កំពង់ចាម: ឯកឧត្តម អ៊ុន ចាន់ដា អភិបាលនៃគណៈអភិបាល ខេត្តកំពង់ចាម បានប្រមានចាត់វិធានការយ៉ាងតឹងរឹងចំពោះជនល្មើសទាក់ទងនឹងបទល្មើលនេសាទខុសច្បាប់ ដើម្បីថែរក្សានូវពូជមច្ឆជាតិ សម្រាប់កូនចៅជំនាន់ក្រោយ ថ្លែងបែបនេះក្នុងកិច្ចប្រជុំសាមញ្ញលើកទី៣ អាណត្តិទី របស់ក្រុមប្រឹក្សាខេត្តកំពង់ចាម នាព្រឹកថ្ងៃទី១៥ ខែសីហា ឆ្នាំ២០២៤ ក្រោមវត្តមានឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម ។
ថ្លែងក្នុងកិច្ចប្រជុំនេះ ឯកឧត្តម អ៊ុន ចាន់ដា បានលេីកឡេីងថា ការប្រើប្រាស់ឧបករណ៍នេសាទខុសច្បាប់ ដែលផ្ទុយពីការណែនាំរបស់ក្រសួងកសិកម្ម រុក្ខប្រមាញ់ និងនេសាទ មានដូចជាស្បៃមុង..បានបំផ្លិចបំផ្លាញយ៉ាងធ្ងន់ធ្ងរបំផុតនូវទិន្នផលមច្ឆជាតិ នៅក្នុងភូមិសាស្ត្រខេត្តកំពង់ចាម ជាពិសេសក្នុងរដូវបិតនេសាទនេះ។
ជាមួយគ្នានោះ ឯកឧត្តមអភិបាលខេត្ត ក៏បានជំរុញមន្ត្រីជលផលគ្រប់លំដាប់ថ្នាក់ក៏ដូចជាអាជ្ញាធរដែនដី និងកម្លាំងមានសមត្ថកិច្ចក្នុងមូលដ្ឋាន សូមបន្តអប់រំផ្សព្វផ្សាយ ទៅដល់បងប្អូនប្រជានេសាទ អំពីផលប៉ះពាល់ នៃការប្រើប្រាស់ឧបករណ៍នេសាទខុសច្បាប់ ជាពិសេសបន្តយកចិត្តទុកដាក់សហការគ្នា ចេញត្រួតពិនិត្យ និងបន្តចុះធ្វើការត្រួតពិនិត្យ ទប់ស្កាត់បទល្មើសជលផលក្នុងភូមិសាស្ត្ររបស់ខ្លួនឱ្យបានជាប្រចាំ ជាពិសេសត្រូវសហការតាមដានស្ថានភាពប្រជាសាស្ត្រ និងភូមិសាស្ត្រជលផលឱ្យបានច្បាស់លាស់ ដើម្បីក្តាប់ឱ្យបាននូវមុខសញ្ញាអ្នកប្រព្រឹត្តិបទល្មើសនេសាទទាំងអស់នោះ ដើម្បីចាប់ឃាត់ខ្លួន កសាងសុំណុំរឿង បញ្ជូនទៅតុលារ ចាត់ការទៅតាមនិតិវិធីច្បាប់ដោយគ្មានការលើកលែងឡើយ។
ក្នុងកិច្ចប្រជុំនេះដែរ ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម បានគូសបញ្ជាក់ថា ក្នុងកិច្ចប្រជុំសាមញ្ញលើកទី៣ អាណត្តិទី៤ របស់ក្រុមប្រឹក្សាខេត្ត នាពេលនេះ គឺមានរបៀបវារៈសំខាន់ ៗ ចំនួន៧ ជូនសមាជិកក្រុមប្រឹក្សាខេត្ត ដេីម្បីពិនិត្យ ពិភាក្សា និងអនុម័តលេីសេចក្តីព្រាងទាំងនោះ ៕
