កំពង់ធំៈ ពិធីបុណ្យអុំទូក គឺជាបុណ្យជាតិ ត្រូវបានរាជរដ្ឋាភិបាល កំណត់ឲ្យមន្ត្រីរាជការ បុគ្គលិក កម្មករ និយោជិតក្រុមហ៊ុន សហគ្រាស ឈប់សំរាកពីការងារ និងគឺជាពិធីបុណ្យជាតិត្រូវបានអនុវត្តន៍តៗគ្នាគ្រប់ជំនាន់និងជាទំនៀមទំលាប់ប្រពៃណីខ្មែរផងដែរ។
ជាក់ស្តែងនៅក្នុងខេត្តកំពង់ធំ នាថ្ងៃទី១៩ ខែ តុលា ឆ្នាំ ២០១៤នេះ មានប្រារព្វពិធីបុណ្យអុំទូក ស្ថិតក្រោមអធិបតីភាព ឯកឧត្តម បណ្ឌិត ងួន ញ៉ិល អនុប្រធានទី២នៃសរដ្ឋសភា ព្រមទាំងឯកឧត្តម អ៊ុត សំអន អភិបាលនៃគណៈអភិបាលខេត្តកំពង់ធំ ប្រធាន អនុប្រធាន មន្ត្រីរាជការ កងកម្លាំង សិស្សានុសិស្ស ប្រជាពលរដ្ឋ គ្រប់ លំដាប់ មកពីទីជិត ទីឆ្ងាយ បានអញ្ជើញមក ចូលរួមរីករាយអបអរ បុណ្យអុំទូក រាប់ម៉ឺននាក់ មិនតែប៉ុណ្ណោះ ពិធីបុណ្យអុំទូកនេះ មានការផ្សាយបន្តផ្ទាល់ពីទូរទស្សន៍ខ្សែកាបអង្គរ ដើម្បីបំរើដល់បងប្អូន លោកយាយ លោកតា មីងមាដែលគាត់ ពុំបានអញ្ជើញមកទស្សនាផ្ទាល់ នៅក្នុងពិធីដ៏អធឹកអធ័មនេះ មានការបញ្ជាំងភាពយន្ត និងស្តង់លក់ទំនិញសម្រាប់ជូនដល់ប្រជាពលរដ្ឋ។
ពិធីប្រណាំងទូកនេះថ្ងៃនេះ ត្រូវបានចូលរួមប្រកួតចំនួន ៩គូរ ក្នុងនោះមានទូកចំណុះចំនួន ២២នាក់ និងទូក ចំណុះ ៧៩នាក់ ពីកីឡាករចំនួន៥៤១នាក់ លទ្ធផលដែលត្រូវបានទទួលជ័យលាភីថ្ងៃនេះ ទូកដែលទទួលបានលេខ១ចំនួន ៦ទូក នៃឆ្នាំនេះ គឺជាទូកខ្នាតអន្តរជាតិមានឈ្មោះដូចខាងក្រោម សំរិទ្ធសែនជ័យបារមីតេជោមាស ពាក់ផ្លាក់លេខ២ លេខ ទូកស្លែងកងជ័យ ពាក់ស្លាកលេខ ១៨ ទូកស្ទឹងសែនមានជ័យ ទូក ឡេងសំណាងស្រីសសែនជ័យ ទូកតាអោកតេជោសែនជ័យបារមីកំពង់ស្បូវ ទូកពិសិទ្ធមរកតលង្កាតេជោសែនជ័យ ទូកលេខ២ មានទូកឈ្មោះ សំអូនសែនជ័យបារមីមករា និង ទូកព្រះច័ន្ទកុមារថេរ៉ាសែនជ័យ ចំនែក ទូកចំណាត់ថ្នាក់លេខ ៣ ឈ្មោះទូក សែនសិរីបារមីសំរិទ្ធពេជ្រ និងទូក សស្អាតសែនជ័យបារមីបិណ្តីយ៍មានរិទ្ធព្រមទាំងទូកតេជោសែនជ័យ ។
នៅក្នុងពិធីឯកឧត្តម បណ្ឌិត ងួន ញ៉ិល អនុប្រធានទី២នៃរដ្ឋសភា បានមានមតិសំណេះសំណាល ផ្តាំផ្ទើរដល់ ក្រុមកីឡាករ ដែលបានប្រណាំងទូកនាថ្ងៃនេះ ដែលបានខិតខំប្រឹងប្រែងយកអស់ពីកំលាំងចិត្តកាយ ក្នុងទឹកចិត្តជាអ្នកកីឡា និងបានដណ្តើមយកជ័យជំនះ និងឈានបន្តទៅប្រឡងប្រណាំងនៅឯទីកក្រុងភ្នំពេញក្នុងពិធីបណ្ដែតប្រទីប ជាបុណ្យប្រពៃណីជាតិ ដែលប្រព្រឹត្តទៅ នៅវេលាយប់ថ្ងៃទី ១៤-១៥ កើត និង ១រោច ខែកក្ដិក ភ្ជាប់នឹងពិធីបុណ្យអុំទូក ដែលប្រព្រឹត្តទៅ នៅពេលថ្ងៃ មានកំណើតដំណាលគ្នានឹងពិធី
អុំទូក ដែលរីកចម្រើននៅក្នុងសង្គមខ្មែរ តាំងពីសម័យអង្គរដែរ ។នៅក្នុងឳកាសនោះឯកឧត្តម បណ្ឌិត ងួន ញ៉ិល បានជួយគាំទ្រទូកចំនួន ៣ និងបានផ្តល់អំណោយក្នុងការជួសជុល ខោអាវ ការហូបចុក សារ៉ុង បច្ច័យប្រគេនវត្ត ទាំង៣ ឧបត្ថម្ភថវិកាកីឡាក ឧបត្ថម្ភមីក្នុងពិធីសរុប ចំនួន ១៦,១០០,០០០រៀល ស្មើរនឹង ១១,៤២០ដុល្លា សហរដ្ឋអាមេរិក ។
ឯកឧត្តម បណ្ឌិតបានមានប្រសាសន៍ថា ប្រវត្តិសាស្ត្រខ្មែរដែលព្រះបាទជ័យវរ្ម័នទី ៧ បានចេញធ្វើសង្គ្រាមជើងទឹកបង្ក្រាបជាតិ បរទេសចាម ដោយប្រើកងទ័ពទូករំដោះក្រុងកម្ពុជា ឲ្យរួចផុតពីកណ្ដាប់ដៃខ្មាំងសត្រូវ ត្រូវបានបុព្វបុរសខ្មែរឆ្លាក់ទុក នៅលើជញ្ជាំងប្រាសាទបាយ័ន និងប្រាសាទបន្ទាយឆ្មារ ដែលមានរូបព្រះឆាយាលក្ខណ៍នៃព្រះបាទជ័យវរ្ម័នទី៧ ទ្រង់ឈរលើនាវាចម្បាំង កាន់ធ្នូរដំបង អមដោយកងទ័ពយ៉ាងច្រើនមហិមា បង្ក្រាបបានរាល់សង្គ្រាមឈ្លានពាន ដែលមានបំណងដណ្ដើមយកនូវសម្បត្តិជាតិ ដូនតាយើង មានកងទ័ពជាច្រើនផ្នែក ពិសេសគឺកងទ័ពជើងទឹកនេះឯង ។ ដោយ ប៊ុន រដ្ឋា
