ត្បូងឃ្មុំ៖ ក្រសួងទេសចរណ៍ បានពង្រឹងចំណេះដឹងបន្ថែមដល់មន្ត្រីសមត្ថកិច្ចច្រកទ្វារអន្តរជាតិត្រពាំងផ្លុង ផ្នែក «បដិសណ្ឋារកិច្ច និងសេវាកម្មភ្ញៀវទេសចរណ៍» តាមរយៈវគ្គបណ្តុះបណ្តាលចំនួន២ថ្ងៃ ហើយឈានផ្តល់វិញ្ញាបនបត្រដល់មន្ត្រីចំនួន៥២នាក់ នៅរសៀលថ្ងៃទី១៣ ខែតុលា ឆ្នាំ២០១៤
ដែលប្រចាំការនៅច្រកអន្តរជាតិមួយនេះ ។
ឯកឧត្តម ព្រំ ឌុចបូរ៉ានឿន តំណាងអគ្គនាយកដ្ឋានអន្តោប្រវេសន៍ បានមានប្រសាសន៍ថា ក្រោយពីអស់លោក លោកស្រី បានបញ្ចប់ការសិក្សានេះទៅ សូមឲ្យអស់លោកត្រូវធ្វើយ៉ាងណាត្រងត្រាប់ រិះរកវិធីដែលល្អៗ គួបផ្សំនិងឯកសារជាក់ស្តែង ដែលយើងបានឆ្លងកាត់កន្លងមក យកមកប្រៀបធៀបគ្នាតើវាមានចំណុចប្រឈមត្រង់កន្លែងណាខ្លះ មានការលំបាកកន្លែងណាខ្លះ វាសំខាន់ស្ថិតនៅលើអស់លោក លោកស្រី ដែលជាសមត្ថកិច្ចនៅច្រកទាំងអស់ ត្រូវធ្វើយ៉ាងណាយកចិត្តទុកដាក់ ពិសេសមានឆន្ទះក្នុងការអនុវត្តនូវគោលការណ៍របស់រាជរដ្ឋាភិបាល ។
សំខាន់នៅលើអារម្មណ៍ នៅលើពាក្យសំដី អត្តចរិក នៅលើកាយវិការផ្សេងៗ ត្រូវតែយកមកអនុវត្តផ្ទាល់សម្រាប់បន្តអនុវត្តការងារប្រចាំថ្ងៃរបស់យើង ។ ឯកឧត្តម ហោ សារុន អនុរដ្ឋលេខាក្រសួងទេសចរណ៍ និងជាប្រធានលេខាធិការដ្ឋានគណៈកម្មាអន្តរក្រសួង បានមានប្រសាសន៍ថា វគ្គបណ្តុះបណ្តាលមុខជំនាញរយៈពេល២ថ្ងៃនេះ ពិតជាមានសារៈសំខាន់ណាស់ក្នុងការធ្វើបដិសណ្ឋារកិច្ច និងសេវាកម្មភ្ញៀវទេសចរ សេវាកម្មទំនាក់ទំនងប្រកបដោយទឹកមុខញញឹម រួសរាយរាក់ទាក់
ការធ្វើគារវកិច្ចគន្លឹះសំខាន់ដើម្បីធ្វើជាម្ចាស់សេវាកម្ម លក្ខណៈធ្វើឲ្យភ្ញៀវចាប់អរម្មណ៍ បែបបទនៃការសម្អិតសម្អាងកាយ ការរៀបចំខ្លួនជាមន្ត្រីសមត្ថកិច្ចបម្រើការងារនៅច្រកទ្វារព្រំដែនអន្តរជាតិត្រពាំងផ្លុង ដែលជាមន្ត្រីជួរមុខក្នុងការធ្វើបដិសណ្ឋារកិច្ចផ្ទាល់ជាមួយគណៈប្រតិភូ និងភ្ញៀវទេសចរជាតិ និងអន្តរជាតិ ពិសេសទៅទៀតចេះយល់ដឹងបន្ថែមពីគន្លឹះសំខាន់ៗនៃសេវាកម្ម ដែលជាការចាំបាច់ក្នុងការអនុវត្តប្រើប្រាស់ការងារប្រចាំថ្ងៃនៅតាមអង្គភាពរបស់ខ្លួននៅច្រកទ្វារនេះ ។
ឯកឧត្តម បានបញ្ជាក់ទៀតថា ក្នុងរយៈពេល៨ខែ ដើមឆ្នាំ២០១៤នេះ យើងទទួលបានភ្ញៀវទេសចរអន្តរជាតិចំនួន២.៨៨៨.៦៧០នាក់ ក្នុងកំណើន៤,២% បើធ្វើការប្រៀបធៀបទៅនឹងរយៈពេលដូចគ្នាក្នុងឆ្នាំ២០១៣ ។
យើងរំពឹងគិតថា ក្នុងឆ្នាំ២០១៤ កម្ពុជានឹងទទួលបានភ្ញៀវទេសចរអន្តរជាតិចំនួនប្រមាណ៤,៦លាននាក់ ក្នុងកំណើនពី ៧% ទៅ៨% ឆ្នាំ២០១៥ប្រមាណ៥លាននាក់ និងឆ្នាំ២០២០ ប្រមាណពី ៧,៥លាន ទៅ៨លាននាក់ ជាមួយនឹងឧិកាសការងារដោយផ្ទាល់ប្រមាណ ៨០០.០០០នាក់ និងដោយប្រយោលរាប់សិបម៉ឺននាក់ទៀត ៕
សាន វិឡែម ១៥.១០.២០១៤
