សៀមរាប ៖ នៅព្រឹកថ្ងៃទី ០៧ ខែ មីនា ឆ្នាំ២០១៤ នៅខេត្តសៀមរាប មានប្រារព្ធធ្វើពីធីអបអរសាទរខួបលើកទី១៦ នៃ ទិវាវប្បធម៌ជាតិ០៣ មីនា ឆ្នាំ២០១៤ ក្រោមអធិបតីភាពឯ.ឧ ថៃ នរៈសត្យា រដ្ឋលេខាធិការក្រសួងវប្បធម៌និងវិចិត្រសល្បះ និង ឯ.ឧ ឃឹម ប៊ុនសុង អភិបាលនៃគណៈអភិបាលខេត្តសៀមរាប ដែលធ្វើឡើងនៅសាលមហោស្រព ស្នាមញញឹមអង្គរ (អតីតអង្គរឃ្យូងយូរ ) ខេត្តសៀមរាប ក្រោមប្រធាមបទ(អ្វីៗទាំងអស់ដើម្បីសុដុមភាពវប្បធម៌ជាតិ) ដោយមានការនិមន្ត និង អញ្ជើញចូលរួមពី ព្រះសង្ឃ ថ្នាក់ដឹកនាំមន្ទីរ គរុសិស្ស និស្សិត សិស្សសាលាសិល្បះ និង ក្រុមរបាំ ប្រមាណជាង ៣៥០ នាក់ដែលបានចូលរួម ។
តាមសេចក្តីរាយការណ៍របស់លោកស្រី ស៊ុន សុវណ្ណនី ប្រធានមន្ទី វប្បធម៌ និងវិចិត្រសិល្បៈ ខេត្តសៀមរាប បានគូសបញ្ជាក់ថា ខេត្តសៀមរាប ជាខេត្តសម្បូរទៅដោយសម្បត្តិបេតិកភណ្ឌ វប្បធម៌ដ៏សម្បូរបែប វប្បធម៌រូបី និង អរូបី ហើយមន្ទីរបានអនុវត្តតួនាទីភារកិច្ចរបស់ខ្លួន ក្នុងគោលដៅសម្រេចនូវផែនការ គោលនយោបាយវប្បធម៌សំដៅទៅលើ ការអភិរក្ស និង អភិវឌ្ឍន៍វិស័យវប្បធម៌ទាំងរូបី និង អរូបី ។ សម្បត្តិបេតិកភណ្ឌវប្បធម៌រូបី មានប្រាង្គប្រាសាទ , ទួលបុរាណ និង ផ្ទះ ព្រះវិហារបុរាណ ស្ពានបុរាណ រមណីយដ្ឋាន និង អគារ សំណង់បុរាណផងដែរ ។
ចំពោះសម្បត្តិបេតិកភណ្ឌវប្បធម៌អរូបីវិញ ស្ថិតក្រោមការ ថែរក្សានូវប្រពៃណី , ទំនៀមទម្លាប់, របាំ, ល្ខោន, យីកេ, ភាសា, អក្សរសិល្បិ៍ ភ្លេងប្រពៃណីបុរាណ ដោយមានការផ្ទេរចំណេះដឹង ពីអ្នកមានជំនាញ សម្រាប់អ្នកស្នងបន្ត (មរតកមនុស្សរស់) ក្រោម ប្រធានបទ (អ្វីៗទាំងអស់ដើម្បីសុដុមភាពវប្បធម៌ជាតិ ) ដែលទាំងអស់នេះ ឲ្យមានសុដុមភាព វប្បធម៌ជាតិ និងអរិយធម៌ របស់ជាតិ និង មានអត្ថិភាពនៅក្នុងពិភពលោកយើងនេះ។
មានប្រសាសន៍នាឱកាសនោះដែរឯ.ឧ ឃឹម ប៊ុនសុង ក៏បានលើកឡើងថា ការប្រារឰទិវា វប្បធម៌ជាតិនេះឡើង ក្នុងគោលបំណងបំផុសមនសិការ ស្នេហាជាតិ,ស្មារតីស្រឡាញ់,សម្បត្ដិ វប្បធម៌ដ៏សម្បូរបែបរបស់ជាតិ ដល់ប្រជាជាតិខ្មែរពីគ្រប់មជ្ឈដ្ឋានទាំងនៅក្នុង និង ក្រៅប្រទេស ។ ម្យ៉ាងទៀតក៏ដើម្បីធ្វើការទប់ស្កាត់នូវការហូរចូល និង ការចម្លងនូវវប្បធម៌ បរទេស មកលើសង្គមខ្មែរយើង ដែលធ្វើឲ្យបាត់បង់នូវប្រពៃណី ទំនៀមទំលាប់ និង វប្បធម៌ជាតិយើង ។
ឯកឧត្តម អភិបាលខេត្តក៏បានគូសបញ្ជាក់ថា ខេត្តសៀមរាបជាខេត្តប្រវត្តិសាស្ត្រ ដែលប្រមូលផ្តុំទៅដោយភ្ញៀវទេសចរណ៍ គ្រប់ ជាតិសាសន៍ ចូលមកទស្សនាកម្សាន្ត នៅតំបន់រមណីយដ្ឋានវប្បធម៌នៃយើងផងដែរ ។ ក្នុងយុវវ័យខ្មែរយើងទាំងពីរភេទ ក៏បាន កំពុងឈ្លក់វង្វេងទៅនឹងវប្បធម៌បរទេស ដែលបានធ្វើឲ្យមានការប៉ះពាល់យ៉ាងខ្លាំងដល់វប្បធម៌ និង ប្រពៃណីជាតិ ។
ឯ.ឧ ឃឹម ប៊ុនសុង បានឲ្យដឹងទៀតថា បច្ចុប្បន្នវិស័យវប្បធម៌នៅខេត្តសៀមរាប មានការអភិវឌ្ឍន៍រីកចម្រើននៅគ្រប់មូល ដ្ឋាន ព្រមទាំងមានសមាគមន៍ក្រុមសិល្បះទៀតផង ក៏ប៉ុន្តែចំពោះគុណភាពមានការធ្លាក់ចុះ ទាំងសិល្បះរូបី និង អរូបី ដែលធ្វើឲ្យប៉ះពាល់យ៉ាងខ្លាំងដល់វប្បធម៌ជាតិ ។
មានប្រសាសន៍នោះដែរឯ.ឧ ថៃ នរៈសត្យា ក៏បានរំលឹកឡើងផងដែរ ពីស្មារតីនៃទិវាវប្បធម៌ជាតិនេះ នឹងមានអត្ថិភាពគ្របដណ្ដប់ទៅលើចិត្ដ គំនិត ឥរិយាបថ និងសកម្មភាពអនុវត្ដរបស់ ប្រជាជនយើងពីគ្រប់មជ្ឈដ្ឋានក្នុងការ ចូលរួមអភិរក្ស និងអភិវឌ្ឍវិស័យ វប្បធម៌ជាតិនៅក្នុងគ្រប់ពេលវេលា ទាំងក្នុងបច្ចុប្បន្ន និង តទៅអនាគត” ។
ខេត្តសៀមរាប គឺជាទឹកដីដែលសម្បូរទៅដោយសម្បត្ដិ បេតិកភណ្ឌវប្បធម៌ទាំងរូបី និង អរូបី ដោយ បច្ចុប្បន្ន គឺសម្បត្ដិបេតិកភណ្ឌវប្បធម៌ជាតិទាំង នេះហើយដែលបានរួមចំណែកធ្វើឱ្យ កេរ្ដិ៍ឈ្មោះរបស់ព្រះរាជាណាចក្រ កម្ពុជាល្បីរន្ទឺសុសសាយនៅទូទាំង ពិភពលោក ស័ក្ដិសមនឹង “កម្ពុជា ៖ ព្រះរាជាណាចក្រនៃវប្បធម៌ ”។
ឯកឧត្តមរដ្ឋលេខាធិការ ក៏បានគូសបញ្ជាក់ថា សម្បត្ដិវប្បធម៌របស់យើងមួយចំនួនត្រូវបានពិភពលោកទទួលស្គាល់ និង បានដាក់បញ្ចូលជាបេតិកភណ្ឌពិភពលោក មានជាអាទិ៍ប្រាសាទតំបន់អង្គរ,ប្រាសាទព្រះវិហារ ចំណែក ការ ចុះក្នុងបញ្ជីបេតិកភណ្ឌវប្បធម៌អរូបីនៃ មនុស្សជាតិរួមមានរបាំក្បាច់បុរាណខ្មែរ ឬ របាំព្រះរាជទ្រព្យ និង ល្ខោនស្រមោលស្បែកធំ ។ សម្បត្ដិបេតិកភណ្ឌវប្បធម៌ ទាំងអស់នេះ បាននិងកំពុងក្លាយទៅជា ចលករប្រកបដោយប្រសិទ្ធភាពបំផុត ក្នុងការរួមចំណែកអភិវឌ្ឍសង្គម សេដ្ឋកិច្ច និងការកាត់បន្ថយភាពក្រីក្ររបស់ប្រជាជន ។
ឯ.ឧ ថៃ នរៈសត្យា ក៏បានលើកនូវអនុសាសន៍របស់សម្តេច តេជោ ហ៊ុន សែន នាយករដ្ឋមន្ត្រី ទាំង៦ចំណុច ដែលបានលើកឡើង ក្នុងឱកាលប្រារព្វទិវាវប្បធម៌ជាតិ ៣ មីនា ខួបលើកទី១៦ ដោយយកចិត្តទុកដាក់លើកម្លាំងសកម្មរបស់សង្គម ដែលមានយុវជនជាអ្នកបន្តវេន និង ធ្វើព្រឹត្ដិការណ៍នានា ក្នុង ការដាស់រំលឹក ស្មារតីស្នេហាជាតិ, ស្នេហាវប្បធម៌ជាតិ ឱ្យកាន់តែមោះមុតក្នុងអារម្មណ៍របស់ពលរដ្ឋខ្មែរម្នាក់ៗ បើពុំដូច្នេះទេកុមារ និង យុវជននឹងទទួលយកនូវអីៗដែលថ្មី ហូរចូលពីក្រៅមកហើយ ។
ទោះបីធ្វើសិល្បៈក្ដី ក៏ចាំបាច់ត្រូវមានចំណេះដឹង ទូលំទូលាយ និងទាន់សម័យដែរ ទើបអាចបម្រើដល់ប្រយោជន៍សង្គម និងប្រទេសជាតិបាន ។ ព្រមទាំង បំផុស ស្មារតីប្រជាជន មហាជន និងយុវជនឱ្យបង្កើនការដឹងគុណចំពោះ បុព្វការីជន ដែលបានខិតខំប្រឹងប្រែងកសាងសម្បត្ដិវប្បធម៌ដ៏សម្បូណ៌បែបប្រកបដោយ សក្ដានុពលក្នុងការរួម ចំណែកអភិវឌ្ឍសង្គម និងបម្រើឱ្យភាព សុខសាន្ដរបស់ប្រជាជន និងប្រជាជាតិ នៃយើងកាន់តែមានតម្លាភាពផងដែរ៕
ដោយ លោក ខេង ខេមរា 
