កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្តម អ៊ុន ចាន់ដា នាព្រឹកថ្ងៃទី១៣ ខែសីហា ឆ្នាំ២០២៤នេះ បានដឹកនាំមន្ត្រីពាក់ព័ន្ធ និងអាជ្ញាធរមូលដ្ឋាន ចុះពិនិត្យស្ថានភាពខ្វះខាត ទឹក ដើម្បីស្វែងរកដំណោះស្រាយជួយសង្គ្រោះដំណាំស្រូវ របស់ប្រជាកសិករ ជាង៣០០ហិកតា នៅក្នុងស្រុកជើងព្រៃ បន្ទាប់ពីជួបប្រទះនូវបញ្ហាគ្រោះដាំងស្ងួតក្នុងរដូវបង្កបង្កើនផលនេះ ។
ឯកឧត្តម អ៊ុន ចាន់ដា អភិបាលខេត្តកំពង់ចាម បានមានប្រសាសន៍ថា ក្នុងការចុះពិនិត្យការ បង្កបង្កើនផលរបស់ប្រជាកសិករ នៅក្នុងភូមិសាស្ត្រឃុំត្រពាំងគរ ឃុំសំពងជ័យ ឃុំស្តើង ជ័យ និងឃុំព្រីងជ្រុំ នៃស្រុកជើងព្រៃ តែងតែជួបប្រទះនឹងគ្រោះរាំងស្ងួត ខ្វះខាតទឹកប្រើប្រាស់ សម្រាប់សត្វពាហនៈ និងការបង្កបង្កើនផល ដោយសារភូមិសាស្ត្រនេះ នៅឆ្ងាយពីប្រភពទឹក បណ្ដាលឱ្យរងផលប៉ះពាល់ដល់ដំណាំស្រូវ ទំហំ ៣២៧ហិចតា និងខូចខាតប្រមាណជា ៤០ហិកតា ផងដែរ ។
ក្នុងឱកាសនោះដែរ ឯកឧត្ដមអភិបាលខេត្ត ក៏បានណែនាំដល់អាជ្ញាធរឱ្យបើកប្រភពទឹកចេញពី តំបន់ទឹកឆា ក្នុងស្រុកព្រៃឈរ និងធ្វើការស្តារប្រឡាយចាស់ៗ ដើម្បី សម្រួលឱ្យទឹកហូរមកដល់តំបន់ក្នុងភូមិសាស្ត្រទាំង៤ ឃុំខាងលើនេះ ឱ្យប្រជាពលរដ្ឋបានទឹកប្រើប្រាស់ ។ ចំពោះតំបន់ដែលមានស្រូវខូចខាត អាជ្ញាធរខេត្តបានត្រៀមស្រូវពូជ សម្រាប់ផ្តល់ជូន ប្រជាពលរដ្ឋធ្វើការដាំដុះឡើងវិញផងដែរ។
ពាក់ពន្ធ័នឹងការងារបង្កបង្កើនផលនៅទូទាំងខេត្តកំពង់ចាម ស្រូវវស្សា អនុវត្តបាន ចំនួន ៩៣.៤០៦ ហ.ត ស្មើនឹង ១០៧,៩៨% នៃផែនការ ៨៦.៥០០ហ.ត លឿនជាង ឆ្នាំមុន ៣.៣៣៥ហ.ត។ ជាមួយនេះដែរ ដំណាំស្រូវវស្សាបាន ចាប់ផ្តើមប្រមូលផលលើផ្ទៃដីសរុប ចំនួន ៤.៨១៨ហ.ត ទទួលបានទិន្នផល ៤,០៥តោន ស្មើនឹង៥,១៦%។ ចំពោះការបង្កបង្កើនផល ដំណាំរួមផ្សំរដូវវស្សា អនុវត្តការដាំដុះ បាន ចំនួន ៤៤.៧០១ហ.ត ស្មើនឹង ៨៩,៩២% នៃផែនការ ៤៩.៧១០ហ.ត ។ ចំពោះការប្រមូលផលដំណាំរួមផ្សំរដូវវស្សា បានចំនួន ៧.៣១៣ហ.ត ស្មើនឹង ១៦,៣៦%នៃផ្ទៃដីអនុវត្ត ៕
គួរបញ្ជាក់ថា ក្នុងថ្ងៃដដែលនេះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានដឹកនាំមន្ត្រីពាក់ព័ន្ធ ចុះពិនិត្យស្ថានភាពខ្វះខាតទឹក ដើម្បីស្វែងរកដំណោះស្រាយជួយសង្គ្រោះដំណាំស្រូវ របស់ប្រជាពលរដ្ឋយើង ក្នុងឃុំសណ្ដែក និងឃុំត្រប់ នៃស្រុកបាធាយ ផងដែរ ៕
