គណកម្មាធិការ រួមនៃរដ្ឋសភា សហភាពមីយ៉ាន់ម៉ា កាលពីថ្ងៃពុធ ទី២២ ខែតុលា បាន បើកការពិភាក្សាគ្នាលើវិសោធនកម្មរដ្ឋធម្មនុញ្ញ ជំពូកមួយ ដែលក្នុងនោះអាចនឹងរារាំង មេដឹកនាំគណបក្សប្រឆាំងលោកស្រី អ៊ុងសាន ស៊ូជី មិនឲ្យឈរឈ្មោះជាបេក្ខជនប្រកួត ប្រជែងតំណែងយកប្រធានាធិបតី នាអណត្តិក្រោយឡើយ។
ទីភ្នាក់ងារព័ត៌មានជប៉ុន ក្យូដូ ចេញផ្សាយនៅថ្ងៃព្រហស្បតិ៍ ទី២៣ ខែតុលា នេះទៀតថា គណកម្មាធិការបានរៀបចំនូវរបាយការណ៍ ១១៦ ទំព័រទៅដល់សភា ដោយក្នុងនោះបញ្ជាក់ថា សមាជិកសភា ដែលរក្សានៅដូចដើមចំណោះការបែងចែកប្រកបដោយចម្រូងចម្រាស់ ក្នុង
ជំពូកនៃធម្មនុញ្ញ ក្នុងនោះរួមមានការកំណត់សិទ្ធិដែលអាចឈរឈ្មោះជាបេក្ខជន ប្រធានាធិបតី និង កៅអីយោធាក្នុងសភា ត្រូវតែមាន ១ភាគបី ក្នុងសភាជាន់ទាប និង ជាន់ ខ្ពស់ ដោយមិនចាំបាច់មានការបោះឆ្នោត។
រដ្ឋធម្មនុញ្ញដែលត្រូវបានអនុម័ត នៅពេលដែលប្រទេសនេះនៅស្ថិតក្នុងរបបយោធានៅឡើយ ក្នុងឆ្នាំ ២០០៨ គឺហាមឃាត់មិនឲ្យបុគ្គលណាមួយក្លាយជាបេក្ខជនសម្រាប់ការជ្រើសតាំងធ្វើ ជាប្រធានាធិបតី ដោយសមាជិកសភា ប្រសិនបើញាតិសណ្តានជិតស្និតរបស់លោក ឬ អ្នក ឈរឈ្មោះនោះ គឺជាជនបរទេស។
គួរបញ្ជាក់ថា លោកស្រី ស៊ូជី វ័យ ៦៩ឆ្នាំ គឺជាភរិយានៃជនជាតិអង់គ្លេសមួយរូប ហើយអ្នក ទាំងពីរបានបង្កើតកូនប្រុសចំនួនពីររូប ដែលសុទ្ធសឹងតែមានសញ្ជាតិ អង់គ្លេស។ លោកស្រី ស៊ូជី ក៏ធ្លាប់បានប្រកែកតវ៉ា ឲ្យមានការផ្លាស់ប្តូរនូវច្បាប់កំណត់បែបនោះដែរ ប៉ុន្តែគណបក្ស ដឹកនាំដែលមានយោធានៅពីក្រោយខ្នងបានច្រានចោលជារឿយៗ ដោយគេចង់រក្សានូវការ អនុវត្តបែបនេះដដែល៕
