បន្ទាយមានជ័យៈ ពលករខ្មែរចំនួន៣៣នាក់ ដែលត្រូវបានសមត្ថកិច្ចថៃធ្វើ ការ ចាប់ខ្លួនកាលពីពេលកន្លងមកដោយចោទប្រកាន់ថាបានលួចឆ្លងដែនចូលទៅកាប់ឈើក្នុងតំបន់ព្រៃអភិរក្សនៃខេត្តស្រះកែវប្រទេសថៃដោយខុសច្បាប់ត្រូវបានតុលាការថៃដោះលែងមកវិញហើយកាលពីល្ងាចថ្ងៃទី១៦
ខែតុលានេះតាមច្រកទ្វារអន្តរជាតិ ប៉ោយប៉ែត។ 
លោក នេត្រ សេរី អគ្គកុងស៊ុលកម្ពុជាប្រចាំខេត្តស្រះកែវបានអោយដឹងថា កម្មករទាំង៣៣នាក់ពិតជាត្រូវបានតុលាការថៃលើកលែងការចោទប្រកាន់ និងបានធ្វើ ការដោះលែងបញ្ជូនមកកម្ពុជាវិញជាមួយនិងពលករដទៃទៀតដែលឆ្លងដែនខុសច្បាប់។ការលើកលែងទោសនេះបានធ្វើឡើងបន្ទាប់ពីមានការអន្តរាគមន៍សុំអោយមានការលើកលែងទោសពីអគ្គកុងស៊ុលកម្ពុជា។ក្នុងនោះលោកបានបញ្ជាក់ថាពលករទាំងអស់សុទ្ធសឹងជាជនរងគ្រោះចាញ់ការឃោសនារបស់មេខ្យល់។
តាមសម្តីពលករម្នាក់ដែលរស់នៅខេត្តព្រៃវែងបាននិយាយថាគាត់ត្រូវបានមិត្តភក្តិបបួលទៅរកការងារធ្វើនៅប្រទេសថៃដែលមានថៅកែម្នាក់ជាអ្នកនាំនិងដឹកទៅដល់ច្រកចូល តែគាត់អត់បានស្គាល់ឈ្មោះទេ ។លុះទៅដល់ទីនោះគាត់ក៏ត្រូវបាន គេប្រគល់ អោយកាន់រណាយន្ត។ពលករដដែលនេះបញ្ជាក់ថាពួកគាត់ត្រូវបានទាហានថៃចាប់ខ្លួនបន្ទាប់ពីឆ្លងដែនចូលទៅក្នុងព្រៃមួយមិនទាន់ធ្វើសកម្មភាពផង រួចបញ្ជូនទៅឃុំ ខ្លួន ក្នុងខេត្តស្រះកែវ។
ពួកពលករនិយាយថាពួកខ្វះខាតសោហ៊ុយធ្វើដំណើរវិលត្រឡប់ទៅតាមលំនៅដ្ឋានស្រុកកំណើត មួយវិញទៀតអាជ្ញាធរស្រុកមិនបាន យកចិត្តទុកដាក់ ទៅលើពួកគាត់ដូចពលករឯទៀតទេនៅពេលដែលបញ្ជូន មកដល់មាត់ច្រកទ្វារអន្តរ ជាតិប៉ោយប៉ែត តែកុងស៊ុលថាពួកគាត់មានទោសឆ្លងដែនខុសច្បាប់មិនត្រូវបានយក ចិត្តទុកដាក់ទេ៕
