ខេត្តស្ទឹងត្រែង៖ ការជំរុញរបស់រដ្ឋមន្ត្រីក្រសួងបរិស្ថាន លោកបណ្ឌិត អ៊ាង សុផល្លែត ដល់ថ្នាក់ដឹកនាំ នៃមន្ទីរបរិស្ថានខេត្ត នៅក្នុងឱកាសដែលលោករដ្ឋមន្ត្រី បានអញ្ជើញចុះជួបសំណេះសំណាល និងសួរសុខទុក្ខថ្នាក់ដឹកនាំ និងមន្រ្តីនៃមន្ទីរបរិស្ថានខេត្តស្ទឹងត្រែង នារសៀលថ្ងៃទី៣០ ខែកក្កដា ឆ្នាំ២០២៤ នៅមន្ទីរបរិស្ថានខេត្តស្ទឹងត្រែង។
លោកបណ្ឌិត អ៊ាង សុផល្លែត បានបន្តជំរុញថ្នាក់ដឹកនាំ និងមន្រ្តីមន្ទីរបរិស្ថានខេត្ត ក៏ដូចមន្ត្រីក្រសួងបរិស្ថាន រួមសហការជាមួយអាជ្ញាធរគ្រប់ថ្នាក់ និងដៃគូរពាក់ព័ន្ធ ដើម្បីប្រសិទ្ធភាពនៃការគ្រប់គ្រងធនធានធម្មជាតិ និងបរិស្ថាន ជាពិសេសសម្អាតប្លាស្ទិកនៅលើគោក ក្នុងទឹក និងលើអាកាស ដើម្បីធ្វើយ៉ាងណាមិនឱ្យមានការបំពុលទៅដល់ជីវៈចម្រុះ។
លោករដ្ឋមន្ត្រីក្រសួងបរិស្ថាន បានជំរុញបន្ថែម ឲ្យពង្រឹងការអនុវត្តច្បាប់ ១០០ភាគរយ ក្នុងការការពារ និងអភិរក្សធនធានធម្មជាតិ ការផ្តល់សម្ភារ និងផែនទី សម្រាប់ពង្រឹងការគ្រប់គ្រងធនធានធម្មជាតិ និងបរិស្ថាន រួមការសហការជាមួយសមត្ថកិច្ចពាក់ព័ន្ធ ជាពិសេសជាមួយកងរាជអាវុធហត្ថលើផ្ទៃប្រទេស និងអង្គភាពប្រឆាំងអំពើពុករលួយ ការដាំកូនឈើ និងស្តារព្រៃឈើ ដើម្បីភាពបៃតង ដែលជាចំណែក នៃការរកប្រាក់ចំណូលបន្ថែម របស់ប្រជាសហគមន៍ ជួយឱ្យមានការអភិវឌ្ឍដោយចីរភាព រក្សាបាននូវអព្យាក្រឹតកាបូន និងសម្រេចបានគោលដៅជាប្រទេសមានគម្របព្រៃ ៦០ភាគរយ នៅឆ្នាំ២០២៥ ខាងមុខនេះ ៕ដោយ៖ឡុង សំបូរ
