ខេត្តកំពត៖ អ្នករកសីុដឹកទំនិញតាមមធ្យោបាយគ្រប់ប្រភេទស្ថិតក្នុងតំបន់ច្រកទ្វារអន្តរជាតិព្រែកចាកបាននិងកំពុងមានការក្តៅក្រហាយនឹងសមត្ថកិច្ចប្រចាំព្រំដែន ទារលុយធ្ងន់ៗស្ទើលើសព្រំដែនកំណត់ ដែលធ្វើឲ្យពួកគាត់ជួបការលំបាកកាន់តែខ្លាំងផងដែរ។
ទាក់ទងនឹងបញ្ហាខាងលើ ក្រុមអ្នកដឹកទំនិញបានលើកឡើងដោយឆ្ងល់ថា ប៉ូលិសអន្តោប្រវេសន៍ទាមទារយកកម្រៃទ្វេរមួយជាពីរបែបនេះ បង់ចូលត្រឹមថ្នាក់ណា ចូលរដ្ឋឬចូលហោប៉ៅ ហើយការដែលតម្រូវឲ្យបង់ប្រាក់សុទ្ធតែលើសខ្ទង់ ដោយមិនឲ្យម្ចាស់រថយន្តណាម្នាក់រួចខ្លួនឡើយ។គេបានទម្លាយទៀតថា កាលពីលោក ហាន សុផល នៅគ្រប់គ្រងហាក់មិនសូវទាមទារយកកម្រៃដឹកជញ្ជូនឆ្លងកាត់ច្រកទ្វារច្រើនបែបនេះឡើយ ប៉ុន្តែចាប់តាំងពី
លោក ណុប សារឹម ឡើងមកគ្រប់គ្រង ស្រាប់តែមានការទាមទារយកកម្រៃធ្ងន់ៗបែបនេះតែម្តង ។លើសពីនេះគេបានកត់សម្គាល់ឃើញថា បន្ទាប់ពីលោក ណុប សារឹម ធ្វើជាប្រធានប៉ូលិសអន្តោប្រវេសន៍មិនបានប៉ុន្មានខែផងក៏ត្រូវបានអនុប្រធានប៉ុស្ត៌ដែលនៅទីនោះស្ទើដុះស្លែបានបង្វិលក្បាលឲ្យធ្វើនេះធ្វើនោះស្រេចតែចិត្ត ហើយនៅពេលថ្មីៗនេះឮថាលោក ណុប
សារឹម ប្រធានស្នាក់ប៉ូលិសអន្តោប្រវេសន៍ប្រចាំច្រកទ្វារអន្តរជាតិព្រែកចាកកំពុងតែស្តាប់បង្គាប់បញ្ជាកូនចៅ ទើបមានរឿងទាមទារយកលុយរថយន្តច្រើនៗបែបនេះ។
ពាក់ព័ន្ធនឹងការទាមទារកម្រៃលើសសេវាខាងលើនេះ នៅព្រឹកថ្ងៃទី២០ខែកញ្ញា ឆ្នាំ២០១៤កម្ពុជាថ្មី ពុំអាចសុំការបំភ្លឺពីលោក ណុប សារឹម ប្រធានប៉ុស្ត៌ប៉ូលិសអន្តោប្រវេសន៍ប្រចាំច្រកទ្វារអន្តរជាតិព្រែកចាកបានឡើយ៕
