ខេត្តកំពង់ស្ពឺ ៖បុរសម្នាក់បានរងរបួសធ្ងន់ ត្រូវបានក្រុមគ្រួសារបញ្ជូនភ្លាមៗមកកាន់មន្ទីរពេទ្យ បង្អែកខេត្តកំពង់ស្ពឺ បន្ទាប់ពីជនរងគ្រោះ និងមិត្តភក្រ័ជាច្រើននាក់ទៀតបានជួបជុំគ្នាផឹកស៊ីរហូតដល់ស្រវឹងធ្លាក់ភ្នែករៀងៗខ្លួន ក៍កើតមានទំនាស់ពាក្សសម្តីឈានផ្ទុះជាអំពើហឹង្សារបែបនេះ ។
ករណីផឹកស៊ីកាប់ចាក់គ្នានេះ បានកើតមានឡើងកាលពី យប់ថ្ងៃទី១៤ ខែតុលា ឆ្នាំ២០១៤ នៅភូមិត្នោតជ្រុំ ឃុំព្នាយ ស្រុកសំរោងទង ខេត្តកំពង់ស្ពឺ ។ មូលហេតុទំនាស់ពាក្យសម្តីគ្នាក្នុងពេលផឹកស៊ី រួចក៍យកជំពុះទងកាំភ្លើងមកចាក់លើជនរងគ្រោះ ខ្លួនចំនួន៤ជំពុះទងបណ្តាលឱ្យរងរបួសធ្ងន់ ។
ស្ត្រីជាម្តាយជនរងគ្រោះបានប្រាប់ថា រងគ្រោះជាកូនរបស់គាត់ ឈ្មោះស៊ុន ភក្តី ភេទ ប្រុស អាយុ ២៨ ឆ្នាំ រស់នៅភូមិ ឃុំខាងលើ មានមុខរបរធ្វើសំណង ។ ចំណែកជនសង្ស័យ ឈ្មោះសឿន ម៉ាច ភេទ ប្រុស អាយុ ២៧ ឆ្នាំ រស់នៅភូមិ ឃុំជាមួយគ្នា ។ ស្ត្រីជាម្តាយបន្តថា មុនពេលកើតហេតុ កូនប្រុសគាត់ និងមិត្តភ័ក្រមួយចំនួនទៀត បាននាំគ្នារៀបចំកម្មវិធីជួបជុំផឹកស៊ីរហូតម្នាក់ៗស្រវឹងគ្រប់គ្នា ហើយពេលនោះ ក៍កើតមានទំនាស់ពាក្យសម្តីជាមួយគ្នា បន្ទាប់មកពួកគេសម្របសម្រួលត្រូវគ្នាវិញ ។
ប្រភពបន្តថា ក្រោយពីឈប់ឈ្នោះគ្នា ពួកគេក៍នាំគ្នាផឹកស៊ីបន្ត រហូតមកដល់ម៉ោង ១៨ និង ៣០នាទី ជនរងគ្រោះបានដើរមកទិញបារី ស្រាប់តែពេលនោះជនដៃដល់ជនបាន យកជំពុះទងកាំភ្លើងមកចាក់ចំនួន ៤កន្លែង បណ្តាលឱ្យរងរបួសយ៉ាងធ្ងន់ ត្រូវបានក្រុមគ្រួសារដឹកមកកាន់មន្ទីរពេទ្យបង្អែក ខេត្តកំពង់ស្ពឺ ដើម្បីធ្វើការសង្គ្រោះអាយុជីវិតភ្លាមៗតែម្តង ។
បច្ចប្បន្នជនសង្ស័យបានរត់គេចខ្លួនបាត់ ហើយសមត្ថកិច្ចកំពុងស្រាវជ្រាវ តាមចាប់ខ្លួនយកមកផ្តន្ទាទោសតាមផ្លូវច្បាប់ ៕
