រាជធានីភ្នំពេញ ៖ កាប៊ីនភ្លើងមួយកន្លែងបានផ្ទុះឆេះបង្កអោយមានការភ្ញាក់ផ្អើលដល់ប្រជាពលរដ្ឋរស់នៅក្បែរនោះ ត្រង់ចំណុចផ្លូវលេខ២៣០ បង្គោលលេខ៥ កាលពីវេលាម៉ោង៩និង៣៥នាទីថ្ងៃទី៦ខែមិនាឆ្នាំ២០១៤ ស្ថិតក្នុងសង្កាត់ទឹកល្អក់៣ ខណ្ឌទួលគោក។ ប្រភពព័ត៌មានពីប្រជាពលរដ្ឋរស់នៅក្បែរកន្លែងកើតហេតុបានឱ្យដឹងថា នៅវេលាម៉ោងកើតហេតុខាងលើគាត់បានឮសូរសម្លេងផ្ទុះមួយ រួចគាត់បានចេញមកមើលក៏ឃើញកាប៊ីនភ្លើងឆ្លងចរន្តអគ្គិសនីឆេះចេញអណ្ដាតភ្លើង គាត់ក៏បានរាយការណ៍ប្រាប់សមត្ថកិច្ចដើម្បីសុំការអន្តរាគមន៍ ភ្លាមៗនោះរថយន្តពន្លត់អគ្គិភ័យរបស់ខណ្ឌទួលគោកចំនួន២គ្រឿងបានមកដល់កន្លែងកើតហេតុភ្លាមៗ ប៉ុន្តែមិនទាន់បាញ់ពន្លត់នោះទេ ព្រោះខ្លាចឆ្លងចរន្តអគ្គិសនីឆក់បណ្ដាលអោយមានគ្រោះថ្នាក់ដោយសារតែមិនទាន់បានបិទបារ៉ែភ្លើង។
បន្ទាប់មកប្រជាជនដែលនៅក្បែរនោះបានយកបំពង់ពន្លត់អគ្គិភ័យ៥-៦បំពង់តាមផ្ទះដែលមានយកមកបាញ់ពន្លត់ប្រមាណជា១០នាទីអណ្ដាតភ្លើងនៅក្នុងកាប៊ីនភ្លើងក៏បានរលត់ប៉ុន្តែចរន្តអគ្គិសនីនៅតែមាន សមត្ថកិច្ចក៏បានទំនាក់ទំនងហៅខាងអគ្គិសនីកម្ពុជាមកត្រួតពិនិត្យមើលដើម្បីផ្ដាច់ចរន្តអគ្គិសនី។
ក្រោយពេលផ្ដាច់ចរន្តអគ្គិសនីរួចសមត្ថកិច្ចក៏បានប្រើរថយន្តពន្លត់អគ្គិភ័យបាញ់ទឹកពន្លត់បន្ថែមទៀតដើម្បីធានាថារលត់ទាំងស្រុង។ នៅវេលាម៉ោង៩និង៥០នាទីសមត្ថកិច្ចក៏បានគ្រប់គ្រងស្ថានការបានទាំងស្រុង។ ប្រជាពលរដ្ឋដែលរស់នៅក្បែរកន្លែងកើតហេតុមានការព្រួយបារម្ភជាខ្លាំង និងបានសំណូមពរដល់អគ្គីសនីកម្ពុជាជួយពិនិត្យនិងធ្វើការផ្លាស់ប្តូរកាប៊ីននេះទៅកន្លែកផ្សេងផង ព្រោះរាល់យប់មានឮសម្លេងរោទ៍មិនឈប់ បង្កអោយមានការភ្ញាក់ផ្អើលក៏ដូចជារំខានដល់ការរស់នៅរបស់គាត់ជាខ្លាំង៕
