កំពង់ចាម: ឯកឧត្ដម អ៊ុន ចាន់ដា អភិបាលខេត្តកំពង់ចាម នាព្រឹកថ្ងៃទី៥ ខែមករា ឆ្នាំ២០២៤នេះ បានអញ្ជើញបើកការប្រកួតកីឡាមហាជនជ្រើសរើសជើងឯកទូទាំងខេត្ត 
ប្រចាំឆ្នាំ២០២៤ ដើម្បីអបអរសាទរខួបទី៤៥ នៃទិវាជ័យជម្នះ ៧ មករា ១៩៧៩-២០២៤ ដែលជាថ្ងៃប្រវត្តិសាស្ត្រនៃការរំដោះប្រជាជនកម្ពុជា ឱ្យរួចចាកផុតពីរបបប្រល័យពូជសាសន៍ ។
ថ្លែងក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានលើកឡើងថា វិស័យអប់រំកាយ និងកីឡា គឺជាវិស័យមួយដែលរដ្ឋាភិបាលកម្ពុជាដែលមាន សម្តេចអគ្គមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និង ក្រសួងអប់រំ យុវជន និងកីឡា បានយកចិត្តទុកដាក់ និងចាត់ទុកថា ជាវិស័យមួយមានសារៈសំខាន់ចំពោះជាតិក្នុងការអភិវឌ្ឍ និងកិត្យានុភាព ព្រមទាំងកិត្តិយសប្រទេសជាតិ។ ដូច្នេះសូមឱ្យយុវជនគ្រប់រូបបង្វែចិត្តគំនិតមកលេងកីឡាឱ្យបានគ្រប់ៗគ្នា ពិសេសកីឡា ដើម្បីសុខភាព ដើម្បីអភិវឌ្ឍផ្នែករាងកាយ បញ្ញា ស្មារតី សីលធម៌ ឱ្យសមស្របទៅតាមបញ្ញត្តិ ទាំងឡាយដែលមានក្នុងធម្មជាតិ ។ 
ឯកឧត្តមអភិបាលខេត្ត បានធ្វើការផ្ញេីសូមឱ្យកីឡាករ កីឡាការិនីទាំងអស់ ត្រូវខិតខំប្រឹងប្រែងហ្វឹកហាត់ និងថែរក្សាប្រពៃណី វប្បធម៌ ក្នុងពេលប្រកួតឱ្យបានខ្ជាប់ខ្ជួន ដើម្បីដណ្ដើមយកជ័យជម្នះជូនមន្ទីរ-អង្គភាព ក្រុង/ ស្រុករបស់ខ្លួន និងបានក្លាយខ្លួនទៅជាកីឡាករ កីឡាការិនីដ៏ឆ្នើម សម្រាប់បន្តទៅចូលរួមក្នុង ការប្រកួតនៅថ្នាក់ភូមិភាគ ថ្នាក់ជាតិ ថ្នាក់តំបន់ និងថ្នាក់អន្តរជាតិ។
ជាមួយគ្នានោះ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានធ្វើការអំពាវនាវដល់បងប្អូនប្រជាពលរដ្ឋ ក៏ដូចជាប្អូនៗយុវជនជំនាន់ក្រោយ ត្រូវតែចងចាំ និងយល់ដឹងជានិច្ច ចំពោះរឿងហេតុកើតឡើងពិតជាក់ស្តែងនៅក្នុងរបប ប៉ុល ពត ៣ឆ្នាំ ៨ខែ ២០ថ្ងៃ ហើយធ្វើយ៉ាងណាកុំឱ្យរបបឃោរឃៅព្រៃផ្សៃយង់ឃ្នង ដែលកើតមានដោយកម្រនៅលើពិភពលោកយើងនេះ វិលមកនៅលើទឹកដីមាតុភូមិកម្ពុជាដ៏បវរនៃយើង ជាលើកទី២ ម្តងទៀតបានឡើយ។
លោកលី ម៉េងសាន ប្រធានមន្ទីរអប់រំយុវជននិងកីឡាខេត្តកំពង់ចាម បានឲ្យដឹងថា ក្រុមកីឡាករតាមមន្ទីរ-អង្គភាពជុំវិញខេត្ត ក្លិប និងក្រុង/ស្រុក ដែលមកចូលរួមក្នុងការប្រកួតកីឡាមហាជនជ្រើសរើសជើងឯក ប្រចាំឆ្នាំ២០២៤នេះ សរុបរួមទាំងអស់មានចំនួន ១៤១ក្រុម ក្នុងនោះនារី ៧ក្រុម មានកីឡាករ កីឡាការនី សរុប ចំនួន ១១៧៤នាក់ ។ ប្រភេទកីឡាដែលបានដាក់ឲ្យប្រកួតរួមមាន កីឡាបាល់ទាត់ បាល់ទះ បាល់បោះ ប៉េតង់ប៊ូល វាយកូនឃ្លីលេីតុ និងកីឡាវាយសី ផងដែរ ៕
