ដោយ វេហាស៍
(កំពង់ធំ)÷ នៅរសៀលថ្ងៃទី៣០ ខែកក្កដា ឆ្នាំ២០២៤ គណៈកម្មការការពារ ទប់ស្កាត់ និងបង្ក្រាបបទល្មើសធនធាន ក្នុងភូមិសាស្ត្រខេត្តកំពង់ធំ បានដំណើរការកិច្ចប្រជុំបូកសរុបលទ្ធផលសកម្មភាពការងារការពារ ទប់ស្កាត់ និងបង្ក្រាបបទល្មើសធនធានធម្មជាតិ រយៈ
ពេល៣ខែ ដោយគិតពីថ្ងៃទី១ ខែឧសភា ដល់ថ្ងៃទី៣០ ខែកក្កដា ឆ្នាំ២០២៤ ។ ដែលកិច្ចប្រជុំនេះស្ថិតក្រោមអធិបតីភាពឯកឧត្តម នួន ផារ័ត្ន អភិបាលខេត្ត ប្រធានគណបញ្ជាការឯកភាពរដ្ឋបាលខេត្ត និងជាប្រធានគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជតិ ខេត្តកំពង់ធំ ។
លោកវារសេនីយ៍ឯក សោម សុភាវុធ មេបញ្ជាការរង នាយសេនាធិការ តំបន់ប្រតិបត្តិការសឹករងកំពង់ធំ ក្នុងនាមក្រុមលេខាធិការដ្ឋាន គណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិ បានឡើងធ្វើរបាយការណ៍សង្ខេបស្តីពីលទ្ធផលសំខាន់ៗ មួយចំនួន ក្នុងការការពារទប់ស្កាត់ និងបង្ក្រាបបទល្មើសធនធាន ធម្មជាតិ ដែលក្នុងរបាយការណ៍បានវាយតម្លៃចំណុចខ្លាំង ចំណុចខ្សោយ និងបទពិសោធន៍មួយចំនួន ក្នុងការអនុវត្តសកម្មភាពតាមផែនការរបស់គណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំ ក្នុងរយៈពេល បី ខែកន្លងទៅ ។
ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍គណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំ បានឡើងគូសបញ្ជាក់អំពីកិច្ចខិតខំប្រឹងប្រែងរបស់កងកម្លាំងចម្រុះដែលបានបំពញភារកិច្ចក្នងរយៈពេលបីខែនេះ ទទួលបានលទ្ធផលជោគជ័យ គួរជាទីមោទនៈ គឺ : ទី១ យើងទប់ស្កាត់បាន ដោយមិនឲ្យមានការកាប់បំផ្លាញ់ធនធានធម្មជាតិជាថ្មី នៅលើទឹកដី ខេត្តកំពង់ធំ។ទី២ យើងរកឃើញផ្ទៃដី ដែលបានកាប់ទន្ទ្រានដោយជនល្មើស នៅរដូវប្រាំងកន្លងទៅជាង១.៤០០ហិកតា ព្រមទាំងរឹបអូសបានវត្ថុតាងមួយចំនួន ដែល បច្ចុប្បន្នយើងកំពុងគ្រប់គ្រង និងស្រាវជ្រាវវែកមុខរកជនល្សញ្ញាជនល្មេីសដើម្បីកសាងសំណុំរឿងបញ្ជូនទៅតុលាការ ផ្តន្ទាទោស តាមច្បាប់ ជាធរមាន។
នៅក្នុងឱកាសនេះដែរ ឧត្តមសេនីយ៍ទោ សោម ស៊ុន បានថ្លែងអំណរគុណចំពោះចំពោះសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថ្នាក់ដឹកនាំគ្រប់លំដាប់ថ្នាក់ នៃកងយោធពលខេមរភូមិន្ទ និងឯកឧត្តម អភិបាល នៃគណៈអភិបាលខេត្តកំពង់ធំ ដែលបានជួយគាំទ្រគ្រប់បែបយ៉ាងដល់កងកម្លាំងចម្រុះ ក្នុងសកម្មភាពការពារ ទប់ស្កាត់ និងបង្ក្រាបបទល្មើសធនធានធម្មជាតិ ក្នុងរយះពេលបីខែកន្លងទៅនេះ មានដូចជា គ្រឿងឧបភោគបរិភោគ ប្រេងឥន្ធនៈ សម្ភារៈ និងថវិកាមួយចំនួន ដើម្បីបម្រើឲ្យការធ្វើសកម្មភាពនេះ ទទួលបានជោគជ័យ ។
ឯកឧត្តម នួន ផារ័ត្ន អភិបាលខេត្ត ប្រធានគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំ បានឡើងថ្លែងអំណរគុណចំពោះកងកម្លាំងចម្រុះទាំងអស់ ដែលបានខិតខំបំពេញភារកិច្ច ក្នុងការការពារទប់ស្កាត់ និងបង្ក្រាបបទល្មើសធនធានធម្មជាតិ ទាំងក្នុងរដូវប្រាំង និងក្នងរដូវស្សានេះ ដើម្បីបុព្វហេតុជាតិ និងប្រជាជនយើង ។ ហេីយឯកឧត្ដមបានប្រគល់ភារកិច្ចសំខាន់ៗមួយចំនួន មានជាអាទិ៍ ទីមួយ ត្រូវបន្តការពារ ឲ្យបាន មិនឲ្យមានការកាប់ទន្ទរានធនធានធម្មជាតិជាថ្មីម្តងទៀតបានជាដាច់ខាត ។ ទីពីរ ត្រូវគ្រប់គ្រងផ្ទៃដី ដែលបានកាប់ទន្ទ្រានខុសច្បាប់កន្លងមកឲ្យបានហ្មត់ចត់ និងពិនិត្យស្រាវជ្រាវរកជនល្មេីសដើម្បីកសាងសំណុំរឿង អនុវត្តតាមនិតិវិធីច្បាប់ដោយគ្មានការលេីកលែងឡេីយ។ និងទ៣ ស្ថានប័នជំនាញ កសិកម្ម និងបរិស្ថាន ត្រូវរៀបចំគម្រោងដាំដើមឈើឡើងវិញ ទាំងនៅលើដីដែលបានកាប់ទន្ទ្រានកន្លងទៅដើម្បីរក្សាធនធានធម្មជាតិ ស្តាព្រៃឈើឡើងវិញ ទទុកឲ្យកូនចៅយេីងនៅជំនាន់ក្រោយៗទៀត។ 
