កំពង់ធំ៖ លោក ហាក់ ម៉ុងហួត ប្រធានគណៈកម្មាធិការអនុសាខាកាកបាទក្រហមកម្ពុជា ស្រុកតាំងគោក នៅព្រឹកថ្ងៃទី១២ ខែធ្នូ ឆ្នាំ២០២៣ បានដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ២០២៣ និងទិសដៅអនុវត្តបន្តសម្រាប់ឆ្នាំ២០២៤ ។
កិច្ចប្រជុំនេះមានការចូលរួមសមាជិកក្រុមប្រឹក្សាស្រុក គណៈអភិបាលស្រុក ការិយាល័យចំណុះ ជំនាញជុំវិញស្រុក មេឃុំ ជំទប់ទី១ ស្មៀនឃុំ អ្នកស្ម័គ្រចិត្តភូមិ ប្រធានមណ្ឌលសុខភាព វិស័យឯកជន នៃសេវាសុខាភិបាល ព្រះមន្រ្តីសង្ឃ ព្រះចៅអធិការវត្តគ្រប់វត្ត លោកនាយក នាយករងនៃវិទ្យាល័យទាំង៣ក្នុងស្រុក លោកនាយកបឋមសិក្សាក្នុងស្រុក និងសិស្សានុសិស្សអនុសាខាកាកបាទក្រហម នៃវិទ្យាល័យទាំង៣នៅក្នុងស្រុកតាំងគោក។
គោលបំណងនៃកិច្ចប្រជុំនេះ គឺដើម្បីបូកសរុបលទ្ធផលការងារដែលសម្រេចបានក្នុងឆ្នាំ២០២៣ ក៍ដូចជាបញ្ហាប្រឈមនានាដែលអនុសាខាជួបប្រទះ និងធ្វើការដោះស្រាយនូវសំណូមពរមួយចំនួនដែលប្រជាពលរដ្ឋដែលមានជីវភាពខ្វះខាតជួបនូវបញ្ហាផ្សេងៗនៅក្នុងស្រុកតាំងគោកទាំងមូល។
លោក ហាក់ ម៉ុងហួត បានថ្លែងអំណរគុណដល់សប្បុរសជនកន្លងមកតែងតែចូលរួមការងារសប្បុរសធម៌ជាមួយស្រុក និងកោតសរសើរចំពោះការខិតខំប្រឹងប្រែងយកអស់ពីកម្លាំងកាយចិត្តប្រាជ្ញា ស្មារតីទទួលខុសត្រូវចូលរួមយ៉ាង សកម្មក្នុងការបំពេញបេសកកម្មមនុស្សធម៌ របស់លោក លោកស្រី គណៈកម្មាធិកាអនុសាខាកាកបាទក្រហមឃុំសង្កាត់ អាជ្ញាធរគ្រប់លំដាប់ថ្នាក់ បានរួមគ្នាដោះស្រាយឆ្លើយតបដល់ប្រជាជនរងគ្រោះ និងងាយរងគ្រោះមហន្តរាយបំផុត និងការងារសង្គម ជាច្រើនទៀត ទទួលបានកាន់តែប្រសើរថែមទៀតដោយមិនគិតពេលវេលាឡើយ។
លោក ហាក់ ម៉ុងហួត បានជំរុញដល់សមាជិកគណ:កម្មាធិការអនុសាខាកាកបាទក្រហមកម្ពុជាស្រុកតាំងគោក និងអ្នកស្ម័គ្រចិត្តឃុំត្រូវតាមដាននូវករណីប្រជាពលរដ្ឋរងគ្រោះកើតឡើង ត្រូវផ្តល់ព័ត៌មានដល់ជាបន្ទាន់ដើម្បីឆ្លើយតបបានទាន់ពេលវេលា ទីណាមានទុក្ខលំបាកទីនោះមានអនុសាខាកាកបាទក្រហមកម្ពុជាស្រុកតាំងគោកចុះដល់មូលដ្ឋាន។
លោកអភិបាលស្រុកតាំងគោក បានរំលឹកទៅដល់សមាជិកសមាជិកា នៃគណៈកម្មាធិការអនុសាខា អ្នកស្ម័គ្រចិត្តឃុំសូមជួយចលនាកៀរគររកធនធានមូលនិធិដល់អនុសាខា ដើម្បីអនុសាខាមានលទ្ធភាពគ្រប់គ្រាន់ក្នុងការជួយសម្រាលទុក្ខលំបាករបស់ប្រជាពលរដ្ឋរងគ្រោះមហន្តរាយ និងងាយរងគ្រោះ ស្របតាមទិសស្លោក(ទីណាមានទុក្ខលំបាក ទីនោះមានកាកបាទក្រហមកម្ពុជា) និង (កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា-មិនទុកនរណាម្នាក់ចោល) នោះឡើយ៕ អត្ថបទលោក មី សុម៉េង
