កណ្តាល ៖ យោងតាមពាក្យបណ្តឹងរបស់ជនរងគ្រោះសមត្ថកិច្ចមូលដ្ឋានប៉ុស្តិ៍ឃុំព្រៃពួច ឃាត់ខ្លួនជនសង្ស័យបានម្នាក់ នៅព្រឹកថ្ងៃទី១៥ ខែតុលា ឆ្នាំ២០១៤ ពីបទលួចទូរស័ព្ទដៃ ករណីលួចទូរស័ព្ទដៃកើតឡើងនៅថ្ងៃទី១៤ ខែតុលា ឆ្នាំ២០១៤ វេលាម៉ោង ១៩ និង៣០នាទី
ជនសង្ស័យដែលសមត្ថកិច្ចឃាត់ខ្លួនឈ្មោះ ម៉ែន សីហា ភេទប្រុស អាយុ១៨ឆ្នាំ មុខរបរសិស្ស រស់នៅភូមិទន្លាប់ ឃុំព្រៃពួច ស្រុកអង្គស្នួល ខេត្តកណ្តាល បានធ្វើសកម្មភាពលួចទូរស័ព្ទដៃម៉ាកអាយហ្វូនមួយគ្រឿង ។ ចំណែកជនរងគ្រោះឈ្មោះ ផុន ដាលីន ភេទស្រី អាយុ១៦ឆ្នាំ មុខរបរសិស្ស រស់នៅភូមិ-ឃុំកើតហេតុខាងលើ ។
នៅថ្ងៃកើតហេតុនារីរងគ្រោះបានដាក់ទូរស័ព្ទដៃម៉ាកអាយហ្វូនហ្វរមួយគ្រឿង នៅលើកាតាមសៀវភៅ មុខទូរទស្សន៍ រួចដើរទៅលើកបាយយកមកហូបនៅមុខកន្លែងទូរទស្សន៍ ក៏ក្រឡេកភ្នែកមកឃើញជនសង្ស័យម្នាក់នេះរត់ចេញពីក្នុងផ្ទះរបស់ខ្លួន ព្រមទាំងបានស្គាល់ជនសង្ស័យច្បាស់ ក៏មិនបានស្រែកឆោឡោស្អីដែរ ។
ក្នុងពេលនោះរូបញគេ ( នារីរងគ្រោះ ) បានពិនិត្យរកមើលទូរស័ព្ទរបស់ខ្លួនអត់ឃើញទើបសន្និដ្ឋានបានថា យុវជនរូបនេះពិតជាបានលួចទូរស័ព្ទដៃ ក៏បានទោដាក់ពាក្យបណ្តឹងទៅប៉ូលិសប៉ុស្តិ៍រដ្ឋបាលឈានទៅរកការឃាត់ខ្លួនបាននៅព្រឹកម៉ិញនេះដកហូតទូរស័ព្ទដៃអាយហ្វូនមួយគ្រឿងនោះប្រគល់ឲ្យសាម៉ីខ្លួនវិញ ។បច្ចុប្បន្ននេះជនសង្ស័យសមត្ថកិច្ចមូលដ្ឋានបានកសាងសំណុំរឿងបញ្ជូនមកកាន់ស្នងការខេត្តកណ្តាលចាត់ការបន្តតាមនីតិវិធីច្បាប់ ៕
