ខេត្តកំពង់ធំ៖ ឯកឧត្តម ងួន រាសី អភិបាលរងខេត្តកំពង់ធំ ជាសមាជិកក្រុមប្រឹក្សា និងគណៈកម្មការស្វាយចន្ទីខេត្តកំពង់ធំ សូមកោតសរសើរ និងសូមសម្តែងនូវការអបអរសាទរដល់សមាគមស្វាយចន្ទីកម្ពុជា ដែលបានខិតខំស្វះស្វែងរកដៃគូរសហការ ទំនាក់ទំនងយ៉ាងសកម្មជាមួយវិនិយោគិនជាតិ និងអន្តរជាតិ 
ដើម្បីធ្វើឱ្យផលិតផលស្វាយចន្ទីមានដំណើរការល្អ និងមានកំណើនកើនឡើងជាលំដាប់ ជាពិសេសស្វាយចន្ទីនៅក្នុងខេត្តកំពង់ធំយើង បានកំពុងមានកេរ្តិ៍ឈ្មោះនៅបណ្តាប្រទេសក្នុងអាស៊ាន និងសកលលោក។
ការលើកឡើងនេះឯកឧត្តម ងួន រាសី អភិបាលរងខេត្ត ក្នុងវេទិកាជំនួបធុរកិច្ចរវាងក្រុមហ៊ុន CSNC ជាមួយសិប្បករ កសិករស្វាយចន្ទី និងកម្មវិធីចុះអនុស្សរណៈនៅសណ្ឋាគារគ្លររៀស ថ្ងៃទី២៨ ខែមករា ឆ្នាំ២០២៤
លោកអភិបាលរងខេត្តកំពង់ធំបានបន្តថា ខេត្តកំពង់ធំយើងនេះពិតជាមានភ័ព្វសំណាងដែលមានដីស្ថិតនៅលើទីតាំងភូមិសាស្រ្តល្អ និងអាកាសធាតុអំណោយផលចំពោះ ដំណាំស្វាយចន្ទី ដែលមានផ្ទៃដីដាំដុះស្វាយចន្ទី ១១៥.០២១ ហិចតា ឱ្យទិន្នផលជាមធ្យម ២០០.០០០តោន ឬ៣០% នៃផលិតកម្មស្វាយចន្ទីនៅក្នុងប្រទេសកម្ពុជា។ ខេត្តកំពង់ធំ មានសិប្បកម្មកែច្នៃ០៨កន្លែង ក្នុងនោះតូចមាន០៦ និងមធ្យមមាន២កំពុងសាងសង់ ដោយក្រុមហ៊ុនសឹង្ហបុរី និងក្រុមហ៊ុនជប៉ុន។
យោងតាមបាយការណ៍ឆ្នាំ២០២៣ កម្ពុជាសម្រេចបាន នូវការនាំចេញគ្រាប់ស្វាយចន្ទីមិនទាន់កែច្នៃទៅទីផ្សារអន្តរជាតិចំនួន៦៥៦.០០០តោន ថយចុះ៧%។ ដោយឡែកនាំចេញទៅប្រទេសវៀតណាមចំនួន៦១៨.០០០តោន ថយចុះ១៦% គិតជាទឹកប្រាក់៨៣៧លានដុល្លារអាមេរិក។
លោកអភិបាលរងខេត្តបន្ថែមថា គោលនយោបាយជាតិស្តីពីស្វាយចន្ទីបានកំណត់នូវយុទ្ធសាស្ត្រសំខាន់ចំនួន៣គឺ៖១-យុទ្ធសាស្រ្តនៃការផលិត ២-យុទ្ធសាស្រ្តនៃការកែច្នៃ ៣-យុទ្ធសាស្រ្តនៃការនាំចេញ។ អត្ថបទលោក ធូ កែវមុន្នី
