សៀមរាប : ការប្រើប្រាស់ឧបករណ៍នេសាទខុសច្បាប់នៅលើទឹកដីស្រុកជីក្រែងខេត្តសៀមរាបកាន់តែមានសភាពអាណាធិបតេយ្យខ្លាំងឡើងៗ ឥតមានជំនាញណាមួយអាចទប់ស្កាត់ និងបង្ក្រាបបានឡើយជាពិសេស ការប្រើប្រាស់ឧបករណ៍នេសាទប្រភេទស្បៃមុង និងមោងក្រឡាញឹក
សាច់រ៉ាវវែង ហៅថា (សាច់បរ) ។
ឧបករណ៍ទាំងពីរប្រភេទនេះនៅពាសពេញស្ទើរតែគ្រប់ចំណុច នៅក្នុងទឹកដីស្រុកជីក្រែង ដូចជា (ចំណុចវត្តព្រៃប្រស់, ពាក់យាម, ទួលឡៅ, ប្រអប់ប្រាំពីរភូមិ តាមបណ្តោយទំនប់៧៨ រហូតដល់ល្ហាលព្រួល។ ទោះបីជាមានការបង្ក្រាបនិងទប់ស្កាត់ពីរដ្ឋបាលជលផល និងមន្ត្រីបរិស្ថានខ្លះក៏ដោយ នៅតែមានការឆកល្វែងនៅចំណុចមួយចំនួនដែលមិនបានបង្ក្រាប និងទប់ស្កាត់ទាល់តែសោះ ដូចជាចំណុចវត្តព្រៃប្រស់ ស្ថិតនៅក្នុងឃុំសង្វើយ ជាតួនាទីរបស់ 
លោក ជុំ ភាព ប្រធានរដ្ឋបាលជលផលស្រុកជីក្រែង ហើយនិងចុងខាងលិចទំនប់៧៨ (ហៅទំនប់សួង) ត្រង់ចំណុចលូធំ ស្ថិតនៅក្នុងឃុំអន្លង់សំណរ ជាតួនាទីរបស់ លោក ញឹម ស៊ីវ័ន្ត ប្រធានសង្កាត់រដ្ឋបាលជលផល ឃុំអន្លង់សំណរ សូមបញ្ជាក់ថាចំណុចវត្តព្រៃប្រស់ និងទំនប់៧៨ខាងលិច ត្រង់ចំណុចលូធំកន្លែងទាំងពីរនេះមានការប្រើប្រាស់ឧបករណ៍នេសាទប្រភេទស្បៃមុង និងមោងក្រឡាញឹក សាច់រ៉ាវវែង ប្រទាក់ប្រទើសដូចសំបុកពីងពាងអាចដាក់បាន
យ៉ាងសុខសាន្ត ឥតមានជំនាញណាមួយរំខានដល់ពួកគេឡើយ រហូតដល់មានជនសង្ស័យម្នាក់ដែលប្រើប្រាស់ឧបករណ៍នេសាទប្រភេទស្បៃមុងបាននិយាយនៅលើលូធំខាងលិចនៃទំនប់៧៨ បានក្អេងក្អាងថា៖ អញមិនខ្លាចទេ ជំនាញជលផលឬបរិស្ថាន អញខ្លាចតែកម្លាំងចម្រុះតែប៉ុនណោះ ។
ដោយ អ៊ុក ផ្លុង
