ខេត្តកំពង់ឆ្នាំង បុរសម្នាក់បានបាត់បង់ជីវិត ដោយសារលង់ទឹក ខណៈទៅលេងបុណ្យកឋិនទាន នៅភូមិកំពង់ បាចិន ឃុំពោធិ៍ ស្រុកកំពង់លែង ខេត្តកំពង់ឆ្នាំង ។
សាក្សីពីប្រជាពលរដ្ឋ នៅកន្លែងកើតហេតុ បានអោយដឹងថា បុរសដែលលង់ទឹកស្លាប់ ឈ្មោះ សែម សំបូរ ជាអតីតកីឡាប្រដាល់សេរី ប្រចាំខេត្តកំពង់ឆ្នាំង មានទីលំនៅសង្កាត់ប្អេរ ក្រុងកំពង់ឆ្នាំង ។ បុរស ដែលលង់ទឹក បាត់បង់ជីវិតម្នាក់នេះ ជាអ្នកចូលចិត្តផឹកស្រា ។
តាមប្រភពព័ត៌មាន បានឲ្យដឹងថា មុនពេលកើតហេតុ គេបានឃើញបុរសម្នាក់នោះ នៅលើទូក មួយសន្ទុះក្រោយមក មនុស្សម្នាមួយចំនួន មានចាស់ មានក្មេង បាននាំគ្នាចុះទៅងូតទឹកលេង ហើយពេលនោះបុរសឈ្មោះ សែម សំបូរ ក៍ចុះទៅលេងជាមួយគេឯងដែរ ក្រោយពេលចុះទឹកបានមួយសន្ទុះធំ ក៍បាត់បុរស សែម សំបូរ ឈឹង ប្រជាពលរដ្ឋ ដែលអង្គុយផឹកកាហ្វេ នៅលើទូក និងអ្នកងូតទឹក ក៍ផ្អើលឆោឡោ នាំគ្នាជួយរុករក ក៍ឃើញបុរស សែម សំបូរ លង់ទឹក ក៍នាំគ្នាជួយសង្គ្រោះ តែដោយស្ថានភាព ធ្ងន់ធ្ងរពេក បុរសម្នាក់នោះ ក៍បាត់បង់ជីវិតបាត់ទៅ ។
សាកសពជនរងគ្រោះ ត្រូវបានសាច់ញាតិ យកទៅធ្វើបុណ្យតាមប្រពៃណី នៅវត្តទេពធីតារាម ហៅវត្តយាយទេព ស្ថិតក្នុងសង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង ៕
