ប៉ោយប៉ែត៖ នាព្រឹកមិញនេះលោក យិន ផល្លីនិងអ៊ីឃីម មេគយប្រចាំការនៅគល់ប្រាសាទនៃច្រកទ្វារអន្តរជាតិប៉ោយប៉ែតខេត្តបន្ទាយមានជ័យ បានបញ្ចេញស្នាដៃចាប់ទិញជិត១រទេះរបស់កម្មករក្រីក្រម្នាក់ឈ្មោះនាង ភេទប្រុស អាយុ៦០ឆ្នាំជនជាតិខ្មែរ មានលំនៅក្រុងប៉ោយប៉ែតខេត្តបន្ទាយមានជ័យ។
កម្មករដែលរងនូវការគៀបសង្កត់ពីមន្ត្រីគយឈ្មោះយិន ផល្លី និង អ៊ីឃីមបានឲ្យដឹងថា៖ រទេះរបស់គាត់មិនដែលបានដឹងទំនិញទេជិត១សប្តាហ៏ហើយ ព្រោះថៅកែធំៗគេជ្រេរយកអស់គាត់ថានៅព្រឹកមិញនេះ ស្ត្រីម្នាក់បានឲ្យគាត់ដឹកទឹកសូដារូបសឹង្ហចំនួន៣០កេសក្នុងតម្លៃ១កេស
៥០០រៀលដឹកពីផ្សាររោងក្លឿដីថៃ យកទៅផ្សារអគ្គថ្មីខាងភាគីកម្ពុជាចំងាយផ្លូវជាង៤គីឡូម៉ែត្រ ប៉ុន្តែពេលរទេះរបស់គាត់អូសដល់ចំណុចគល់ប្រាសាទច្រកអន្តរជាតិប៉ោយប៉ែតគយបានស្រែកឲ្យឈប់កាក់រទេះទាររកលិខិតនាំចូល គាត់ថាមិនមានទេព្រោះទំនិញទាំងនេះមិនមែនជារបស់ក្រុមហ៊ុននាំចូលឡើយគឺគាត់ដឹកឲ្យគេទិញយកទៅប្រើប្រាស់ គ្មានប្រាក់បង់ពន្ធទេ ព្រោះគាត់ស៊ីឈ្នួលដឹកឲ្យគេក្នុងតម្លៃ១កេសតែ៥០០រៀលប៉ុណ្ណោះ ។ភ្លាមនោះយិន ផល្លី និង អ៊ីឃីម បានបញ្ជាឲ្យចាប់យករទេះព្រមទាំងទំនិញយកទៅស្នាក់ការគយដើម្បីបង្គាប់ឲ្យពន្ធនាំចូលឲ្យបានត្រឹមត្រឹមទៅតាមអនុសាស្ត្រសម្តេចជេតោសែន ។
កម្មករដដែលបានបន្តទៀតថា៖រាល់សព្វមួយដងពេលគាត់ដឹកទំនិញមកដល់គល់ប្រាសាទហើយគឺខាងគយគេមកត្រួតពិនិត្យហើយបញ្ជាឲ្យកម្មករដូចជារូបគាត់ ចូលទៅក្នុងការិយាល័យបង់ប្រាក់នៅទីនោះ ទៅតាមចំនួនទំនិញតិចឬច្រើនប៉ុន្តែលើកនេះគយមិននិយាយអ្វីទាំងអស់ គឺចាប់យករទេះនិងទំនិញចូលទៅការិយាល័យគយបង្គាប់ឲ្យបង់ពន្ធនាំចូលពិន័យជាប្រាក់តាមអំពើចិត្តតែម្តង ។
លោកតាក្រីក្រដែលជាកម្មករបានលើកឡើងអ៊ូលដើមកថា៖ សព្វថ្ងៃនេះពួកគាត់ដែលជាកម្មករក្រីក្រគឺជិតដាច់ពោះស្លាប់ហើយ ព្រោះទំនិញក៏គ្មានដឹកពេលមានទំនិញបន្តិចបន្តួចដឹក គឺគយគេដេញចាប់បង្គាប់ឲ្យបង់ពន្ធ១០០% ។ចំណែកពួកអ្នកមានវិញគឺលោក យិន ផល្លីនិងអ៊ីឃីម បាននិយាយគ្នាត្រូវដងត្រូវផ្លែអស់ហើយដោយគ្រាន់តែប្រាប់ថា៖រទេះរបស់អ្នកនេះឬរបស់អ្នកនោះជាការស្រេចមិនចាំត្រួតពិនិត្យអ្វីទាំងអស់ គាត់ថា ចង់នាំយក្ខចូលមកពីប្រទេសសៀមក៏មិនអីដែរ។
ជាការពិតណាស់នៅរៀងរាល់ពេលល្ងាចគេបានឃើញថៅកែធំៗអ្នកម៉ៅការដឹកទំនិញពីដីសៀមមកកម្ពុជា ចូលទៅបង់លុយក្រោមតុជូនលោក យិន ផល្លី និងអ៊ីឃីមមិនដែលលោះខានឡើយ ។ ហើយប្រភពមួយទៀតបានឲ្យដឹងថា៖ លុយដែលពួកថៅកែយកទៅជូនយិន ផល្លី និងអ៊ីឃីមនោះ គឺជាលុយក្រៅផ្លូវការដែលជាកាដូលួងចិត្តទុកធើ្វមានធើ្វបានផ្ទាល់ខ្លួនតែប៉ុណ្ណោះ ។
បើបែបនេះមែននោះ វិធានទាំង០៤ចំណុចរបស់សម្តេចតេជោសែននាយករដ្ឋមន្ត្រីអាណត្តិទី០៥នេះនៅតែគ្មានប្រសិទ្ធភាពក្នុងការកែទម្រង់ឲ្យស៊ីជម្រៅកាត់បន្ថយអំពើពុករលួយរបស់មន្ត្រីថ្នាក់ក្រោម ព្រោះអំពើស៊កសៀតនៅតែកើតមានជាហូរហែរដូចជាករណីលោក យិន ផល្លី និងអ៊ីឃីមជាដើម ។ល។
នៅព្រឹកមិញនេះ លោក យិន ផល្លី និងអ៊ីឃីម មិនអាចទំនាក់ទំនងសុំការបំភ្លឺបានទេ ពាក់ពន្ធ័និងករណីចាប់រទេះអ្នកតូចរួចរទេះអ្នកធំកាលពីថ្ងៃទី០៦ខែមិនាឆ្នាំ២០១៤នេះ ។ចំណែក លោក ឈួន ហៃប្រធានការិយាល័យស្តីទីគយនិងរដ្ឋករ ច្រកទ្វារអន្តរជាតិប៉ោយប៉ែតក៏មិនអាចសុំការអធិប្បាយបានខណៈទូរសព្ទ័ចូលហើយគ្មានអ្នកលើក ។
