សៀមរាប: មានការភ្ញាក់ផ្អើលមួយ នាំឲ្យប្រជាពលរដ្ឋ ខ្លះលង់ជឿឃោសនា របស់ជនឆបោក ៣នាក់ ដែលតាំងខ្លួនជាអ្នករត់ការ ច្បាប់ចេញប្លង់ដីឲ្យប្រជាពលរដ្ឋ នៅភូមិស្ពានក្មេង ឃុំតាសៀម ស្រុកស្វាយលើ ខេត្តសៀមរាប ដោយតម្រូវឲ្យប្រជាពលរដ្ឋបង់លុយ ក្នុងមួយគ្រួសារ១០ម៉ឺរៀល សម្រាប់រត់ការ ចេញប្លង់កម្មសិទ្ធិ លើដីដែលកំពុងតែរស់នៅ។
ប្រជាពលរដ្ឋ ចំនួន៨គ្រួសារ បានមានចម្ងល់ និងសង្ស័យព្រោះខ្លាចគេបោក បានប្រាប់អ្នកពត៌មាននៅថ្ងៃទី ១៥ ខែតុលា ឆ្នាំ២០១៤ នៅវេលាម៉ោង ១១:00 នាទីវេលាថ្ងៃត្រង់ថា អ្នកដែលបានតាំងខ្លួនជាអ្នករត់ការ យកលុយពីប្រជាពលរដ្ឋ ក្នុងមួយគ្រួសារ១០ម៉ឺនរៀល ឈ្មោះ សៀក ស៊ាំ អ្នកតំណាងភូមិ ទី២ ឈ្មោះ ហេង បុត សមាជិកភូមិ ស្ពានក្មេង ទី៣ ឈ្មោះ ឡឹក សាបាន ជាអនុភូមិស្ពានក្មេង បានប្រកាសជាសារធារណះថា លោក
បានទទួលបញ្ជាពីលោក អភិបាលស្រុកស្វាយលើឲ្យចុះមករៀបចំឯកសារដីធ្លីបងប្អូន ប្រជាពលរដ្ឋដែលរស់នៅភូមិស្ពានក្មេងនេះ និងនៅចំនុច អពណ៌ ដែលមានចំនួន ៣៧៤ គ្រួសារ ហើយ ឲ្យប្រជាពលរដ្ឋ បង់លុយក្នុងមួយច្បាប់១០ម៉ឺនរៀល ក្នុងមួយគ្រួសារ ដើម្បីចេញប្លង់ដីជូន ហើយលុយទាំងនេះគឺយកទៅ ឲ្យឯកឧត្តមម្នាក់នៅភ្នំពេញបញ្ជាឲ្យក្រុមយុវជនស្ម័គ្រចិត្តចុះមកវាស់វែងដីជូន នេះជាការអះអាងរបស់ លោកសៀក ស៊ាំ តំណាងភូមិស្ពានក្មេង។
តែអ្នកដែលប្រមូលលុយពីប្រជាពលរដ្ឋនោះ ឈ្មោះ ឡឹក សាបាន ពេលណាដែលប្រមូលលុយបានគ្រប់ចំនួនហើយ លោក ឡឹក សាបាន នឹងយកលុយ ទៅឲ្យលោក សៀក ស៊ាំ និង ហេង បុត ជាអ្នករត់ច្បាប់ ជាមួយ ឯកឧត្តម នៅភ្នំពេញ។ ដើម្បីឲ្យឯកឧត្តមជួយអន្តរាគមន៍ ដល់សម្តេច ហ៊ុន សែន ដើម្បីឲ្យសម្តេច ហ៊ុន សែន បញ្ជូនក្រុម យុវជនស្ម័គចិត្ត ចុះមកវាស់វែងដីជូនប្រជាពលរដ្ឋ។
ខេមរា បានសុំការបំភ្លឺពីលោក សៀក ស៊ាំ មេភូមិលោតឆ័ត្រ តាមទូរស័ព្ទ ជុំវិញការចោទប្រកាន់ថា មាន ការរៀបចំប្រមូលលុយប្រជាពលរដ្ឋ ក្នុងមួយគ្រួសារ១០ម៉ឺនរៀល ដើម្បីរត់ការចេញប្លង់ដីស្របច្បាប់នោះ លោកបានឲ្យដឹងថាលោកពិតជាបានប្រមូលលុយក្នុង១គ្រួសារ១០ម៉ឺនមែនការប្រមូលលុយនេះ គឺដើម្បីយកទៅរត់ច្បាប់ជូនប្រជាពលរដ្ឋ និងយកទៅឲ្យឯកឧត្តមម្នាក់ដែលគាត់មិនឲ្យចេញបញ្ចេញឈ្មោះ បច្ចុប្បន្នរស់នៅភ្នំពេញ ដោយឯកឧត្តម រូបនោះនិយាយថា ចាំរត់ការសម្រេចហើយនិងចាំចេញឈ្មោះតាម ក្រោយ ហើយឯកឧត្តម រូបនោះអះអាងថា និងខលទៅសម្តេច ហ៊ុន សែន សុំឲ្យក្រុមយុវជនស្ម័គ្រ ចិត្តចុះទៅវាស់វែង។
លោក ស៊ិ ប៊ុនស៊ិន អភិបាលស្រុកស្វាយលើ បានឆ្លើយប្រាប់តាមទូរស័ព្ទថា ជុំវិញករណីនេះ លោកអះអាងថា មិនបានដាក់បទបញ្ជាឲ្យតំណាងភូមិស្ពានក្មេង យកលុយពីប្រជាពលរដ្ឋ ហើយរត់ការចេញប្លង់ ដីនោះទេ ជាពិសេសលោកមិនបានដឹងរឿងអ្វីទាំងអស់ ហើយក៍មិនបានដាក់បញ្ជាឲ្យឈ្មោះ ទាំងបីនេះប្រមូលលុយឬធ្វើឯកសារពាក់ពាន់រឿងខាងលើនេះដែរ។ ដោយ ឡាន់ សុខចិត្ត
