(ខេត្តព្រៃវែង) ព្រែកជីផុច ស្ថិតនៅភូមិក្រសាំងកន្ត្រែ ឃុំជីផុច ស្រុកមេសាង ខេត្តព្រៃវែង បច្ចុប្បន្នត្រូវបានអាជ្ញាធរឃុំស្រុកឃុបឃិតលក់ដីចំណីព្រែក និងដីចំណីផ្លូវ យកលុយចែកគ្នាដាក់ហោបៅធ្វើប្រងើយ មិនខ្វល់ទោះបីដឹងថាដីនេះជាចំណីព្រែករបស់រដ្ឋក៏ដោយ ធ្វើយ៉ាងណាអោយតែបានលុយទើបជាការប្រសើរ ។
ប្រភពខាងលើបានអោយដឹងទៀតថា អាជ្ញាធរឃុំជីផុច និងអាជ្ញាធរស្រុកមេសាងឃុបឃិតយកដីព្រែកទៅលក់ ហើយជួយសំរួលរត់ការឯកសារសុំទៅថ្នាក់លើ ដើម្បីសុំសិទ្ធិកាន់កាប់ដីព្រែកអោយទៅបុគ្គលមួយរូប រហូតបានសំរេច ។ នេះប្រហែលជាលោកអភិបាលស្រុកមេសាង ទទួលបានលាភសក្ការៈយ៉ាងក្រាស់ក្រែល ហើយមើលទៅ ដូច្នេះហើយបានជាដីព្រែកកាន់តែរួញតូចទៅៗ អាជ្ញាធរគ្មានយកចិត្តទុកបន្តិចសោះ ។
លោក ព្រុំ ឃឿន មេឃុំជីផុច បានប្រាប់កម្ពុជាថ្មីតាមទូរស័ព្ទអោយដឹងថា ដីចំណីព្រែកជីផុចនេះ ម្ចាស់ បានកាន់កាប់ធ្វើស្រែតាំងពីដូនតាមកម្ល៉េះ ចំណែកឃុំគ្មានលទ្ធភាពលក់ដីនេះ រឺក៏ប្រគល់អោយទៅបុគ្គលណា ម្នាក់ធ្វើកម្មសិទ្ធិផ្ទាល់ខ្លួននោះទេ ព្រោះដីព្រែក ជាដីរបស់រដ្ឋ ។ ចំណែកម្ចាស់ដី មានប័ណ្ណកាន់កាប់ប្រើប្រាស់ដីធ្លី គឺចេញពីខេត្តមកវិញ ឃុំអត់ដឹងអ្វីទាំងអស់ ។
លោក ញឹក សុថុន អភិបាលស្រុកមេសាង បានប្រាប់កម្ពុជាថ្មីអោយដឹងថា ដីនេះអាជ្ញាធរស្រុកគ្មាន ពាក់ព័ន្ធ ហើយក៏គ្មានលទ្ធភាពលក់ដីនេះដែរ ប៉ុន្តែម្ចាស់ដីបានសុំច្បាប់គ្រប់គ្រងធ្វើកម្មសិទ្ធិ គឺចេញពីខេត្តមកវិញ ចុះ ហត្ថលេខាដោយលោក ហាស់ សារ៉េត អភិបាលខេត្តព្រៃវែង ។
ទោះបីមានការអះអាងខាងលើយ៉ាងណាក៏ដោយ ប្រជាពលរដ្ឋនៅតែធ្វើការរិះគន់អាជ្ញាធរឃុំស្រុក មិន បានយកចិត្តទុកដាក់ថែរក្សាព្រែកនេះ បែជាឃុបឃិតយកដីចំណីព្រែកទៅលក់យកលុយចែកគ្នាដាក់ហោបៅ ធ្វើប្រងើយ ហើយឆ្លើយយករួចខ្លួនទៅវិញ ។ ទង្វើរបស់អាជ្ញាធរឃុំស្រុកគឺតែពីប្រយោជន៍ផ្ទាល់ខ្លួនបែបនេះ ធ្វើអោយប្រជាពលរដ្ឋ រិះគន់អស់ជំនឿ និងមានការថ្នាំងថ្នាក់យ៉ាងខ្លាំងទៅនឹងអាជ្ញាធរមូលដ្ឋាននេះផងដែរ ។
ពាក់ព័ន្ធករណីនេះផងដែរ កម្ពុជាថ្មីបានព្យាយាមធ្វើការទំនាក់ទំនង សុំការបំភ្លឺពីលោក ហាស់ សារ៉េត អភិបាលខេត្តព្រៃវែង ជុំវិញរឿងនេះផងដែរ តែមិនអាចទាក់ទងបាន ។
