កំពង់ចាម: ខណ្ឌរដ្ឋបាលជលផលកំពង់ចាម សហការជាមួយ អធិការដ្ឋានរដ្ឋបាលជលផលមេគង្គ អាជ្ញាធរស្រុកកងមាស និងកម្លាំងប៉ុស្តិ៍នគរបាលរដ្ឋបាលព្រែកកុយ ដោយមានការអនុញ្ញាតពីសាលាដំបូងខេត្តកំពង់ចាម នាថ្ងៃទី២៩ ខែកក្កដា ឆ្នាំ២០២៤នេះ បានចុះប្រតិបត្តិការបង្រ្កាបបទល្មើសជលផល បានចំនួន ៤ករណី ព្រមទាំងបានបំផ្លាញចោលនូវឧបករណ៍ខុសច្បាប់ និងពន្លែងកូនត្រីចូលក្នុងបឹងធម្មជាតិវិញផងដែរ។
មន្ត្រីខណ្ឌរដ្ឋបាលជលផលខេត្តកំពង់ចាម បានឲ្យដឹងថា ការចុះបង្ក្រាបនេះ កម្លាំងសមត្ថកិច្ចចម្រុះបានធ្វើការកសាងសំណុំរឿងតាមនិតិវិធីច្បាប់ស្តីពីជលផល និងចុះរុះរើកាប់បំផ្លាញចោលវត្ថុតាងនៃបទល្មើសជលផលនៅនឹងកន្លែងកើតហេតុរួមមាន៖ -ករណីទី១ ឧបករណ៍ដាយស្បៃមុងចំនួន ៥មាត់ ទំហំ ៤x២x១១ម៉ែត្រ នៅចំណុចព្រែកមេស ឃុំព្រែកកុយ ស្រុកកងមាស ខេត្តកំពង់ចាម។
ករណីទី២ ឧបករណ៍ដាយស្បៃមុងចំនួន ៣មាត់ ទំហំ ៤x២x១១ម៉ែត្រ នៅចំណុចតាមដងស្ទឹងឆ្វេង ឃុំច្បារអំពៅ ស្រុកបាធាយ ។ ករណីទី៣ ឧបករណ៍លូស្បៃមុង ចំនួន ១២មាត់ -របាំងស្បៃមុងប្រវែង ២៤០ម៉ែត្រ -បង្គោលចម្រឹងចំនួន ១៨០ដើម -ចាក់លែងកូនត្រីចម្រុះទម្ងន់ ៦គីឡូក្រាម នៅចំណុចព្រែកខ្លាក្រទាម ស្រុកកងមាស ខេត្តកំពង់ចាម។ ករណីទី៤ ឧបករណ៍លូស្បៃមុងចំនួន ៦មាត់ -របាំងស្បៃមុងប្រវែង ១២០ម៉ែត្រ -បង្គោលចម្រឹងចំនួន ៩០ដើម -ចាក់លែងកូនត្រីចម្រុះទម្ងន់ ៣គីឡូក្រាម នៅចំណុចបឹងផ្សារ ឃុំច្បារអំពៅ ស្រុកបាធាយ ខេត្តកំពង់ចាម ៕
