ពោធិសាត់ៈតាមសេចក្តីរាយការណ៍ ពីប្រជាពលរដ្ឋនេសាទ នៅបឹងទន្លេសាប ក្នុងភូមិកំពង់ថ្គោល និងភូមិកំពង់លួង ក្នុងស្រុកក្រគរ គេសង្កេតឃើញមានបទល្មើសនេសាទេជាច្រើន ការចិញ្ចឹមត្រីរ៉ស់ ត្រីឆ្តោ និងឧបករណ៍ដាក់ឆ្នុក ប្រើអំពូលភ្លើង សម្រាប់ចាបើកូនត្រីចំរុះ ធ្វើជាចំណីត្រីចិញ្ចឹម ពុំទាន់ឃើញមានចំណាត់ការ ពីសំណាក់សមត្ថកិច្ច ជាពិសេសមន្ត្រីជំនាញប្រចាំការ នៅតាមបណ្តាស្នាក់ការមួយចំនួន ។
ប្រភពពត៌មានខាងលើ បានបន្តថា ការកើតមានបទល្មើសនេសាទចិញ្ចឹមត្រីរ៉ស់ ត្រីឆ្តោ និងប្រើប្រាស់ឧបករណ៍ទ្រង់ទ្រាយធំ ចំណាយដើមទុនរាប់សិបលានរៀល ទើបអាចធ្វើបាន ។ បទល្មើសឆ្នុក ប្រើអំពូលភ្លើងខុសច្បាប់នេះ កំពុងកើតមានពេញបន្ទុក ក្នុងស្រុកក្រគរ និងស្រុកកណ្តៀង ខេត្តពោធិសាត់ ។
ប្រភពបន្តខាងលើ បានបន្តឲ្យដឹងទៀតថា ការដាក់ឆ្នុកយកកូនត្រីចំរុះ មកធ្វើជានុយ ឲ្យត្រីឆ្តោស៊ីបែបនេះ គឺដោយសារមានការនាំចូលកូនត្រី ពីប្រទេសវៀតណាម ស្ទើគ្រប់ផ្ទះ ចាប់ពីភូមិកំពង់លួង រហូតដល់ឃុំរាំងទិល ស្រុកកណ្តៀង ដោយក្រុមដដែលនេះ បានប្រើឧបករណ៍ ដែលរាជរដ្ឋាភិបាល ហាមឃាត់ មិនអោយប្រ់ឧបករណ៍ប្រភេទនេះ ប៉ុន្តែអ្នករកស៊ីបទល្មើសទាំងនេះ មិនព្រមគោរពទៅតាមច្បាប់សារាចរណ៍ ណែនាំពីរាជរដ្ឋាភិបាលទេ ហើយបទល្មើសដាក់ឆ្នុករាប់ពាន់កន្លែង នៅលើផ្ទៃបឹងទន្លេសាបបែបនេះ មិនទាន់មានការអន្តរាគមន៍ទ្រង់ទ្រាយធំ ពីជំនាញមន្ត្រីណាមួយ នៅឡើយទេ តាំងពីរដូវបិទរហូតដល់រដូវបើកនេសាទ ។
សូមបញ្ជាក់ថា បទល្មើសនេសាទ កើតមាននៅក្នុងស្រុកទាំងពីរនេះ សមត្ថកិច្ចពាក់ព័ន្ធដឹងច្បាស់ ហើយជាពិសេស ចំពោះប្រជាពលរដ្ឋ រកស៊ីជាលក្ខណៈគ្រួសារវិញ បានរិះគន់ថា ពួកគាត់ដាក់មង ចងសន្ទូច គ្មានត្រីហូបទេ ហេតុអ្វីបានជាមន្ត្រីជំនាញជលផលខ្លះ និយាយថា ត្រីមួយឆ្នាំទៅមួយឆ្នាំកើនឡើងរាប់សិបតោន ឬមួយជារបាយការណ៍ បំភាន់ភ្នែករាជរដ្ឋាភិបាល បើសិនជាមន្ត្រីទាំងអស់នោះ អនុវត្តតាមបទបញ្ជា០១របស់រាជរដ្ឋាភិបាល ប្រហែលជាមច្ឆាជាតិ នឹងមិនមានការខ្វះខាត និងមិនបាត់បង់ឡើយ ៕
