ខេត្តក្រចេះ ៖ មន្ត្រីជំនាញ រដ្ឋបាលជលផលស្រុកព្រែកប្រសព្វ សហការជាមួយនិងកម្លាំងចម្រុះ រួមមានកម្លាំង អធិការដ្ឋានរដ្ឋបាលជលផលមេគង្គ អាជ្ញាធរ ស្រុក កម្លាំងប្រដាប់អាវុធទាំង៣ប្រភេទ រួមនិងសហគមន៍នេសាទបានចុះ ត្រួត ពិនិត្យ និងបង្ក្រាបឧបករណ៍នេសាទស្បៃមុងខុសច្បាប់ជាច្រើនកាលពីព្រឹក ថ្ងៃទី ១៩ ខែតុលា ឆ្នាំ២០១៤ នៅចំណុចបឹងកាហាត និងបឹងវែង ក្នុងឃុំឬស្សីកែវស្រុកព្រែកប្រសព្វ ខេត្តក្រចេះ។
ឧបករណ៍នេសាទរបាំងស្បៃមុងខុសច្បាប់ជាច្រើន ប្រភេទនិងរបាំងលប ណរ៉ាវសាច់អួននីឡុងជាច្រើន ត្រូវបានកម្លាំង សមត្ថកិច្ចជំនាញ ធ្វើការ ឆ្មក់ទៅបង្ក្រាប ដោយរឹបអូសបានខណៈ ដែលមានឈ្មួញក្រុមជនខិលខូចមួយចំនួនកំពុងឆ្លៀតឪកាសលបលួចធ្វើសកម្មភាពនេសាទខុសច្បាប់ ក្នុងរដូវកាលទឹក ទន្លេរមេគ្គងបាន ស្រក់ចុះយ៉ាងឆាប់រហ័ស ជាហេតុធ្វើឲ្យហ្វូងត្រី ធំតូចគ្រប់ ប្រភេទបានចរាចរណ៍ចេញពីបឹងចុះតាមដងព្រែកចូលទៅក្នុងទន្លេរ ក្នុងចំណុចទីតាំងខាងលើនេះ ។
នៅក្នុងប្រតិបត្តិកាណ៍ ការចុះបង្ក្រាបបទល្មើសជលផលក្នុងភូមិសាស្ត្រនោះ ជាលទ្ឋផល គឺកម្លាំងសមត្ថកិច្ចចម្រុះ ចាប់រឹបអូសនិងរុះរើបំផ្លាញចោល នូវរបាំង ស្បៃមុង និងរបាំងសាច់អួនក្រលាញឹក មានប្រវែងជាង១ពាក់ម៉ែត្រ លបស្បៃមុង ១២គ្រឿង លបសាច់អួន៥គ្រឿង បង្គោលឈើនិងចម្រឹងឬស្សីចំនួន២៣០ដើម ចាក់លែងត្រីចម្រុះចូលក្នុងទន្លេជាង៤០គីឡូក្រាម ដាយចាប់ត្រីតាមព្រែក មុខ ១០ម៉ែត្រ១វង់ និងដកហូតឧបករណ៍ឆក់ត្រីចំនួន១គ្រឿង អាគុយចំនួន០១ ដងឆក់០១គូ និងកន្ត្រង់ដងត្រី១ ។
លោក បែន ប៊ុណ្ណារ៉ាវុធ នាយផ្នែករដ្ឋបាលព្រែកប្រសព្វបានឲ្យដឹងថាសកម្មភាពនេសាទរបស់ក្រុមឈ្មួញគឺគេបានប្រើប្រាស់ឧបករណ៍ស្បៃមុងនិង របាំង សាច់អួនក្រឡាញឹក ដែលជាសកម្មភាពនេសាទខុសច្បាប់ ព្រោះថា វាអាចនិងបំផ្លិចបំផ្លាញហ្វូងត្រីទាំងធំទាំងតូច និងធ្វើឲ្យស្ទះទឹក បណ្តាលឲ្យ ប៉ះពាល់ដល់ការធ្វើស្រែប្រាំង និងដាំដុះដំណាំកសិកម្មរបស់ប្រជាពលរដ្ឋនៅជិត តំបន់បឹងព្រែកនោះទៀតផង ។
លោក កែម ហៀង អភិបាលរងស្រុកព្រែកប្រសព្វក៍បានបញ្ជាក់ឲ្យដឹងថា ក្នុងនាមអាជ្ញាធរស្រុកលោកត្រៀមសហការជានិច្ចជាមួយជាមួយគ្រប់ស្ថាប័ន ជំនាញដើម្បីចុះទប់ស្កាត់និងបង្ក្រាបបទល្មើសគ្រប់ប្រភេទ ជាពិសេសបទល្មើសជលផលសំដៅរួមចំណែកការពារធនធានធម្មជាតិឲ្យនៅគង់វង្ស និងដើម្បីបំរើ ផលប្រយោជន៍របស់ប្រជាពលរដ្ឋនៅតាមមូលដ្ឋានក្នុងការដាំដុះនិងដំណាំកសិកម្មរួមផ្សំជាច្រើនទៀតផងដែរ ។
