ខេត្តសៀមរាប៖ នាព្រឹកថ្ងៃទី ០៥ ខែ មីនា ឆ្នាំ២០១៤នេះ បងប្អូនជានារី ភរិយាថ្នាក់ដឹកនាំខេត្តគ្រប់ជាន់ថ្នាក់ មន្ត្រីរាជការ និង កងកម្លាំងប្រដាប់អាវុធ ក្រុមហ៊ុន ពាណិជ្ជករ អាជីវករ អង្គការដៃគូអភិវឌ្ឍន៍ អង្គការសង្គមស៊ីវិល គរុសិស្ស និស្សិត សិស្សប្រមាណ ៤០០នាក់ បានមកជួបជុំគ្នានៅសាលប្រជុំរដ្ឋបាលសាលាខេត្តសៀមរាប ប្រារព្ធធ្វើពិធីអបអរសាទរ ខួបលើកទី១០៣ ទិវាអន្តរ ជាតិ នារី ៨មីនា ឆ្នាំ២០១៤ ក្រោមប្រធានបទ ( សមភាពនៃការអប់រំ មានសារៈសំខាន់ក្នុង កិច្ចអភិវឌ្ឍន៍សង្គម ) ក្រោមអធិបតីភាពរបស់ឯ.ឧ ឃឹម ប៊ុនសុង អភិបាលនៃគណៈអភិបាលខេត្ត និង លោកជំទាវ ដោយមានការចូល រួមពីសំណាក់ឯកឧត្តម លោកឧកញ៉ា លោកជំទាវ ជាសមាជិកក្រុមប្រឹក្សាខេត្ត គណៈអភិបាល ខេត្ត និង អស់លោក លោកស្រីជាថ្នាក់ដឹកនាំមន្ទីរ ផងដែរ ។
ក្នុងកិច្ចស្វាគមន៍របស់លោកស្រី យូ សុភា ប្រធានមន្ទីរកិច្ចការនារីខេត្តសៀមរាប ក៏បានបញ្ជាក់អំពីលទ្ធផល នៃការអនុវត្តលើការងារយេនឌ័រក្នុងរយៈពេលមួយឆ្នាំកន្លងមក ព្រមទាំងបានបញ្ជាក់ពីគោលបំណង ការគោរពទិវា អន្តរជាតិនារី៨មីនានេះ ជាការផ្តល់ឱកាសឲ្យបុរស ស្ត្រី យុវវ័យទទួលបាននូវចំណេះដឹង ជំនាញ និងមានសីលធម៌ ដើម្បីក្លាយទៅជាធនធានមនុស្សដ៏មានសក្តានុពល សម្រាប់ពន្លឿនការអភិវឌ្ឍន៍សេដ្ឋកិច្ច និង សង្គមជាតិ ។
បន្ទាប់ពីលោកជំទាវ ឯម ផលាមុនី អភិបាលរងនៃគណៈអភិបាលខេត្ត បានអាននូវព្រះរាជសារ សម្តេចព្រះ មហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និង សុភមង្គល ក្នុងឱកាស អបអរសាទរខួបលើកទី១០៣ នៃទិវាអន្តរជាតិនារី ៨មីនា ឆ្នាំ២០១៤ ។ តាមព្រះរាជសារ ក៏បានផ្តោតយ៉ាងជាក់លាក់ ទៅលើការលើកកម្ពស់សមភាពយេនឌ័រ និង ការអភិវឌ្ឍន៍ធនធានមនុស្ស ដែលគ្រប់ក្រសួង ស្ថាប័នកំពុងអនុវត្ត ដើម្បី ប្រជាពលរដ្ឋកម្ពុជា ពិសេសស្រី្ត និង យុវវ័យ ចូលរួមចំណែកអភិវឌ្ឍន៍ប្រទេស ឲ្យឈានឆ្ពោះទៅរកភាពរីកចម្រើន និង ធ្វើឲ្យប្រសើរឡើងនូវកំណើនសេដ្ឋកិច្ច រក្សានូវសន្តិភាព ស្ថិរភាពនយោបាយ និង សន្តិសុខសង្គម ព្រមទាំងលើក កម្ពស់សិទ្ធិ សេចក្តីថ្លៃថ្នូរ និង សីលធម៌ផងដែរ ។
មានប្រសាសន៍សំណេះសំណាលក្នុងឱកាសនោះឯ.ឧ ឃឹម ប៊ុនសុង ក៏បានវាយតម្លៃខ្ពស់ លើការរំលឹកនូវ កិច្ចខិតខំប្រឹងប្រែងតស៊ូ និង ការជំនះរាល់ឧបស័គ្គដែលរាំងស្ទះការធ្វើឲ្យប្រសើរឡើង នូវសិទ្ធិ ឋានៈ តួនាទី និង ជីវ ភាពរស់នៅរបស់ស្ត្រីកម្ពុជា ក៏ដូចជាស្ត្រីទូទាំងសកលលោក ដែលមានការប្តេជ្ញារួមគ្នាតទៅមុខ ឆ្ពោះទៅសម្រេចបាន នូវបំណងប្រាថ្នានេះ ។ ឯកឧត្តមបានបន្តទៀតថា ការបង្កើតឡើងនូវសមធម៌ដ៏ប្រសើរ ចំពោះស្ត្រីឲ្យទទួលស្គាល សមភាព រវាងស្ត្រី និង បុរស ក្នុងគ្រប់ទិដ្ឋភាព នៃវិស័យនយោបាយ សេដ្ឋកិច្ច សង្គមកិច្ច សិទ្ធិពេញលេញក្នុងតម្លៃជា មនុស្សជាតិ ដើម្បីចូលរួមក្នុងភាពដៃគួ មិនអាចខ្វះបានជាមួយបុរស ក្នុងការអភិវឌ្ឍន៍ប្រទេសជាតិ ។
ឯកឧត្តម ឃឹម ប៊ុនសុង ក៏បានគូសបញ្ជាក់ថា ប្រធានបទសម្រាប់ទិវាអន្តរជាតិនារី ៨មីនាឆ្នាំនេះ ក្នុងគោលបំណង ជម្រុញឲ្យមាន ការផ្តល់ឱកាសឲ្យបុរស ស្ត្រី យុវវ័យ ទទួលបានចំណេះដឹង ជំនាញ មានសីលធម៌ និង ក្លាយខ្លួនជាធនធានដ៏មាន សក្តានុពល សម្រាប់ពន្លឿនកិច្ចអភិវឌ្ឍន៍ សេដ្ឋកិច្ច និង សង្គមជាតិ ក្នុងគោលដៅឆ្ពោះទៅនឹងបរិបទសហគមន៍ អាស៊ាន ដែលតម្រូវការធនធានមនុស្សប្រកប ដោយគុណសម្បត្តិ និង ធ្វើឲ្យកម្ពុជាមានលក្ខណៈប្រកួតប្រជែង នៅ ក្នុងតំបន់ និងលើពិភពលោក ។ ឯកឧត្តមបានបន្តទៀតថា ក្រោមកិច្ចដឹកនាំដ៏ឈ្លាសវៃប្រកបទៅដោយគតិបណ្ឌិតដ៏ ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី នីតិកាលទី៥នៃរដ្ឋសភា ដើម្បីឈានទៅសម្រេចនូវចក្ខុវិស័យ ក្នុងការប្រែក្លាយកម្ពុជា ជាប្រទេសមានចំណូលមធ្យមមកកម្រិតខ្ពស់នៅឆ្នាំ២០៣០ និង ជាប្រទេសអភិវឌ្ឍន៍នៅឆ្នាំ ២០៥០ ។
ឯ.ឧ ឃឹម ប៊ុនសុង បានលើកឡើងថា ការអនុវត្តយុទ្ធសាស្ត្រចតុកោណដំណាក់កាលទី៣ ដោបានចាត់ ទុក (ស្ត្រីជាឆ្អឹងខ្នងនៃសេដ្ឋកិច្ច និង សង្គមជាតិ ) និង បន្តអនុវត្តគោលនយោបាយលើកកម្ពស់ សមភាពយេនឌ័រ នៅ គ្រប់វិស័យ ដោយផ្តោតលើការពង្រឹងកាលានុវត្តភាព សេដ្ឋកិច្ចស្ត្រី តាមរយៈការអភិវឌ្ឍន៍សត្ថភាពផ្នែកចំណេះដឹង ជំនាញ វិជ្ជាជីវៈ និង ការបញ្ជ្រាបយេនឌ័រនៅក្នុងផែនការយុទ្ធសាស្ត្រអភិវឌ្ឍន៍សេដ្ឋកិច្ចសង្គម ព្រមទាំងពង្រីកលទ្ធភាព របស់ស្ត្រី និង កុមារីនៅតាមជន បទ ទទួលបានឱកាសចូលសិក្សារៀនសូត្រ នៅកម្រិតបឋមសិក្សា មធ្យមសិក្សាទុតិយ ភូមិ និង ឧត្តសិក្សា រួមទាំងការបណ្តុះបណ្តាលវិជ្ជាជីវៈ ធានាបានសេវាសុខាភិបាល ប្រកបដោយគុណភាព ក្នុងតម្លៃ សេវាសមរម្យ និង ផ្តល់កិច្ចការផ្លូវច្បាប់ឆាប់រហ័សដល់ជនរងគ្រោះស្ត្រីទៀតផង ។
ក្នុងឱកាសនោះដែរឯ.ឧ ឃឹម ប៊ុនសុង និងលោកជំទាវ ក៏បានឧបត្ថម្ភថវិកា ជូនដល់បងប្អូនជាស្ត្រីនៅក្នុងជួរកងកម្លាំង ប្រដាប់អាវុធទាំងបីប្រភេទ ក្នុងមួយអង្គភាព ចំនួន ២លានរៀល និង ឧបត្ថម្ភដល់ប្រតិភូនារីរបស់ រដ្ឋបាលសាលាខេត្តសៀមរាប ទៅធ្វើទស្សនកិច្ចប្រទេសវៀតណាម ចំនួន ៣ពាន់ដុល្លា និង ផ្តល់នូវវត្ថុអនុស្សាវរីយ៍ដល់ បងប្អូននារីដែលបានចូលរួមពិធី ទាំង ៤០០នាក់ ដោយម្នាក់ៗ សារុងស៊ឹង ០១ អាវ០១ និង ប្រាក់ ២ម៉ឺនរៀលផងដែរ ៕ 
