កំពង់ចាម: ឯកឧត្តម សន្តិបណ្ឌិត ឧបនាយករដ្ឋមន្ត្រី នេត សាវឿន សមាជិកគណៈអចិន្ត្រៃយ៍ គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ចាម បានផ្តាំផ្ញេីដល់អង្គបោះឆ្នោតទាំងអស់ ត្រូវថែរក្សាសុខភាព ដេីម្បីទៅបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឱ្យបានគ្រប់ៗគ្នា នៅ
ថ្ងៃទី២៥ ខែកុម្ភៈ ឆ្នាំ២០២៤ ខាងមុខនេះ ។ ថ្លែងបែបនេះក្នុងកិច្ចប្រជុំប្រកាសសមាសភាពបេក្ខជនឈរឈ្មោះបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នៅមណ្ឌលភូមិភាគទី២ និងសំណេះសំណាលជាមួយ អង្គបោះឆ្នោត នារសៀលថ្ងៃទី២៧ ខែមករា ឆ្នាំ២០២៤ នៅទីស្នាក់ការគណបក្សប្រជាជនកម្ពុជា ស្រុកចំការលេី ខេត្តកំពង់ចាម ។
ក្នុងឱកាសនោះដែរ ឯកឧត្តម សន្តិបណ្ឌិត ឧបនាយករដ្ឋមន្ត្រី នេត សាវឿន បានស្នើដល់អង្គបោះឆ្នោតទាំងអស់ សូមបំពេញកាតព្វកិច្ច និងការប្តេជ្ញាចិត្តខ្ពស់ ដេីម្បីរក្សាចំនួនអាសនៈ ពោលគឺត្រូវខិតខំប្រឹងប្រែង អូសទាញគៀងគរកម្លាំងបន្ថែមទៀត សម្រាប់ធានាដល់ការបោះឆ្នោត ដើម្បីសម្រេចបាន នូវសន្ទស្សន៍ ៨/៨ អាសនៈ នៅមណ្ឌលភូមិភាគទី២ (កំពង់ចាម-ត្បូងឃ្មុំ) គឺយេីងត្រូវត្រៀមវត្តមាន និងត្រៀមឯកសារសម្រាប់បម្រើឱ្យការបោះឆ្នោត ហើយត្រូវផ្ទៀងផ្ទាត់ប្រតិទិន ផងដែរ ។
ជាមួយគ្នានោះ ឯកឧត្តម អ៊ុច បូររិទ្ធ សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានក្រុមបេក្ខជនឈរឈ្មោះបោះឆ្នោតជ្រើសតាំងសមាជិកព្រឹទ្ធសភា បានលើកទឹកចិត្តដល់អង្គបោះឆ្នោតទាំងអស់ ឱ្យរួមគ្នាប្តេជ្ញាចិត្ត ដេីម្បីដណ្ដើមយកជ័យជម្នះក្នុងការបោះឆ្នោតជ្រើសតាំងសមាជិកព្រឹទ្ធសភាអាណត្តិទី៥ ជូនគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាន និងជាអគ្គមគ្គុទ្ទេសក៍ដ៏ឆ្នើម បន្តដឹកនាំប្រទេសជាតិ ឱ្យកាន់តែរីកចម្រើនបន្ថែមទៀត ។
បេីតាមឯកឧត្តម អ៊ុន ចាន់ដា ប្រធានគណៈកម្មាធិការគណបក្សប្រជាជនកម្ពុជា ខេត្តកំពង់ចាម បានឱ្យដឹងថា សម្រាប់ការបោះឆ្នោតជ្រើសតាំងសមាជិកព្រឹទ្ធសភា នៅក្នុងមណ្ឌលភូមិភាគទី២ (កំពង់ចាម-ត្បូងឃ្មុំ) មាន ៨ អាសនៈ មានអង្គបោះឆ្នោត ចំនួន ១,៣៧១រូប ក្នុងនោះមាន៖ អ្នកតំណាងរាស្ត្រមណ្ឌលខេត្តកំពង់ចាម ចំនួន ១០រូប និងអ្នកតំណាងរាស្ត្រមណ្ឌលខេត្តត្បូងឃ្មុំ ចំនួន ៨រូប ។ ក្រុមប្រឹក្សាឃុំ សង្កាត់ ខេត្តកំពង់ចាម ចំនួន ៨១៧រូប ក្នុងនោះមាន គណបក្សប្រជាជនកម្ពុជា ចំនួន ៦១៦រូប គណបក្សភ្លើងទៀន ចំនួន ១៩៦រូប និងគណបក្សផ្សេងៗទៀត ចំនួន ៥រូប ។
ដោយឡែកក្រុមប្រឹក្សាឃុំ សង្កាត់ ខេត្តត្បូងឃ្មុំ មានចំនួន ៥៣៦រូប ក្នុងនោះមាន គណបក្សប្រជាជនកម្ពុជា ចំនួន ៤៣២រូប គណបក្សភ្លើងទៀន ១០២រូប និងគណបក្សផ្សេងៗទៀត ចំនួន ២រូប ៕
