(កំពង់ធំ)៖ ឯកឧត្តម រស់ សារាំ ព្រះរាជអាជ្ញាអមសាលាដំបូងខេត្តកំពង់ធំ បានថ្លែងថា ការប្រគេនទៀនវស្សាដល់ព្រះសង្ឃ គឺជាប្រពៃណីដែលមានតាំងពីយូរយារណាស់មកហើយក្នុងប្រទេសកាន់ព្រះពុទ្ធសាសនាជាច្រើន ក៏ដូចជាប្រពៃណីសាសនា និងវប្បធម៌ផ្សេងទៀត។ 
ការប្រគេនទានវស្សាដល់ព្រះសង្ឃត្រូវធ្វើដោយចិត្តស្មោះស្ម័គ្រ និងគោគោរពទៅតាមជឿនឿព្រះពុទ្ធសាសនា រួមបញ្ចូលទាំងការប្រគេនចង្ហាន់ និងសម្ភារចាំបាច់ផ្សេងៗដល់ព្រះសង្ឃសម្រាប់អុជបំភ្លឺសូត្រធម៌នៅក្នុងព្រះវិហារ។
នៅរសៀលថ្ងៃទី១៨ ខែកក្កដា ឆ្នាំ២០២៤ អយ្យការអអមសាលាដំបូងខេត្តកំពង់ធំ បាននាំយកទេយ្យវត្ថុ និងគ្រឿងបរិក្ខារ យកទៅប្រគេនជូនដល់ព្រះចៅអធិការវត្តរលួសទទួលបាន៖ ទៀនព្រះវស្សា១គូ ផ្លែឈើ ទឹកសុទ្ធ ទឹកក្រូច អង្ករ ទឹកត្រី ទឹកស៊ីអ៊ីវ តែ ស្ករស ទឹកដោះគោ ត្រីខកំប៉ុង និងមី ព្រមទាំងបច្ច័យផងដែរ។
ឯកឧត្តមព្រះរាជ្ញាបានបន្តថា ការចូលកាន់ព្រះវស្សា គឺជាបុណ្យមួយដែលមានសារ:សំខាន់ក្នុងព្រះពុទ្ធសាសនា ជាពេលវេលាដ៏សំខាន់សម្រាប់ភិក្ខុសង្ឃ និងសាមណេរបានរៀនធម៌ និងវិន័យឱ្យបានខ្ជាប់ខ្ជួនតាមពុទ្ធឱវាទរយៈពេល៣ខែ ចាប់ផ្តើមពីថ្ងៃ០១រោច ខែអាសាឍ ដល់ថ្ងៃ១៥កើត ខែអស្សុជ។ ការប្រគេនទៀនព្រះវស្សាព្រមទាំងគ្រឿងឧបភោគបរិភោគ និងបច្ច័យយកមកប្រគេនព្រះសង្ឃនាពេលនេះ ដើម្បីព្រះសង្ឃយកទៅដុតបំភ្លឺបូជាថ្វាយព្រះ និងសិក្សារៀនសូត្រនូវគម្ពីរធម៌ វិន័យព្រះសម្មាសាម្ពុទ្ធ ព្រះបរមគ្រូនៃយើង។
សូមបញ្ជាក់ថាឯកឧត្តម រស់ សារាំ ព្រះរាជអាជ្ញាអមសាលាដំបូងខេត្តកំពង់ធំ តែងតែដឹកនាំគណៈប្រតិភូ និងមន្រ្តីរាជការគ្រប់លំដាប់ថ្នាក់ ក្រោមឱវាទ ចូលរួមចំណែកដល់ការទ្រទ្រង់ព្រះពុទ្ធសាសនា ជាសាសនារបស់រដ្ឋ ដែលប្រជាជនភាគច្រើននៅកម្ពុជាគោរពប្រណិប័តន៍តាម។ ដោយហេតុថាព្រះពុទ្ធសាសនា បានផ្តល់ការអប់រំផ្លូវចិត្តឱ្យប្រព្រឹត្តនូវអំពើល្អ ចេះស្រឡាញ់រាប់អាន ចេះជួយយកអាសារ មានសាមគ្គីភាព និងនាំឱ្យសង្គមរស់នៅ ប្រកបដោយសុខដុមរមនា ក្រោមម្លប់សន្តិភាពផងដែរ៕ដោយវេហាស៍
