ប្រធានាធិបតីរុស្ស៊ី លោកវ្ល៉ាឌីមៀរ ពូទីន និងសមភាគីអ៊ុយក្រែន លោកប៉េត្រូ ប៉ូរូ៉ឆេនកូ បានជួបគ្នាកាលពីថ្ងៃទី១៧ តុលា នៅទីក្រុងមីឡាន ប្រទេសអុីតាលី ដោយមានវត្តមានរបស់មេដឹកនាំអឺរុ៉បសំខាន់ៗ ។មេដឹកនាំទាំងពីរត្រូវបានប្រមុខរដ្ឋាភិបាលអុីតាលី លោក MATTEO RENZI ទទួល
ស្វាគមន៍នៅក្រុងមីឡាន ខាងក្រៅកិច្ចប្រជុំកំពូលអាស៊ី-អឺរុ៉ប ដែលបើកធ្វើនៅទីនោះកាលពីថ្ងៃទី១៦ តុលា ។
អធិការបតីអាល្លឺម៉ង់លោកស្រីអេនហ្សឺឡាម័រ កែល ប្រធានាធិបតីបារាំង លោកហ្វ្រង់ស្វ័រហូឡង់ នាយករដ្ឋមន្ត្រីអង់គ្លេស លោកដាវីដ កាមីរូ៉ន និងមេដឹកនាំសហភាពអឺរុ៉បលោក HERMAN VAN ROMPUY និងលោក JOSE MANUEL BARROSO ក៏ចូលរួមក្នុងការជួបគ្នានេះរវាងលោកពូទីន និងលោកបូ៉រូ៉ឆេនកូ ដែលសំដៅរកច្រកចេញដោយសន្តិវិធីនៃជម្លោះនៅអ៊ុយក្រែនដែរ ។
មុន នេះលោកពូទីន ដែលពេលមកដល់ក្រុងមីឡាន មានទឹកមុខញញឹមស្រស់ស្រាយបានជួបពិភាក្សាជាមួយលោកស្រីម័រកែល ផ្តោតលើចំណុចផ្សេងៗដែលនៅពុំទាន់អនុវត្តក្នុងក្របខណ្ឌនៃ កិច្ចព្រមព្រៀងទីក្រុងមីនស្ក៍ ពិសេសបទឈប់បាញ់គ្នាដែលនៅពុំទាន់គោរព ។
ពេលចេញពីពិធីជប់លៀងជូនជាកិត្តិយសដល់អ្នកចូលរួម ក្នុងកិច្ចប្រជុំកំពូលអាស៊ី-អឺរុ៉ប ASEM លើកទី១០ លោកបូ៉រ៉ូឆេនកូ គូសបញ្ជាក់កាលពីយប់ថ្ងៃទី១៦ តុលាថា ការជួបគ្នារបស់លោកជាមួយលោកពូទីន គឺផ្តោតសំខាន់លើសន្តិភាព និងស្ថិរភាពនៅអ៊ុយក្រែន ៕
