែលមានជីវភាពខ្វះខាតចំនួន៣៣០គ្រួសារ ជាអំណោយរបស់ស្អៀងបម្រុង របស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី សម្រាប់ដោះស្រាយជីវភាពប្រចាំថ្ងៃ ដោយក្នុង១គ្រួសារទទួលបាននូវ ÷អង្ករ០១បេ មី០១កេស ទឹកស៊ីអ៉ីវ០១យួរ ទឹកត្រី០១យួរ ត្រីខកំប៉ុង០១យួរ និងទឹកសុទ្ឋ០១កេសផងដែរ៕ អត្ថបទលោក ធូ កែវមុន្នី
