ខេត្តកំពង់ធំ ៖ ឯកឧត្តម នួន ផារ័ត្ន អភិបាលខេត្តកំពង់ធំ ប្រធានគណៈបញ្ជាការឯកភាពរដ្ឋបាលខេត្តកំពង់ធំ បានចុះពិនិត្យកងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដើម្បីត្រៀមអនុវត្តន៍បទបញ្ជា ការពារទប់ស្កាត់លុបបំបាត់ចលនាបះបោរ បង្ករអសន្តិសុខសង្គមនិងប្រគល់ភារកិច្ចចាំបាច់មួយចំនួន នៅរសៀលថ្ងៃទី១៤ ខែសីហា ឆ្នាំ២០២៤ ។
ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បញ្ជាក់ថា កងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានត្រៀមខ្លួនរួចជាស្រេច រួមជាមួយសម្ភារះ គ្រឿងបំពាក់គ្រប់គ្រាន់ និងមធ្យោបាយនានា ដើម្បីការពាររាជរដ្ឋាភិបាលស្របច្បាប់ និងកំចាត់ចោលជនទាំង ឡាយណា ដែលមានបំណងបំផ្លាញសន្តិភាព និងការអភិវឌ្ឍរបស់ប្រជាជនកម្ពុជា ។
យោធិននៃបញ្ជាការដ្ឋានតំបន់ប្រតិបត្តិការសឹករងកំពង់ធំទាំងអស់ បានប្តេជ្ញាចិត្តដាច់ខាត ក្នុងការគោរពតាមបទបញ្ជារបស់ថ្នាក់ ដឹកនាំ គ្រប់លំដាប់ថ្នាក់ នៃកងយោធពលខេមរភូមិន្ទ និងបទបញ្ជាផ្ទាល់របស់ឯក ឧត្តម អភិបាលខេត្ត ដើម្បីចល័តអន្តរាគមន៍បង្រ្កាបរាល់ជនទាំងឡាយណា ដែលមានគោលបំណងធ្វើបដិវត្តពណ៌ផ្តួលរំលំរាជរដ្ឋាភិបាល ដែលប្រសូត្រចេញពីការបោះឆ្នោត ដោយប្រជាជនគាំទ្រយ៉ាងច្រើនលើសលប់ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា ។
ឯកឧត្តម នួន ផារ័ត្ន កោតសរសើរចំពោះការត្រៀមបម្រុងរបស់កងកម្លាំង ទាំងមធ្យោបាយ សម្ភារៈ ដើម្បីចល័តអន្តរាគមន៍តាមបទបញ្ជា តាមបទបញ្ជារបស់គណៈបញ្ជាការឯកភាពរដ្ឋបាលខេត្ត និងបានពន្យល់ណែនាំអំពីការដាក់តំបន់ត្រីកោណអភិវឌ្ឍន៍(DTA) ដែលជាការអភិវឌ្ឍន៍ និងការគ្រប់គ្រងរបស់ប្រទេសនីមួយៗរៀងៗខ្លួន ជាមួយនឹងប្រទេសជិតខាង លើវិស័យសេដ្ឋកិច្ចពាណិជ្ជកម្ម និងបង្កលក្ខណះងាយស្រួលដល់ប្រជាជននៅក្នុងវិស័យសុខាភិបាល ដើម្បីបង្ក្រាប និងកំចាត់ចោលជនទាំងឡាយណា ដែលមានគោលបំណងផ្តួលរំលំ រាជរដ្ឋាភិបាលស្របច្បាប់ ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឲ្យបានជាដាច់ខាត ទោះបីក្នុងតម្លៃណាកីដោយ ។ដោយ ប៊ុន រដ្ឋា
