កំពង់ធំ ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានលើកឡើងដូច្នេះ ក្នុងនាមជាកងយោធពលខេមរភូមិន្ទ និងក្នុងនាមជាកងទ័ព គឺប្រៀបបានទៅនិងសរសៃឈាម របស់រាជរដ្ឋាភិបាល
ត្រៀមខ្លួនជានិច្ចក្នុងការទទួលភារកិច្ច អនុវត្តតាមបទបញ្ជាពីថ្នាក់លើ ដូច្នេះត្រូវមានសុខភាពល្អ និងមានគុណភាព ទាំងចំណេះដឹង តួនាទីភារកិច្ច គោរពវិន័យ និងសេចក្ដីថ្លៃថ្នូររបស់កងយោធពលខេមរភូមិន្ទ ប្រសាសន៍ត្រូវបានលើកឡើងក្នុងពិធី ចុះសួរសុខទុក្ខ សិក្ខាកាមនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ក្នុងទីលានហ្វឹកហ្វឺនហាត់ ទីបញ្ជាការកងវរសេនាតូចលេខ១ ស្ថិតនៅភូមិតាឡែក ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ នៅព្រឹកថ្ងៃទី១៣ ខែសីហា ឆ្នាំ២០២៤ ។
លោកវរសេនីយ៍ទោថនស៊ី សក្តា មេបញ្ជាការកងវរសេនាតូចលេខ១ និងជាអនុប្រធានអចិន្ត្រៃយ៍គណៈកម្មាការគ្រប់គ្រងវគ្គហ្វឹកហ្វឺន បានបញ្ជាក់ថា នេះគឺជាការ ហ្វឹកហ្វឺនរៀនសូត្រពង្រឹងនាយទាហាន នាយទាហានរង និងពលទាហាន ប្រចាំឆ្នាំ២០២៤ រយៈពេល១ខែនេះ គឺទទួលលទ្ធផលល្អ ទាំងខ្លឹមសារហ្វឹកហ្វឺនរៀនសូត្រ និងការស្នាក់នៅ ក្នុងនោះមានប្រាក់ឧត្ថម្ភបំប៉នហ្វឹកហ្វឺនរបស់សម្តេចតេជោ ហ៊ុន សែន និងការជួយឧប្ថម្ភម្ហូបអាហារបន្ថែមពីតាមបណ្តាកងឯកភាពនៅផ្នែកសឹករងក្រុងស្រុក ទាំង៩ ផងដែរ។
ឧត្តមសេនីយ៍ទោ សោម ស៊ុន បញ្ជាក់បន្ថែមថា ក្នុងនាមជាកងទ័ព ត្រូវតែក្លាហានមុះមុត ហាត់ពត់លុតដំខ្លួន ឲ្យមានគុណភាព ទាំងសុខភាពរាងកាយ ទាំងយុទ្ធសាស្រ្តកងទ័ព ព្រមទាំងក្រេបជញ្ជក់ចំណេះដឹងផ្សេងៗ ដូច្នេះសិក្ខាកាមទាំងអស់ត្រូវស្តាប់គ្រូយោធាចារ្យបង្រៀន និងរៀនសូត្រ តាមផែនការដែលថ្នាក់លើបានប្រគល់ជូន ទី១មានស្មារតីទទួលខុសត្រូវឲ្យទទួលបានលទ្ធផលល្អ ទី២ = ត្រូវត្រៀមបម្រុងកម្មវិធីហ្វឹកហ្វឺនយុទ្ទដំណើរទ័ពមុនពេលកម្មវិធីបិទហ្វឹកហ្វឺន មានចម្ងាយផ្លូវពី១៥ទៅ២០គីឡូម៉ែត្រ នៅក្នុងតំបន់ព្រៃឡង់ ។ ទី៣ យោធិនគ្រប់រូប ត្រូវតែស្មោះត្រង់ដាច់ខាតចំពោះជាតិ សាសនា ព្រះមហាក្សត្រ ការពារឲ្យបានរាជរដ្ឋាភិបាលស្របច្បាប់ ដែលប្រសូត្រចេញពីការបោះឆ្នោត ត្រៀមបម្រុងកំចាត់ចោលរាល់ជនទាំងឡាយណាមានគោលបំណងផ្តួលរំលំរាជរដ្ឋាភិបាល។
ឧត្តមសេនីយ៍ទោ សោម ស៊ុន បាននាំយកអង្ករ១.៣០០គីឡូក្រាម និងត្រីខកំប៉ុង៤កេស ជាការឧបត្ថម្ភរបស់ឧត្តមសេនីទោ ស៊ិន ស៊ីណាត នាយកដ្ឋានផ្គត់ផ្គង់របស់ក្រសួងការពារជាតិ ប្រចាំទិសយោធភូមិភាគទី៤ និងគ្រឿងឧបភោគបរិភោគមួយចំនួនទៀត របស់បញ្ជាការដ្ឋានតំបន់ប្រតិបត្តិការសឹករងកំពង់ធំ ឧបត្ថម្ភក្នុងវគ្គហ្វឹកហ្វឹននេះផងដែរ ។ដោយ ប៊ុន រដ្ឋា
