ខេត្តព្រះសីហនុ៖ សាកសពបុរសម្នាក់ត្រូវបានប្រជាពលរដ្ឋ ដែលជាភ្ញៀវទេសចរណ៏ ប្រទះឃើញអណ្តែតទឹក នៅឆ្នេរសមុទ្រចន្លោះ ភោជនីយដ្ឋានឆ្នេរថ្មី និងភោជនីយដ្ឋានឆ្នេរមាស ស្ថិតក្នុងភូមិ៣ សង្កាត់៣ ក្រុងព្រះសីហនុ ខេត្តព្រះសីហនុ កាលពីព្រឹកថ្ងៃទី ០៤ ខែ មិនា ឆ្នាំ ២០១៤ ម្សិលមិញនេះ ។
ប្រជាពលរដ្ឋនៅកន្លែងកើតហេតុ ដែលបានស្គាល់ជនបរទេសខាងលើបាននិយាយថា ជនបរទេសរូបនេះជារៀងរាល់ថ្ងៃ តែងតែមកហែលទឹកលេងនៅតំបន់ឆ្នេរសមុទ្រនេះ ស្ទើរតែរាល់ថ្ងៃពុំដែលខាននោះឡើយ ហើយគេហែលលេងទៅក្នុងសមុទ្រជ្រៅៗទៀតផង ។ តាមការអោយដឹងពីលោកអនុសេនីយ៏ទោ ខៀវ វន្ថា នាយប៉ុស្តិរដ្ឋបាលសង្កាត់លេខ៣ បានអោយដឹងថា សាកសពបុរសអណ្តែតទឹកនេះមានឈ្មោះ CARLO TARADEL អាយុប្រហែលជាង ៤០ឆ្នាំ ជាជនជាតិ អ៊ីតាលី ស្នាក់នៅបណ្តោះអាសន្នបន្ទប់ជួលម្តុំឧតុនិយម ស្ថិតក្នុងភូមិ៣ សង្កាត់៣ ក្រុងព្រះសីហនុ ។
លោកបានបន្តទៀតថា តាមការសន្និដ្ឋានរបស់សមត្ថកិច្ចនគរបាលពិនិត្យកោសល្យវិច្ច័យ បានអះអាងថា សាកសពបុរសជនជាតិបរទេសអណ្តែតទឹកខាងលើ គឺស្លាប់ដោយសារលង់ទឹក ។ សាកសពត្រូវបានសមត្ថកិច្ច នគរបាលដឹកតាមរថយន្ត យកទៅរក្សាទុកនៅទីលានតំកល់សាកសពជោតញ្ញាណ ហៅវត្តក្រោម រង់ចាំស្ថានទូតសម្រេចបញ្ជូនទៅប្រទេសដើមវិញ ៕ 
