(កំពង់ធំ)÷ រដ្ឋបាលស្រុក ប្រាសាទបល្ល័ង ប្រារព្វពិធីទិវាជាតិនៃការចងចាំ២០ ឧសភា ដឹកនាំដោយ ឯកឧត្តម ជា វ៉ាន់ចាន់ អភិបាលរងខេត្ត និងជាអនុប្រធានក្រុមការងារ ចុះមូលដ្ឋានស្រុកប្រាសាទបល្ល័ង្ក ព្រះចៅអធិការវត្ត ប្រធាន អនុប្រធានមន្ទីរជុំវិញខេត្តកំពង់ធំ អភិបាលស្រុក មេឃុំ ក្រុមប្រឹក្សាឃុំ មេភូមិ សហភាពសហព័ន្ធយុវជន កងកម្លាំងទាំងបី លោកគ្រូអ្នកគ្រូ ប្រជាពលរដ្ឋ
និងសិស្សានុសិស្ស អញ្ជើញចូលរួម ទិវាជាតិនៃការចងចាំ២០ ឧសភា នៅវត្តស្រយ៉ូវ សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ព្រឹកថ្ងៃទី២០ ខែឧសភា ឆ្នាំ២០២៤។
ថ្លែងនៅក្នុងកម្មវិធីនេះ ឯកឧត្តម មានប្រសាសន៍ ពីទិវាជាតិនៃការចងចាំ ២០ ឧសភា ដល់អ្នកចូលរួមគឺ:ដោយប្រទេសកម្ពុជាជួបបញ្ហាសង្រ្គាម រយៈពេល០៣ឆ្នាំ ០៨ខែ ២០ថ្ងៃ ប្រជាជនកម្ពុជាមួយចំនួនត្រូវជម្លៀសចេញពីទីក្រុង លុបបំបាត់ចោលទាំងស្រុងនូវសេដ្ឋកិច្ចទីផ្សារសេរី លុបបំបាត់នូវការចាយលុយផ្សេងៗ បានបិទទ្វារសាលារៀន មន្ទីរពេទ្យ និងវត្តអារាម មិនមានដំណើរការសហការទូទាំងប្រទេស បានបោសសម្អាតភ្នាក់ងារចោរកម្ម ដាក់ពង្រាយកងទ័ពតាមព្រំដែន។ ស្របពេលប្រទេសជាតិជួបប្រទះគ្រោះអាសន្ន នៅមានឮសំឡេងឈឺចាប់ ខ្លោចផ្សា និងអស់សង្ឃឹមលាយឡំ នឹងទឹកភ្នែករបស់ប្រជាពលរដ្ឋ សំលៀកបំពាក់ខ្មៅតោកយ៉ាក រូបកាយស្គមស្គាំង ខ្វះជម្រក ខ្វះអាហារ មានផ្លូវអត់មនុស្សដើរមានជណ្ដើរអត់មនុស្សឡើង មានផ្ទះអត់មនុស្សនៅផងដែរ។
ឯកឧត្តម បញ្ជាក់ទៀតថា ដោយសារការដឹកនាំដ៏ឆ្លាតវៃរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានសន្តិភាព ទើបមានសេចក្តីសុខ សុភមង្គលនៅក្នុងក្រុមគ្រួសារ ប្រជាពលរដ្ឋរួចចាកផុតពីជាភាពក្រលំបាកដោយមានការខិតខំប្រឹងប្រែងរបស់រាជរដ្ឋាភិបាលកម្ពុជា។ ដោយសារប្រទេសជាតិរួចពីសង្គ្រាមទើបមាននយោបាយឈ្នះ ឈ្នះ ដើម្បីឲ្យប្រទេសជាតិមានសុខសន្តិភាពយូរអង្វែង សូមបងប្អូនប្រជាពលរដ្ឋត្រូវចេះការពារសន្តិភាពឲ្យបានគ្រប់គ្រាន់ ពិសេសកុំបំផ្លាញសុភមង្គលក្រុមគ្រួសាររបស់ខ្លួន ណែនាំដល់កូនចៅឲ្យដឹងពីទុក្ខលំបាករបស់បងប្អូន ពីសម័យសង្គ្រាមធ្វើឱ្យបងប្អូនយើងឈឺចាប់យ៉ាងខ្លាំងមិនអាចបំភ្លេចបាន។
ជាចុងក្រោយ ឯកឧត្តម បានលើកទឹកចិត្តដល់អ្នកចូលរួមទាំងអស់ ពីទិវានៃការចងចាំនេះសូមចូលរួមថែរក្សា និងការពារសុខសន្តិភាពឱ្យបានគង់វង្ស កុំឲ្យកើតឡើងមានបន្តទៀត មានសុខសន្តិភាព គឺធ្វើឲ្យប្រទេសជាតិមានការអភិវឌ្ឍគ្រប់លំដាប់ ជាមូលដ្ឋានគ្រឹះ សុខដុមរមនា រួមសុខរួមទុក្ខជាមួយប្រជាជនទូទាំងប្រទេសជាតិកម្ពុជាទាំងមូល។ រាជរដ្ឋាភិបាលកម្ពុជា បានរៀបចំទិវាជាតិនៃការចងចាំនេះ ដើម្បីឲ្យបងប្អូនប្រជាពលរដ្ឋ បានយល់ បានដឹង ជាព្រឹត្តិការណ៍ធ្វើឡើងជារៀងរាល់ឆ្នាំ ចាត់ទុកជាប្រវត្តិសាស្ត្រ រក្សាទុកឲ្យក្មេងជំនាន់ក្រោយបានស្គាល់ពីប្រវត្តិសាស្រ្តដ៏លំបាកដែលប្រទេសកម្ពុជាជួបនឹងសង្គ្រាម។ អត្ថបទដោយ ថុង ពលរិទ្ធី
